Инешкипаз

Ине́шкипаз (Инешки, Паз, Шкай) — эрзянь ине Паз, Модамасторонь теиця. "Инешкипаз" валось ашти колмо валсто - "ине" (покш), "шки" (шкамс-теемс - шкиця) ды "паз".

Инешкипазось вейке. Эрзятне мерить тензэ Инешкипаз, Нишкепаз, Нишке. Мезе тонь лемсэть? Мезесь ашти ванстомакс эрзятнень туртов?

Ванстомакс ашти пертьпельксэсь, конань теизе Инешкипазось. Мекс Инешкипазось теизе ломаненть? Ломанекс, аволь пазонь урекс, пертьпельксэнь ванстыцякс, идицякс. Ознови-арась эрзянь ломаненть пежетезэ? Арась. Ломанесь озны чумонзо нолдамонь кис, ансяк эрямопингензэ перть канды пежетенть сталмонзо оймесэнзэ, мари чумо пежетенть кувалма. Мереви-арась ломанентень кандомс зыян пертьпельксэнтень? Арась. Мекс? Модась - Мастораванть рунгозо. Эрькетне - Ведяванть сельмензэ, лейтне - сонзэ верьсанозо. Коштось - Инешкипазонть оймекоштозо. Мереви-арась понгавтнемс мезеяк ломаненть кирьгазонзо? Ансяк ава ломанень кирьгакст, эрьгть, мазылгавтомкат. Кирьгасонзо кандтни тешкст ды килькшт ансяк уресь, аволь эрзянь ломанесь. Мекс Инешкипазось лемдизе ломаненть "эрзякс"? Эрзя - те эриця, эрий, эри. Весемесь саеви "эрямс" ды "эрямо" валтнэстэ. Артокшныть-арась эрзятне Инешкипазонть чаманзо-рунгонзо лаз эли конёв ланга? Эрзятне тейнить ансяк Нишкепазонь-Чипазонь тешкс. Эрзянь ломанесь корты Инешкипазонть марто оймеде оймес. Кие вети вейсэнь озкстнэнь? Вейсэнь (Раськень, Велень, Авань...) озксонть вети Озатя эли Озава, конат кочкави озксонть ютавтоманзо.