Подгорнова, Алина Сергеевна

К:РУВИКИ:Статьи без изображений (тип: не указан)

Подгорнова Алина Сергеевна, валморонь сёрмадыця.

Эрямо пингезэ

Чачсь 1991-це иень ожоковонь 19-це чистэ Мордовия Республикань Дубёнкань буень Кобалесэ. Эйкакшпингстэ саезь уш Подгорнова Алина кармась керьксамо арсеманзо рифмасо. Васенце валморонзо сёрмадызе ушодкс классо тонавтнемстэ, ды лиссь сон «Чилисема журналсо» 2004-це иестэ. Покшоль тейтеренть кенярксозо. Сюкпря тонавтыцятненень ды ялгатненень – эзизь керя сёлмонзо, эзизь лово шкинемань толнэнть стяконь тевекс, эйкакшонь налкшкекс. Эрьва ёндо лездасть. Ялгатне – паро валсо, тонавтыцятне – превсэ. Секскак, зярдо 8-це классо тонавтнемстэ Писателень союзось тердизе сонзэ од сёрмадыцянь семинарс, весе седейшкава кенярдсть кисэнзэ. Содасть: те а стяко, мезе-бути несть эрзянь тейтернестэнть литературас чарькодицятне. Истя Алина эрьва ие кармась сакшномо семинартнэс.

Школань прядомадо мейле тонавтнесь Н.П. Огарёв лемсэ госуниверситетэнь филологиянь факультетсэ. Арсесь сюлмамс эрямонзо эрзянь журналистиканть марто. Ды вана 2012-це иестэ, университетсэ тонавтнемстэ, сась важодеме «Сятко» журналс, косо мельспаросо нейгак топавты эрзянь литературань ванстомань ды поладомань тевенть. Семинартнэ эзть юта лезэвтеме. Шкинемань толось виемсь ды валдомты сонзэ эрямонть, максы чарьксчи ды цидярдомань вийть. Ней уш сонсь Алина Сергеевна тонавты одтнэнь. Одтнэнень ули мезес тонавтнемс сонзэ пельде.

Шкинемазо

А. Подгорнова сёрмады аволь ансяк эрзянь кельсэ валморот, сёрмады рузонь кельсэяк, седе ламонень чарькодевест мелензэ-арсеманзо, пиштеманзо-мелявксонзо. «Сятко» журналсо лиснить лирикань миниатюранзо ды ёвтнеманзо. Сёрмадовксонзо лиснесть ды лиснить «Чилисема», «Сятко», «Странник», «LITERRA Nova» журналтнэсэ, «Эрзянь валске» (2011-це ие), «Ступени» (2012-це ие), «Тешкс» (2013-це ие), «Антология одного стихотворения о любви» (2013-це ие), «Современная литература народов России: Поэзия / Антология» (2017-це ие) вейсэнь пусмотнесэ. 2013-це иестэ лиссь «Марямга / Вслух» валморонь васенце пусмозо, 2016-це иестэ – «Кроме рифм» омбоце пусмозо. Кавонест пусмотне явозь кавтов: эрзянь ды рузонь пельксэс.

Подгорнова Алина – Россиянь писателень союзонь член (2013-це иестэ саезь), од сёрмадыцятненень Мордовия Республикань Прявтонь премиянь лауреат (2013-це ие).

Литературась

Писатели Мордовии : библиографический справочник : в 2 т. Е. 2. Л – Я / сост. : А. И. Брыжинский, Л. П. Бойнова, Е. И. Чернов. – Саранск : Мордовское книжное издательство, 2015. – 544 с. ISBN 978 – 5 – 7595 – 1938 – 6 (т. 2)
«Чилисема», 2017, №1, С.20