Брыжинский, Андрей Иванович

Брыжинский, Андрей Иванович

Брыжинский Андрей Иванович, эрзянь содавикс сёрмадыця, учёной

Эрямозо

Андрей Иванович Брыжинский чачсь 1948-це иень панжиковонь 20-це чистэ неень Мордовия Республикань Кочкурова ёнксонь Од Тягловка велесэ. Школанть прядомадо мейле тонавтнесь Мордовиянь госуниверситетэнь филологиянь факультетсэ. Зярыя иеть важодсь «Эрзянь правда» кулялопань редакциясо. Мейле прядызе НИИЯЛИЭ-нь аспирантуранть, идизе кандидатонь диссертациянзо. Ульнесь теке институтсонть васня научной сотрудникекс, учёной секретарекс, мейле наукань тевтнень коряс директоронь полавтыцякс (1982–1993), теке шкане ветясь НИИ-нь аспирантурань тевтнень. 1994-це иестэ саезь кармась важодеме Н. П. Огарёв лемсэ МГУ-нь филологиянь факультетсэ рузонь ды омбомасторонь литературань кафедрань прявтокс. Идизе филологиянь наукань докторонь диссертациянзо (1995), курок тензэ максозель профессоронь лемесь (1996). 2002-це иестэ аравтозель Н. П. Огарёв лемсэ МГУ-нь национальной культурань факультетэнь (ней Н. П. Огарёв лемсэ национальной культурань институт) деканокс. 1998-це иестэ саезь ульнесь Россиянь Федерациянь Раськетнень ассамблеянь эрзянь-мокшонь отделениянь прявтокс. Сёрмадсь ниле монографият ды сядодо ламо тонавтомань-методикань важодевкст ды статьят. Содавикст ды питнейть «В едином строю» (1984), «Современная мордовская проза» (1995), «Процессы жанрового развития мордовской прозы (50–90-е годы)» (1995) ды наукань лия важодевксэнзэ. Кулось 2013-це иень умарьковонь 31-це чистэ.

Шкинемазо

А. И. Брыжинскиень шкинемань кизэ ушодовсь 1971-це иестэ, зярдо «Эрзянь правда» кулялопасо лиссь «Лезэв командировка» васенце ёвтнемазо. Мейле нолдазельть «Сув» (1982), «Ёмаське» (1985), «Вечкемань сюлмо» (1987), «Оймень моро» (1994) повестень ды ёвтнемань книганзо, «Вечкеманть тюсонзо эсензэ» (2004) романозо, кона 2007-це иестэ лиссь рузонь кельсэ «У любви краски свои» лементь ало, «Вечкемань тол потсо» (2008), «Костёр души» (2010), «Жаркая встреча» (2013) книганзо.

А. И. Брыжинский — Россиянь Сёрмадыцянь вейсэндявксос совиця (1996). Шкинемазо ды наукасо важодемазо тешкстазь РСФСР-нь Верховной Советэнь Президиумонь (1990), СССР-нь журналистэнь вейсэндявксонь правлениянь ды РСФСР-нь «Знание» обществань Почётонь грамотатнесэ, Россиянь Федерациянь Раськетнень ассамблеянь сырнень медальсэ (2008). Теде башка, сон – Мордовия Республикань Государственной (1998) ды Мордовия Республикань Прявтонь (2006) премиятнень лауреат, Мордовия Республикань культурань заслуженной важодиця (2001).