Алтышкин, Виктор Леонидович

Алтышкин Виктор Леонидович, эрзянь содавикс сёрмадыця

Эрямозо

Виктор Леонидович Алтышкин чачсь 1934-це иень таштамковонь 27-це чистэ неень Мордовия Республикань Чаунзань буень Вишка Эрьмезёнка велесэ. Тонавтнесь Ташто Эрьмезёнкань ушодкс школасо, Вишка Маризь велень сисем иень школасо. 1952-це иестэ прядызе Покш Маризь велень средней школанть.

1952—1953-це иетнестэ важодсь Куйбышев (ней Самара) ошсо военной авиационной заводсо токарекс-револьверщикекс, мейле — мастерэкс. Тонавтнесь Нижней Тагилэнь горно-металлургической техникумсо геологокс. Ульнесь Уралонь тайгасо геологонь экспедициясо.

1954—1958-це иетнестэ служась Северной флотсо. Мейле велявтсь Мордовияв, Чаунзань Комсомольской посёлкав. Важодсь Алексеевской заводонь шиферэнь теицятнень бригадасо, мейле — Алексеевской ТЭЦ-сэ мастерэкс. Прядсь электровозонь машинистэнь курсат, те специальностенть коряс важодсь 1989-це иес.

Кулось 2006-це иень медьковонь 23-це чистэ. Калмазь Чаунзань буень Комсомольскойсэ.

Шкинемазо

Сёрмадомо ушодсь рузонь кельсэ армиясо служамсто. Сёрмалесь фельетонт, статьят, очеркть, нурька ёвтнемат. Сынь лиснесть «За Родину», «На северной вахте», «На страже Заполярья» кулялопатнесэ, конатнень военкорокс ульнесь авторось.

Эрзянь кельсэ васенце ёвтнемазо — «Вечкемась а мадстеви» — лиссь «Сурань толт» журналсо (ней «Сятко») 1961-це иестэ. 1976-це иестэ Мордовиянь книгань издательствась нолдызе «Нуя чиресэ» ёвтнемань васенце книганзо. Мейле лиссть «Данилка» (1979), «Эрямонь пинкст» (1986), «Кстыйть» (1995) пусмотне.

1991-це иестэ В. Л. Алтышкин совавтозь Россиянь Сёрмадыцянь вейсэндявксос.

Эрзянь кельсэ нолдавксонзо

Нуя чиресэ: ёвтнемат. – Саранск: Мордовской книжной издательствась, 1977. – 51 с.

Данилка: ёвтнемат. – Саранск: Мордовской книжной издательствась, 1979. – 32 с.

Эрямонь пинкст: ёвтнемат. – Саранск: Мордовской книжной издательствась, 1986. – 48 с.

Кстыйть: ёвтнемат / В. Алтышкин; Ожо цецят: ёвтнемат / П. Ключагин. – Саранск: Мордовской книжной издательствась, 1995. – 72 с.