Владимир Путинэнь марто виде линия (2024)

Владимир Путинэнь марто виде линия (2024)
Владимир Путин Россиянь Президентэсь виде линиянь ютавтома шкасто (2024)
Зярдо ютавтозель васенцеде	2001-це иень ацамковонь 24-це чистэ
Кода сеедьстэ ютавтневи	эрьва иестэ
Ютавтыцясь	Россиянь Президентэнь Администрациясь
Кодамо сайтс пшкадемс	москва-путину.рф

Владимир Путинэнь марто виде линия (2024) — Владимир Путин Россиянь Федерациянь Президентэнь эрьва иень пресс-конференция, кона вейсэндязь виде линиянть марто. Ютась виде эфирсэ 2024-це иень якшамковонь 19-це чистэ, мольсь 4 част 27 минутат. Эрицятнень пельде телефононь, СМС-сёрмань ды интернетэнь пачк састь 2,5 миллиондо ламо пшкадемат. Покш кортамонть ванызь 17 миллионт ломанть.

Анокстамо

2024-це иень ацамковонь 8-це чистэ 19-це чис 00:00 чассто саезь Россиянь Президентэнтень кучневсть текстэнь ды видеонь вельде кевкстемат мобильной башка приложениянь, СМС-сёрмань, телефононь лезксэнзэ вельде, «ВКонтакте» ды «Одноклассники» социальной сеттнень вельде, ды истя жо moskva-putinu.ru (москва-путину.рф) сайтэнть вельде.

2024-це иестэ call-центрань важодицятне «Народной фронтонь» штабсо ломантнень пшкадемаст ванномга васенцеде нолдызь тевс искусственной интеллектэнть. GigaChat нейросетесь явнось кучозь сёрматнень соцсеттнесэ, аудио пшкадематнень ды SMS-нень кочказь тематнева.

2024-це иень ацамковонь 11-це чистэ Владимир Путин пачколесь Московонь «Сберэнь» прявт офисэнтень, косо ваннызе ИИ-нь теевкстнэнь невтевксэнть. тень пингстэ GigaChat масторонок прявтонть икелепелев содавтызе, кодат кевкстемат седе сеедьстэ макснесть ломантне виде линияс пшкадемстэ:

Чарькодеви, кодат кевкстематнес эряви анокстамс, конатнеде сех ламо: эрямотаркатнень парочидест ды рамавиксчидест, транспортной инфраструктурадо, медицинадо, госструктуратнеде ды организациятнеде, пособиятнеде.

Владимир Путин теевсь содавиксэкс 2024-це иень виде линияс эрицятнень пельде пшкадемань прявт тематнень марто

2024-це иень ацамковонь 19-це чинь даннойтнень коряс виде линияс эрьва кодамо форматсо пшкадематнень числась ютась 2,5 миллионтнэнь трокс. сехте ламо пшкадематне састь Центральной, Северо-Западной ды Южной федеральной округтнестэ.

2024-це иень цётамот

Эфирэнь прявт тематнень ютксо ульнесь Россиянь социальной политикась (пшкадематнестэ 20 %), эрямо таркатне (9 %), экономиканть (9 %), шумбрачинь вантоманть (8 %), эрямонь ды коммунальной хозяйстванть (8 %) ды СВО-нть (6 %) марто кевкстемат.

Экономикасо

2024-це иень экономиканть ланга масторонь прявтось ёвтась кода «паро ды кеме», Валовой внутренной продуктонть (ВВП-нть) 3,9 % касомань ёвтамсто, а 2025-це иестэ учови 2,5 процентс касома. Тень пингстэ тейсь Европань Союзонть (ЕС-нть) марто карадо-каршо ваннома (2024-це иестэ эзь касо) ды США-со (малав 6 %). Башка лоткась Россиясо важодемавтомо сех алкине процентэнь аштицятнень лангсо (2,3 %). Теде башка Владимир Путин тешкстызе РФ-нь обрабатывающей промышленностень покш касоманть, мезесь ловови масторонь виевчинь ёнксокс.

Владимир Путин: «Экомикась паро ды кеме».

2024-це иестэ 9 %-нь инфляциядо кортамсто Президентэсь тешкстась, тесэ улить ламо эрьва кодат тувталт. Веенстнэнь ютксо:

• Россиясо потреблениянь касомась;
• логистиканть марто сюлмазь масторлангонь питнетнень касомась.

Омбонстнэнь ютксо:

• Центробанконть пельде аволь шкастонзо тевс нолдазь инфляциянть каршо эрявикс лездамопрельтнень, конат сюлмазь ключевой ставканть марто;
• РФ-нь Правительстванть кой-кона отраслятнень кастоманть коряс аволь шкастонзо важодемань путомась.

Башка Президентэсь кортась Россиянь од регионтнэнь экономиканть лангс, тень пингстэ тешкстызе Луганскоень Раськень Республиксо пурназь налогтнень (касомась 90 %-с), Донецкоень Раськень Республикасо (79 %-с), Херсононь ды Запорожьянь ёнкстнэсэ (200 %-с).

СВО-со

Владимир Путин морской пехотань гвардиянь башка 155-це бригадань коцтонть марто (2024)

Специальной военной операциясо (СВО-со) молемань тевтнень ёвтамодо икеле Владимир Путин ёвтнесь, морской пехотань гвардиянь башка 155-це бригадань ушмантнэ максызь тензэ эсь боевой знамянть, ды вешсь невтемс сонзэ студиясо, арсесь цёратненень удаламо, изнямо ды парсте велявтомс кудов. Масторонь прявтонть валонзо коряс, эрьва чистэ ушмантнэ молить икелев фронть весе киксэнть эзга, таркатнень оляктомстыть «квадратонь вайгельбесэ». Курск ёнксонь эрицянть марто кортамсто, кона кевкстизе, зярдо Россиянь границатнень эйстэ шаштсызь Украинань вооружённой вийтнень (ВСУ-нть), Президентэсь мерсь, «цёратне воёвить, неень шкасто моли тюрема» ды ёвтась, «минь сынст тосто ёртысынек». Россиянь ветицясь тешкстась, Курск ёнкссо фронтонь весе киксэнть эйсэ тедеде тапазь техникань ламочись яжазь танкатнеде, БМП-де ды лия мезде 2023-це иень коряс седе ламо. Тень пингстэ Владимир Путин ёвтась, калавтозь гражданской ды социальной весе объекттнэ кармить вельмевтезь, кудост ды квартираст ёмавтыця эрицятненень кармить максозь эрямо таркань получамос сертификатт, тень лангс кучозь 108 миллиардт целковойть. Теде башка кортасть Херсононь ды Запорожьянь ёнкстнэнь, Луганской Раськень Республикань ды Донецкой Раськень Республикань вельмевтемадо. Истя, колмо иень перть неть регионтнэсэ тейсызь киланготнень, Азовонь иневеденть перька теить ниле киксэнь кольцевой киланго. Вельмевтезь социальной смустень ды эрямонь 20 тёжадо ламо объектт.

Владимир Путин виде линиянь ютавтома шкасто (2024)

Прездентэсь кортынзе СВО-со ушмантнэнь туртов боевой тевдеемань участникень статусонтькак. Контртерроритистической операциянь режимень (КТО-нь) участникень лем киненьгак максовомо а карми. Путин мерсь, асатыксэсь карми топавтозь паро ёнов, ды ушмантнэнень максови «весемесь, мезе эряви, ловсынек удалце числасо».

Владимир Путин пусть питне «Откерень шка» («Время героев») программань топавтомантень, конань пингстэ СВО-со улицятнень эйстэ анокстави кадрань резерва. Истят курсатнень теемась сась сонзэ мельс-превс Специальной военной операциясо улиця студенттнэнь марто вейсэнь вастомадо мейле. Президентэсь корты, ушмантнэнь ютксто эряви кочкамс истят ломанть, конат аравольть покш компаниятнень, муниципальной буетнень, министерстватнень, ведомстватнень прявтсо:

Кодамояк вейкеяк манявома тесэ арасель… Ламотне тердезь важодеме, бизнесэвгак понгить, эрьва кодамо тёкшонь кирдивийтнень юткскак понгить.

Владимир Теде башка Путин ёвтась, СВО-нь ушодомадо меленть-арсеманть эрявсь ушодомс седе икеле, анокстамс тенень, ды мерсь кода сонзэ полавтызь спецоперациянь колмо иетне:

Мон карминь седе аламо пеедькшнеме ды малав лоткинь пейдеме.

Стратегиянь зыянтомочисэ

НАТО-нть ёндо «Орешник» ракетань комлексэнь правтомадо западонь СМИ-тнень яволявтомадонть кортамсто Владимир Путин ёвтась мель ютавтомс варчамо:

Кадык Западонь мастортнэ ды Украинась кочкить Киевсэ тарка, пурнасызь тов Ракетатнень каршо коштонь весе систематнень (ПВО-тнень) минь тов вачкодтяно «Орешниксэ», а сынь кадык варчасызь сонзэ кундамс, ды варштасынек мезе карми.

Куншкань кувалмонь ракетанть (БРСД-нть) туртов истямо лементь максомсто Президентэсь мерсь: «Видьстэ меремс? А содан».

Раськеютконь тевтнесэ

Виде линиянь ютавтома шкасто Владимир Путин макссь каршо валт зярыя кевкстематнень лангс, конат сюлмазь раськеютконь тевтнень марто. Ёвтась, зярс эзь вастневе Башар Асад Сириянь Президентэнть марто сонзэ Московов самодонзо мейле, ды тешкстась, Сириясо Россиянть пельде аравтозь весе путовкстнэ топавтозь, секс мекс РФ-нь Вооружённой вийтне ульнесть тосо «террористэнь аноклавонь» тееманть каршо. «Россиясь эзинзе топавто СВО-со путовкстнэнь, ёмавты генералтнэнь, сон лавшомавтозь» NBC телекомпаниянь репортёронть валонзо лангс Президентэсь ёвтась, Россиясь, мекевланг, меельце иетнестэ виевгавтызе экономиканзо, суверенитетэнзэ, оборонань кирдеманзо:

Тынк ули меленк неемс Россиянть лавшомгавтозекс, ансяк мон арсян овсе лиякс.

Теде башка Путин кундызе Американь репортёронть валсо, зярдо Московсо Игорь Кириллов генералонть чавомазо лемдязель маштомань снартнемакс. Тесэ Президентэсь тешкстаксь, спецслужбатне «те вачкодьксэнть нолдызь». «Синьхуа» Китаень кулянь агентствань важодицясь вешсь Путинэнь максомс питне Россиянь Федерациянть ды Китаенть ютксо вейсэнь сюлмавоматненень. Путин мерсь, кавто мастортнэнь ютксо товаронь оборотось кассь 200 миллиардт долларт, инвестициянь теварсевкстнэде кармасть 600, кассь вейсэнь сюлмавомась регионь тёкшсояк:

Пек эрявиксэкс ловови минек региононь прявттнэнь китаень представительтнень марто вейсэнь важодемаськак. Иредстиця симемапельгак тосо ули, ансяк весемесь аламонь-аламонь.

Социальной политикасо

Россиянть туртов демомографиянь кевкстеманть Президентэсь тешкстызе сех талновтыцятнень ютксо, секс мекс чачтомась прась сех алкине тёкшос — 1,41 %-с, эйкакшонь чачтыця аватнень ламочись прась 30 %-с. Владимир Путин корты, чачоманть эряви кепетемс сех аламо 2,3 %-с. Государстванть пельде лездамонть коряс Президентэсь тешкстызе авань капиталонь программанть, кудораськень ипотекань программанть ды эйкакш марто кудораськетнень туртов ярмаконь вейкине пандоманть.

«Пек марявицякс» масторонь прявтось ёвтызе миграциянь политикань кевкстеманть. Президентэсь арси, мигранттнэнь покшолмаст аламолгавтомга эряви кететемс важодемань тевдееманть, тень пингстэ тевс эряви нолдамс од технологиянь ёнкстнэнь. Теде башка эряви стакалгавтомс вешематнень сетнень туртов, кить сакшныть важодеме Россияв, эряви кепетемс тонавтомань ёнксонть ды теемс истя, омбомасторонь эрицятне чарькодевлизь РФ-нь культурань башкачитнень, содавлизь келенть. Россиянь ветицясь тешкстась, кой-кодат эскелькст неть тевтнесэ теезь. Саемга, кемекстазь школав рузонь кельсэ кортыця эйкакштнень саемадо законось.

Шумбрачинь ванстомасо

Владимир Путин ёвтась каршо вал поликлиникасо важодицятнень а сатномадо Обран ошонь эрицянть пеняцямонзо лангс. Президентэнть валонзо коряс, сехте ламо лецицят а сатныть шумбрачинь ванстомань первичной ёнкссо, те тень лангс ванозь таркань кирдивийтнень икеле ашти путовкс тердемс од ломанть ды теке марто превейстэ явомс важодеманть. Теде башка виде линиянь ютавтома шкасто кортызь фармацевтикань промышленностенть ды эсь препаратонь тевдееманть.

Интернетсэ

Влад А4 блогонь ветицясь кевкстизе Владимир Путинэнь Россиясо Ютуб (YouTube) видеохостингенть састыньгавтоманзо. Масторонь прявтось ёвтась, «Гугл» («Google») компаниясь киртинзе Россиянь Федерациясо видеохостингенть марто сюлмазь предприятненень ярмаконь пандоманть, путсь техникань кучомань кардамот, мезесь ветясь сервисэнть важодемасо тапавоматненень.

Политикань ветицятнеде

Эфирэнь ютавтома шкасто Владимир Путин ёвтынзе мелензэ-арсеманзо Россиянь ды омбомасторонь политикань кой-кодат ветицятнеде. Истя, кинь марто симевель чайде, сон ледстизе Гельмут Колень:

Вастововлинь Коль канцлерэнть марто… те ульнесь политикань покштояк покш ветиця, конась пек ламо тейсь Германиянть туртов.

Кортась Владимир Жириновскиень икелепелев неемань-ёвтамонь валонзо ланга ды тевтнеде, конат сюлмазь Украинанть, Маласо Востоконть марто:

Сон вечксь гайтевстэ ды бойкасто кортамо, ансяк сон ульнесь пек превей ды анокстыця ломанекс. Секскак сонзэ икелепелев неематне-ёвтамотне топавтовкшность: сынь теезь алкуксонь ёрокчинть ды ды содамочитнень лангсо.

Байденэнь ланга, кона нолдызе Хантер эсь цёранзо чумочинть:

Свал улезэ истя, мезе тонь потсо седе ламо, политикась эли ломанекс улемась. Неяви, Байденэнь эйсэ седе ламо ломнекс улемась.

Борис Ельцинэнь ланга:

Ельцинэнь Западсо вечкилизь, ансяк кода сон кепетизе вайгелензэ Белградонть лангс бомбань кайсеманть кис, сонзэ мельга сеске ушодсть пансеме ды симицякс лемдямо.

Владимир Зеленскиень сыця шкадо:

Сонзэ сайсызь трямос сеть ломантне, конатнень мельга сон ней яки.

Президентэнть пельде пеедькшнема

Передачанть ютавтома шкасто ледстязель, эряви седе ламо кортамс Россиянь потсо стакачитнеде, Президентэсь ёвтнесь пеедькшнема:

Кудораськесь ашти тувор экшсэ. Цёрынесь кевкстни аванзо: «Кодамо вал ашти колмо буквасто кроссвордсо?». Ды сеске сонзэ вачкодить пенчсэ коня ланга. Теде мейле конянть ланга вачколеви нись мирденть пельде. «Кудо ланга эряви арсемс», — корты мирдесь.

Ваныцятне

«Mediascope» ванномань компаниясь пачтясь, «Владимир Путинэнь марто иень цётамотнень» ванызь малав 17 миллионт ваныцят. Тень пингстэ ваныцятнестэ (телепрограманть ваныця ломантне, конат, конат невтевить весементь ютксто процентсэ) весе каналтнэсэ кармасть 63,4 %. Трансляциянть рейтингесь (ваныця телепрограмманть ломантне, конат лововить весе эрицятнень эйстэ процентсэ) ульнесь 12,5 %. Программась невтевсь истят телеканалтнэсэ:

• Васенце канал;
• «Россия-1»;
• «Россия-24»;
• НТВ;
• «Соловьев Live»;
• «Мир»;
• «Ветеце канал»;
• РЕН ТВ.

Линиянть прядовомадо мейле мельть-арсемат

Дмитрий Чернышенко пачтясь, сеедьстэ эрицятнень пельде ламо пеняцямотне ванновсть сеске Правительствань координациянь куншкакуросо. Тешкстазель, тевс нолдазель ведомстватнень ютксо сюлмавомань лувось, конань пингстэ министратнень лездыцятне топавтсть истят кевкстемат:

• ламо эйкакшонь кудораськетненень авиаливтямотнень лангс максозь 50 % алкалгавтома (Виталий Савельев вице-премьерэсь макссь эрявикс кармавтомат Транспортонь министерствантень, 2025-це иень якшамковонь 14-це чистэ алкалгавтомась важоди 12 иес весе эйкакштнень туртов);
• банктнень кармавтсызь тевс нолдамо «кельмевтемань шканть» кредитэнь вешемань ды максомань шкасто (весемесь карми важодеме 50 тёжат целковойстэ саезь, шкась — 4 чассто саезь 2 чис);
• Михаил Мишустин Правительствань Прявтось тешкстынзе тевконёвтнень, конат максыть прават Курск ёнксонь идицятненень получамс ярмаконь секе пандоматнень, конат максовить СВО-со лия улицятнененьгак;
• ёвтазель льготань ипотека госпрамманть лувсо кардамонь арасьчитнеде;
• ёвтазь мель келейгавтомс кудораськень ипотеканть вторичной рынкасо;
• ёвтазь мель кастомс пекиямонь ды чачтомань коряс пандоматнень эрямонь минимумонть видьс (Антон Котяков РФ-нь важодемань ды социальной идемань министрась ёвтась, студенткатнень туртов пекиямонь ды чачтомань коряс пандоматне паряк кастовить 17 тёжат целковойс);
• ёвтазь мель ярмаконь аволь покш пандома марто кудораськетнень туртов кастомс социальной контрактонь улеманть-нолдамонть.

Текшкставкст