Агеев, Евгений Иванович

Евгений Агеев
Евгений Агеев
Чачомсто лемезэ	Евгений Иванович Агеев
Чачома чизэ	1922-це иень якшамковонь 16-це чи
Чачома тарказо	Кобале, Алатырскяй уездсь[d], Симбирской губерния[d], РСФСР[d];
Кулома чизэ	1943-це иень эйзюрковонь 5-це чи (21 ие)
Важодемань ёрокчизэ	сёрмадей, валморозей

Агеев Евгений Иванович (1922, якшамковонь 16 чи Мордовиянь Тумобуень Кобале - 1943, эйзюрковонь 5 чи) - эрзянь^[1] сёрмадыця.

Эсензэ ланга

Файла:Dubyonky history museum 29.jpg

Дубёнкань буень сёрмадыцянь фото. Евгений Агеев ало керш ёно

Евгений Агеев чачсь 1922-це иень якшамковонь 16 чистэ Мордовия Республикань Дубёнкань буень Кобалесэ. Сисем иесэ тусь школав. Тонавтнесь парсте. Котоце классо кармась сёрмалеме кулялопас. Мейле кундась валморос, кармась кучнемест «Пионерэнь вайгель» журналс, «Ленинэнь киява», «Эрзянь коммуна» кулялопатнес. Тосо нолдазельть зярыя валморонзо, ёвксонзо ды ёвтнеманзо. Шкань ютазь кармасть тердтнемензэ од корреспондентэнь промксов.

Мезеяк эзь кадово пельдензэ: а эйкакшке, а калмине. Ансяк ветешка-котошка сёрминеть, зяро-бути фотокувт ды… валморо марто тетрадь. Фронтов туемстэ Еня (истя мерсть Женянень кудосо) кутмордызе аванзо ды тошказевсь:

«Бути мезе, авай… ванстыть неть тетрадтнень. Энялдан…».

Ушосонть ульнесь 1941-це иень тарьксэв сёксь. Фронтсто сеедьстэ кучнесь кудов сёрмат, секе тев кевкстнесь: кода тынь тосо? Мелявтсь тетянзо-аванзо, ялаксонзо-сазоронзо кис. Эсь прядонзо сёрмадсь нурькинестэ:

«Монь тевтне парот, истожатано фашисттнэнь…».

Меельце сёрманзо ало шкась - 1943-це иень эйзюрковонь 5 чи. Седе тов - а куш а каш. Мейле тетянзо-аванзо туртов сась раужо куля. Сынст батальононь санитаркась пачтясь:

«…блиндажс, косо ульнесь Агеев Евгений Иванович тынк цёранк, радистэсь, старшей сержантось, понгсь ятонь снаряд. Цёранк маштовсь…».

Кувать калгодо вармась Енянь таркас вачкоесь тиринь кудонзо вальмас, соракавтнесь аванзо. Ансяк эзь учово Еня, эзь са…

Куломадонзо икеле Наталья Степановна, Евгений Агеевень авазо, максынзе ломань вельде Енянь тетрадензэ Саранскоев, кемсь: паряк, печатыть зярояк валморот. Илизь стувто седей покольнензэ, содазт ломантне, кодамоль сон: чевте ойме, мелень ваныця, превей.

Софья Ивановна Бровцева (Агеева) (1923-2004) сазорозо ёвтнесь: "Эрзянь кулялопань ставкстнэнь Еня яла кирдсь пряпесэнзэ, чокшне ланга ламо ловнось ды сёрмадсь. Вейксэ класстнэнь прядомадо мейле ушодсь тонавтомо Дубёнкань школасо: ярмакт эрявсть семиянтень, косо ульнесть сисем эйкакшт. Чокшне ланга якиль од сёрмадыцянь курынев: оймесь бажась морос, вешнесь поэзияс чарькодиця ломань. Истямокс тензэ ульнесь Андрей Юргай (Андрей Сафронов) эрзянь поэтэсь - мазый, сэрей цёрась. Сонгак важодсь тонавтыцякс ды теке марто ветясь сёрмадыцянь курыненть. Зяро ломанть пурнавильть! Кандыльть: кие ёвтнемине, кие ёвкске-кавкске, кие стихть, кие истяко сыль кунсоломо. Покш кемемат ульнесть Еня лангс - сонзэ валморонзо вадряльть. Валморонь виев сёрмадыця эйстэнзэ лисевель".
Неень шкане неть тетрадттнэ ванстовить Саран ошонь прявт архивсэ.

↑ Алешкин, А. Агеев Евгений Иванович / А. Алешкин // История Мордовии в лицах: биогр. сб. / НИИ яз., лит., истории и экономики при Правительстве Респ. Мордовия; сост.: П. Д. Грузнов, В. А. Чугунов; редкол.: П. Д. Грузнов (отв. ред.), В. А. Чугунов (зам. отв. ред.), И. Г. Кильдюшкина и др. – Саранск, 1997. – [Кн. 2]. – С. 8–9. ISBN 5—7493—0100 —1(руз.)

[Алешкин-1] Алешкин, А. Агеев Евгений Иванович / А. Алешкин // История Мордовии в лицах: биогр. сб. / НИИ яз., лит., истории и экономики при Правительстве Респ. Мордовия; сост.: П. Д. Грузнов, В. А. Чугунов; редкол.: П. Д. Грузнов (отв. ред.), В. А. Чугунов (зам. отв. ред.), И. Г. Кильдюшкина и др. – Саранск, 1997. – [Кн. 2]. – С. 8–9. ISBN 5—7493—0100 —1(руз.)

[1]