Анимациянь раськеютконь чи
| Анимациянь раськеютконь чи | |
|---|---|
 Эмиль Рейно оптикань эсь театранзо марто | |
| Зярдо ютавтневи | Ожоковонь 28-це чи |
Анимациянь раськеютконь чи (англ. International Animation Day) — раськеютконь покшчи весе ломантнень, кить сюлмазь анимациянь ды мультипликациянь искусстванть марто. Тешкстави эрьва иень ожоковонь 28-це чистэ.
Покшчинть эрямопингезэ
«Анимациянь раськеютконь чинть» тешкстамозо кочказь а стяко. Те чистэнть 1892-це иестэ Эмиль Рейно Франциясто артыцясь ды одонь теицясь невтинзе Парижень эрицятненень Гревень музеень «Фантастикань нупальсэ» «палыця пантомиматнень» — экран лангсо молиця артовкстнэнь (лиякс меремс — мультфильматнень).
Анимациясь содась эрьва кодат шкат. 1894-це иестэ молиця артовкстнэнь Люмьер лелятнень-ялакстнэнь теевксэст марто вейс сюлмавомадо мейле сынь кармасть седеяк вечкевиксэкс. Седе тов, компьютертнэнь появамонть марто появась компьютерэнь анимацяськак. Неень шкасто неть технологиятне тейсть покш эскелькс икелев ды аволь специалистэнтень лиясто стака чарькодемс, мезе сон неи экрансо — «эрикс» кино эли анимировазь.
«Анимировазь кинонь раськеютконь ассоциациясь» (англ. The International Animated Film Association, ASIFA) эли «АСИФА»-сь (видьстэ меремс — Парижсэ аштиця сонзэ курось) 2002-це иестэ кемекстызе те чинть Эмиль Рейнонь весень туртов теевксэнзэ невтемань 110 иетненень.
Анимациянь раськеютконь чинь тешкстамодо икеле весе масторсто артыцятне-аниматортнэ кучнить вейкест-вейкест туртов эсь фильмань программатнень ды ютавтнить теевксэст васенце невтемат. Неень шкасто анимациянь истят киносеанстнэ ве шкасто ютавтневить 104 мастортнэсэ, конатнень ютксо Россиянь Федерацияськак.
Эрямопингенть ёндо видестэ карми варштамс анимациянть (мультипликациянть) чачома чинзэ седе васоло ёнксонть лангс. Франциянь эрицятне кода те искусствань ушодыцятне ловить анимациянь чачома чикс 1877-це иень умарьковонь 30-це чинть. Те чистэнть Эмиль Рейно (фр. Emile Reynaud) франциянь одонь теицянь-вечкицясь кемекстызе праксиноскоп теевксэнть. А вана седе икеле, 1877-це иень медьковонь 20-це чистэ Эмиль Рейно кортась Франциянь акамемияс совицятнень марто ды невтизе праксиноскопонть (англ. praxinoscope) — аппаратонть, кона пурназель печениянь ды зеркалань барабансто, ды кона ванькс парсеень пачк невтиль эрьва кодамо молицянь артовкст.
Истямо койсэ, мультипликациянь искусствась 20 иеде седе покш кинонь жанранть эйстэ. Анимациянь ды эйкакшонь тематикань зярыя сайттнэ ёвтасть мель тешкстамс Россиясо «Мультипликациянь чинть» покшчинть те чистэнть (умарьковонь 30-це чистэ). РФ-нь Кинематографистэнь вейсэндявксонь прявттнэ те меленть кирдизь, покш мастертнэ ды Россиянь анимациянь куротне, СМИ-тне, интернет-сайттнэнь ламо администрациятне ды ламо тёжат ваныцятне пурнасть 1000-до ламо кедьтешкст покшчинть кирдемга. РФ-нь культурань министерствась кой-кона вешематнень топавтомсто аноколь лездамс Россиясо Мультипликациянь чинть тешкстамонь ушодомантень[1].
Тешкставкст
- ↑ Мультипликациянь чи, умарьковонь 30-це чи [неавторитетный источник?]