Гребенцов, Геннадий Сергеевич

Гребенцов, Геннадий Сергеевич

Гребенцов Геннадий Сергеевич, эрзянь содавикс сёрмадыця

Эрямозо

Геннадий Сергеевич Гребенцов чачсь 1957-це иень якшамковонь 2-це чистэ Покш Березник буень Бозаёв велесэ. Эсест велень школань кавксо класстнэнь прядомадо мейле тонавтнесь васня С. М. Киров лемсэ Ицялонь педучилищасо (1972–1976), мейле – Н. П. Огарёв лемсэ Мордовиянь государственной университетэнь филологиянь факультетсэ (1976–1981). 1981–1988-це иетнестэ важодсь Мордовиянь Гостелерадионь литературань-драмань редакциясо, мейле ульнесь «Пионерэнь вайгель» журналонь ответственной секретарекс, МАССР-нь Сёрмадыцянь вейсэндявксонь литконсультантокс, «Народное образование Республики Мордовия» журналонь прявт редакторокс. Ней сон А. И. Полежаевень музеень научной сотрудник.

Шкинемазо

Г. С. Гребенцовонь васенце сёрмадовксозо – «Казне» ёвтнемась – лиссь «Сятко» журналонь «Пионерэнь вайгель» путовкссонть 1976-це иестэ. Теде мейле ёвтнеманзо ды валморонзо сеедьстэ кармасть лиснеме «Эрзянь правдасо» ды «Сяткосо». Седе ламо сёрмадсь эйкакштненень. «Ёжов ур» ёвтнемань васенце книгазо лиссь 1981-це иестэ. Мейле нолдазельть «Стихсэ азбука» (1985), «Панжовкст» (1992), «Кодамо тюсонь ведесь?» (2005), «Веснушки» (2006), «Вирень лисьмапря — Лесной родник» (2013), «Нурька вастовома» (2014), «Чиньжарамот» (2015), «Эрясть-аштесть Бозаёвсо...» (2015), «Азбука в загадках» (2016), «Ёжов азбука» (2017), «Чавола верьгиз» (2017) ды лия книганзо. Теде башка, произведениянзо совасть зярыя вейсэнь пусмос, тонавтнема книгас, ламотне эйстэст ютавтозь рузонь, болгаронь, венгрань, удмуртонь, маринь ды лия кельтнес. Зярыя валморонзо лангс ладсесть музыка А. Аверкин, Н. Кошелева, Н. Митин, А. Пивкин, В. Кисляков, С. Терханов ды лия композитортнэ.

Г. С. Гребенцов – РФ-нь вейсэнь тонавтома лувонь почётонь важодиця (2012), Мордовия Республикань заслуженной поэт (2015), Покш Березник буень почётонь гражданин (2017), Эстониянь малавикс раськетнень программань премиянь лауреат (2019), Финнэнь-угрань сёрмадыцянь ассоциациянь премиянь лауреат (2019). 1992-це иестэ саезь Россиянь сёрмадыцянь вейсэндявкссо.