Даннойтнень экономика (раськень теварсевкс)

«Даннойтнень экономика» раськень теварсевкс
«Даннойтнень экономика» раськень теварсевксэнтень алтазь правительственной промкс (2023-це ие)
Ушодовома шкась	2024-це ие
Прядовома шкась	2030-це ие
Тувталось	Владимир Путин Россиянь Президентэнть кармавтомазо
Ярмаконь ютавтоматне	700 миллиардт целковойть
Сайтэсь	национальныепроекты.рф

«Да́ннойтнень эконо́мика» (руз. «Эконо́мика да́нных») — раськень теварсевкс, кона нолдазель тевс Владимир Путин Россиянь Президентэнть кармавтоманзо вельде. Васенцеде невтезель 2023-це иестэ «Ловомат ды сюлмавома. Квантовой мастор» (руз. «Вычисления и связь. Квантовый мир») форумсо. Теварсевксэнть топавтыть Цифровой кастомань министерствась, Экономикань кастомань министерствась, Финансонь министерствась ды «Цифровой экономика» автономной аволь коммерческой вейсэндявксось.

Учови, раськень теварсевксэсь лезды искусственной арсемасо ды компьютерной квантовой технологиятнесэ теемс масторонь суверенитетэнть. Теде башка теварсевксэсь аравтозь цифровой технологиятнень тевс нолдамсто социальной ды экономикань стакачитнень решамонть лангс. Теварсевксэнть топавтомас 2030-це иес явозь 700 миллиардт целковойть.

Квантовой покш кирнявтома

Владимир Путин ванны «Даннойтнень экономика» раськень теварсевксэнть кода эрямонь кастомань прявт лездамопель (2023-це ие)

2023-це иестэ «Ловомат ды сюлмавома. Квантовой мастор» форумсонть Владимир Путин васенцеде кортась «Даннойтнень экономика» раськень теварсевксэнть ланга ды путозель покш аравтома, кона сюлмазь «квантовой покш кирнявтоманть марто», конась теде икеле ютавтовсь СССР-сэ ХХ-це пингень колоньгеменце-ниленьгеменце иетнестэ: теемс покш эскелькс икелев масторонь эрямосо технологиянь, экономикань, тонавтомань ды тевветямонь ёнкссо. Масторонь Прявтось ёвтась, теварсевксэнть стратегиязо апак аравто покш цифровизациянть лангс, весемесь сюлмазь «овсе лия экономикань» тееманть ды масторсо эрямонь кастоманть марто:

Кортамось аволь ансяк цифровой экономикань, искусственной арсемань ды покш технологиянь проекттнэнь кастоманть вельде весе уликсчинть вейсэндямодо, конань ютксо квантовой технологиятнень кастомань коряс «мельтне-арсематне»… Эряви теемс ды эрьва ков тевс нолдамс од теевкстнэнь весе механизманть. Нама, те сюлмазь весе технологиятнень ды эрямонь ёнкстнэнь марто.

Теварсевксэнть топавтомсто Президентэсь аравтсь истят покш путовкст:

• паролгавтомс даннойтнень пурнамонь лувонть (квантовой высокочувствительной сенсоронь тевдеема, истят сенсортнэ максыть кастомс объектэнь позиционированиянь видечинть — спутникень ды наземной связень систематнесэ, теде башка тень вельде муевить икелень стадиятнесэ орматне — шумбрачинь ванстомань системасо);
• паролгавтомс неень шкасто даннойтнень максомань лувонть (те эряви промышленной робототехникань, пилоттомо транспортной систематнень, ошсо автоматизациянь ёнксонть туртов);
• теемс даннойтнень ловомга ды ванстомга суверенной инфраструктура (даннойтнень ванномань туртов облачной платформат ды центрат, сынь эрявить государственной органтнэнь, предприятиятнень, связень оператортнэнь парсте важодеманть кис);
• теемс ды нолдамс компьютерт квантовой ды фотонной технологиятнень лангс нежедезь;
• паролгавтомс зыянтомочинь даннойтнень систематнень (квантовой сюлмавомат ды квантовой шифровамо);
• теемс раськень стандартт ды протоколонь даннойтнень марто важодема;
• теемс пурнамонь ды алгоритмань ванномань даннойть (тей совавтовить искусственной арсемань коряс решениятне ды теке марто отечественной программной обеспечениясь);
• теемс кодонь ванстома тарка (Россиясто ды омбомастортнэстэ программистнэнь сервистнэнь парсте важодеманть туртов).

Раськень теварсевксэнь весе ёнкстнэнь ды технологической перспективной стартапонь туртов ярмаконь явомань лездамсто прявт инвесторокс ашти государствась. Эльдар Муртазин «Mobile Research Group» компаниянь ведущей аналитикесь тешкстась, цифровой кастомань коряс Россиясь кеместэ сови вете сех вадря мастортнэнь юткс (2024-це иень даннойтнень коряс), ды ёвтась, раськень теваревксэнь прявт аравтоматнень эйстэ вейкекс ловови аволь лия мастортнэнь марто технологической чиемась, прявт ёнксось — эсь регионтнэсэ «цифровой вейкетьксчи»:

Ярмактне, конат явовить, максыть теемс те эли тона тевсэ покш кирнявтома икелев. Арсемась пек шожда: те ёнкс, кона лезды касомс. Течи моли цифровой аволь вейкетьксчи, бути варштамс Московонть ды лия регионтнэнь лангс. Ды бути минь сайтяно седе покшсто, Россиянть ды весе масторонть, минек удалов кадовома кодамояк арась.

Технологической суверенитет

Руслан Юнусов Россиянь квантовой куншкакуронь теицятнестэ вейкесь, Владимир Путин ды Алексей Лихачёв «Росатом» атомной энергиянь коряс Государственной корпорациянь генеральной прявтось (2023-це ие)

Сеть покш тевтнень ланга, конат аштить теварсевксэнть топавтомсто Россиянь инженертнэнь ды содыйтнень икеле, аламодо лия ёндо весть ёвтась Алексей Лихачёв «Росатомонь» прявтось. Коопорациянь ветицясь ве таркас аравтынзе квантовой компьютерэнь тееманть ды советской ядерной васенце бомбань тееманть, вейкентькак, омбоцентькак теизь «чаво таркасто» ды те пек эрявсь масторонь суверенитетэнь тееманть туртов:

Зярдо тонь тердить Правительствав ды кортыть, колмо-ниле иень перть... невтемс цётамотнень, конат зярс ачарькодевить, технологият арасть, ансяк тонь мельга кармить ваномо Правительствась ды Наукань академиясь. Тень пингстэ, нама, оймесэ сеске чачи Лаврентий Павлович Бериянь образось, те ломанесь ветясь атомной отраслянь важодеманть теевемань шкасто саезь, ды ули мель, нама, а правтомс визьксэс верев кепедезь Советской Союзонь ды Россиянь атомной промышленностенть. Вана истямо, нама, ёжомарямонь пельксэсь.

Отечественной квантовой компьютерэсь теевкшневсь башка лабораториясо «Росатомонь» вановтонзо ало. Илья Семериков эсензэ койсэ поладызе Алексей Лихачёвонь арсеманзо, ёвтнесь, кода юты важодемась ды важоди сонсь физикесь, Илья Заливако ды Саша Борисенко важодема ялганзо — эсь мелень коряс важодицятне од лувсо теезь шарашкасо. Истямо карадо-каршо аравтомась овсе а стяко, секс мекс Констукторонь сеть бюротнесэ, косо важодсть Туполев, Королёв, Термен ульнесь теезьгак покштояк покш кирнявтома икелев авиастроениясо, двигателестроениясо ды ракетостроениясо. 2023-це иестэ Илья Семериков ёвтнесь Форумсо сыця шкань технологиятнеде, квантовой ионной процессоронть лангсо важодемстэ ютавтсь ламо шка лабораториясо ды аламо шка кудораськензэ марто:

Илья Семериков ёвтнесь Владимир Путиннэнь седе, мейсэ эри лабораториясь (2023-це ие)

Се шкастонть саезь косо-бути колмо иетнень перть минь важодтяно лабораториясо – субутатнестэ, таргочитнестэ, пондельниктнестэ. Мезесь тенек лезды, зярдо Россиянь наукань академиянь А. П. Лебедев лемсэ физической институтось (ФИАН-ось) пекстневи комськолмово чассто. Бути те аволь уле, минь тосо удовлинекак.

Квантовой компьютерэнь прототипенть пурнамодо икеле Илья Семериковнень эрявсь пурнамс лия ёнов а молиця пек превей ломанть. 2023-це иестэ интервьюсо кортамсто сон ёвтнесь, тень лангс ютавтозь малав кемень иеть. Инженерэсь корты, кемень иеть кармить эрявомо весе мельтнень-арсематнень топавтоманть лангс:

Минек пек кенярдовты ды кепети ёжонок, зярдо сон [квантовой компьютерэсь - тешкс.] теи кодат-бути лезэв тевть, конатне аволь сеске сонзэ пельде молить, лиякс меремс, сон теи молекулань модельть, ды а теи наукань кодамояк абстракция. Минек туртов те пек эрявикс тев. Нама, минек меленек-арсеманок – теемс квантовой лезэв компьютер. Теемс квантовой истямо компьютер, кона решаволь задачат суперкомпьютердэнть эйстэ седеяк бойкасто, конась улевель пек лезэвекс ламо ломантнень туртов.

Цифровой экономиканть коряс апелематне

«Даннойтнень экономика» раськень теварсевксэнь топавтома шкасто Экономикань кастомань министерствантень ды Трудонь министерствантень максозь кармавтома эрьва иестэ ютавтнемс важодемань тевтнень коряс домка ваннома апелематненень питнень путомга, конат сюлмазь искусственной арсематнень ды тевс нолдамонь технологиятнень, Россиясо сынст коряс важодеманть марто.

Тешкставкст