Баргова, Тамара Сергеевна
| Баргова, Тамара Сергеевна |
|---|
Баргова, Тамара Сергеевна (1955-це иень умарьковонь 13-це чи) — эрзянь сёрмадыця.
Эрямо пингезэ
Чачсь 1955-це иень умарьковонь 13-це чистэ Мордовия Республикань Покш Игнатовань буень Андрейвелесэ. Школань прядомадо мейле тонавтнесь М. Горький лемсэ Уралонь госуниверситетэнь журналистикань факультетсэ. Екатеринбургсто велявтомадо мейле ушодсь важодеме «Восход» Покш Игнатовань буень кулялопасо отделэнь прявтокс. Аламо шкань ютазь сы эрямо Саран ошов. Важоди «Эрзянь правда» кулялопасо васня корреспондентэкс, мейле отделэнь прявтокс. Журналистэнь китне-янтнэ ветнизь республикань малав эрзянь весе велетнес. Ломань марто вастовоматне лездасть сыця шкань сёрмадеентень парсте тонавтнемс эрямонть. Сёрмадыцянть туртов те пек эряви.
Тамара Сергеевнанень ламо макссь эрзянь ды мокшонь книгань издательствасо прявт редакторокс важодемаськак. Те шкане кассь сёрмадомань ёрокчизэ, лиссть зярыя книганзо.
Шкинемазо
Васенце сёрмадовксонзо – новелланзо, зарисовканзо лиссть «Восход» кулялопасо, зярдо сыця шкань сёрмадыцясь тонавтнесь 8-це классо. 1997-це иестэ эрзянь ды мокшонь книгань издательствасо лиссь «Вечкемань усият» ёвтнемань ды очеркень васенце книгазо. Вейке иеде теде икеле «Чаволкайть ды превейть» пьесазо печатазель «Садо, садо минек кудов» вейсэнь пусмосонть. 2004-це иестэ лиссь «Мон ды монь ялган» книгазо. Сон алтазь вишка ловныцятненень. Ламо седей лембе путсь «Пластика движения» книганть сёрмадомсто. Сон рузонь кельсэ, печатавсь 2009-це иестэ. Теке иестэнть лиссть «Книжный мир Мордовии» ды «Паз, простямак!» книганзо. Васенцесэнть ёвтневи седе, кода минек республикасо ушодовсь ды виевгадсь-келейгадсь книгань нолдамонь тевесь, кодамо ёжосо весемесь неень шкане. Омбоцентень совасть авторонть «Паз, простямак!» повестезэ, зярыя ёвтнеманзо, очеркензэ.
Тамара Барговань книганзо ловномсто токави седеесь ды редяви видечинь невтемась. Сёрмадыцясь а машты манчеме, вечки эсь откерензэ, конатнень ютксо седе ламотне – малавиксэнзэ, ялганзо. Улевельтькак виензэ, сон весень теевлинзе уцяскавокс, ансяк эрямонь лувонть а полавтсак. Сонзэ эсензэ коензэ-ладонзо. Парочись свал тюри беряненть каршо ды а свал содат, конась эйстэст зярдо изни. Сёрмадыцянть келезэ ловновиця, мазый.
Т. С. Барговань ламот шныть кода книгань паро витниця. Сон сёрмадсь-анокстась краеведениянь темас книгат Мордовиянь кеменде ламо буетнеде, зярыя предприятиятнеде.
Тамара Баргова совавтозь Россиянь Журналистэнь ды Сёрмадыцянь вейсэндявкстнэс. Сон — МР-нь культурань заслуженной важодиця, МР-нь Государственной премиянь лауреат.
Литература
- Мордовия, XX век: культурная элита : энциклопедич. справ.: в 2 ч. Ч. 1 : А - М / ред. совет: В. А. Юрчёнков (пред.) [и др.] ; редкол.: Т. М. Гусева, А. Юрчёнков (отв.редакторы) [и др.] ; НИИ гуманитар. наук при Правительстве Республики Мордовия. - Саранск, 2010. - 416 с. : 32 с. ил. - (Мордовия. XX век)
ISBN 978-5-900029-71-9 (ч. 1) ISBN 978-5-900029-70-2
- Писатели Мордовии : библиографический справочник : в 2 т. Т. 1. А - К / сост. : А. И. Брыжинский, Л. П. Бойнова, Е. И. Чернов. - Саранск : Мордовское книжное издательство, 2015. - 536 с.
ISBN 978-5-7595-1936-2 (т.1)
- «Чилисема», 2013, №9, С.22
1. https://erziana.my1.ru/publ/tamara_sergeevna_bargova/1-1-0-257
2. http://www.finnougoria.ru/logos/proza/2091/20412/
3. http://portal.do.mrsu.ru/community_events_people/people/?id=2165