Живоначальной Троицянь Собор (Краснослободск)

Православной храм
Живоначальной Троицянь Собор
Соборонь одов строязь здания
54°25′07″ с. ш. 43°47′38″ в. д.
Масторось	Россия Россия
Аштема таркась	Краснослободск ош, Советской площадь, 6-це кудо
Конфессиясь	Православия
Архитектурань стилесь	Рузонь
Проектэнь авторось	Елецкий (покш витема 1866-це иестэ)
Васенце ледстнемась	1613-це иестэ
Зярдо стявтозель	1781-це иестэ
Зярдо пекставсь	1930-це иестэ
Приделтнэ	Казанской, Трёхсвятской
Статусось	ОКН № 1300706000
Состояниясь	Строязь цехекс

Живонача́льной Тро́ицянь Собо́р (Тро́ицкой собо́р) (руз. Собо́р Тро́ицы Живонача́льной (Тро́ицкий собо́р)) — Краснослободск ошонь ёмавтозь прявт храм. Аштесь Соборной площадьсэ.

Соборонть ланга

Соборонь васенце ознома кудось ульнесь чувтонь. Мзярда сон путфоль кивок аф содасы, но улихть тяфтама арьсемат, што церькавсь строявсь ошпандонть марто марса. Строямань пингсь, улема, XVII-це пингень ушодкссто. Краеведсь священниксь И. Беляев няфти Фёдор Малоень «Писцовай книганц» лангс. Троицкяй соборть путомань пингонц коряс ули нинге фкя ингольдень валхнень кемокстайсна: «1613—1614-це иетнестэ строяфоль Троицкяй церкавсь» — сёрматфкс типиконсо, коса тяштьфоль: «иняруяфтфоль Троицкяй храмсь».

1655—1682-це иетнестэ вакссозонза строяфоль Ильинскяй церькавсь. Сон ульсь соборть видеса лямбе церькавкс. 1763-це иестэ, Тамбовонь Духовнай консисториять указонц коряс тя приделсь явфтфоль соборть эзда «теенза максфоль башка приход». Сяльде, сяс мес ульсь кржа вастта, Ильинскяй церькавть лихтезь ваксарошста (сонь эздонза пингонь ётазь лиссь Благовещенскяй церькавсь). Ильинскяй церькавть вастс 1765-це иестэ соборть видес воеводать мярьгоманц коряс строяфоль шуфтонь од лямбе церькав Эрекшинь канды лихтибрять Шкаень Тядять лемса.

1778—1781-це иетнестэ мийсь-рамайсь, заводонь азорсь Андрей Тарасович Миляков строясь эсь ярмаконзон лангс кевонь соборнай церькав, кона ащи 10 селень ваксса ингольдень церькавть эзда. Мзярда строявсь соборсь, шуфтонь церькафне шамсть ды 1790-це иестэ синь калафтозь. Троицкяйть мизь Селищи велев, а Эрекшинь канды лихтибрянь церькавть мизь Троиц ошень калмолангс. Мзярда аделавсь соборть строямац «Краснослободскяень Спасскяй монастырть оцюнянцты Досифей иеромонахти мярькфоль иняруяфтомс соборть видеса кевста строяф кафта придел мархта церькавть». Тя храмть строямаса Миляков няфтезе эсь оцю кемаманц и эстетикаса шарьхкодеманц. Соборнай церькавть сон кадозе мялямгевкс эсь юмси-арси фамилиянцты (шачендсть аньцек стирнят).

Соборть аф весть стройсезь одукс. 1917-це иестэ оцю толда меле, мзярда палсь пцтай марнек ошсь, одукс тиезь церькавть куполонц, калафтозь ингольдень пайгонь кудть ды путсть од. 1829-це иестэ пякстазь кафта приделхнень, улема, мес алтарьса кржаль вастта, и тяфта оцюлгофтозь соборть. Тя полафтоматнень мельге соборсь 80 кизот ащесь тяфтак, апак петнек. Ошень эряйхнень мялезостоль церькавсь и шнакшнезь сонь: «Эрек ушетксонь Троицань церькавсь» пределонзон мархта тялькфтай приходонь лама ломань, аф кальдявста мазоптф".

1862—1866-це иетнестэ соборось одкстоптфоль, петьфоль рузонь стильсэ, карьхцне стясть 12183 цалковайс 75 трёшникс. 1875-це иестэ ташта пайгонь кудть калафнезь алдонь ярусть самс и строясть кафта од яруст, путсть частт, а 1881-це иестэ валфоль 500 пудонь таргай пайге.

XIX-це пингень пенцты соборсь ульсь кувака (20 сель кувалмоц и 12 келец), кевонь, фкя этажень, сери поталак мархта зданиякс, кона строяфоль греконь крёс лаца, оцю ярхцама вастонь мархта и сери пойгонь куд мархта, кона ащесь шурьхкяпря лаца ащи купол ала. «Стенатне марнек марафт кирпицса, сотфт кшниса». Вельхксоц дуга мархта, кудбряц кафта ширдень, вельхтяф кшнинь листста. Кудбряса 5 прят, эрть эса шуфтонь жестьса чакаф крёз; пайгонь кудть пряса кшнинь зрняса валф крёс. Троицкяй соборда башка «кшнинь заводонь азорхне» Милякофне путсть ошса кевонь церькафт: Покровскяйть, Благовещенскяйть, Смоленскяйть и Владимирскяйть, а Краснослободскоень уездсэ — Ефаевань (1772-це ие), Аракчеевскяйть (1767-це ие). Троицкяй соборть ваксса ащесть Благовещенскяйсь и Смоленскяй церькафне. Тя архитектурнай мазы куттне мазопнезь ошть Прама и Мокша леенть пельде.

1917-це иень революцияда меле ошень сембе церькафнень калафтозь коммунисттне. Троицкяй соборсь, кона сёлкфоль 1930-це иетнень, ванфтовсь фкя этажень кудкс, коза 1950-це иестэ ладязь кштирдемань-кодамань фабрикать цехонц. Кудть строязь одукс, лятф фрескатнень архтозь извёсткаса и краскаса.

Краснослободскоень лия ознома кудотне

• Благовещениянь ознома кудо

Благовещенскяйть колга содаф аф лама. Сон строяфоль Ильинскяй церькавть вастс, кона путфоль 1655-це ды 1682-це иетнень ютксо. XVIII-це векть кучказонза Ильинскяй церькавсь ашель башка церькавкс. «Тя ульсь лямбе церькавкс [Троицкяй] соборть видеса, …сонь ашель башка пайгонь кудоц…». Сяльде сон сявфоль ваксарошсть потмоста и путфоль сонь стенанзон ваксс. Кирпицень церькав классицизмань стильса, кона строяфоль 1832-це иестэ Троицкяй соборть эзда кельме и шинь валгома шири. Фкя купол мархта храмть ульсь ярхцама вастоц и колма ярусонь пайгонь кудоц, конань вельхксса стяфтфоль шпиль. Ярхцама вастса Михаило-Архангельскяй и Ильинскяй приделхне.

Благовещенскяй церькавсь калафтфоль 1935-це иестэ. Сонь эздонза лядсь аньцек пайгонь кудсь, конань эзда тисть парашютнай вышка. И мзярда ирецта инструкторсь, комотемок прястонза, шавовсь, срафтозь и пайгонь кудтьке. Пингонь ётазь вастонц лангс строявсь «Восход» кинотеатрась. 2000-це иетнестэ советскяй постройкать (кинотеатрать) сёлгозь, а кудсь пингонь ётазь таштомсь и каладсь.

Сон ащесь алдонь базаронь площадть кельме и шинь валгомань ширень ужесонза. Церькавсь путфоль Иоанн-Предтеченскяй алянь монастырть вастс, кона пякстафоль 1764-це иестэ, и кона ащесь Краснослободскяй ваксарошть руз. (крепость) кельме ширдень стенанц ваксса. Монастырьса ульсь кафта церькафт: Иоанн Предтечень иняру пророкть лемса и Шкаень Тядять лемса. Иоанн Предтечиень церькавсь ульсь шуфтонь, фкя престол мархта. Сонь строяманц колга содаф, што «сонь путомац ушедовсь фкя пингоня, мзярда ушедсь пуроптовома монастырсь…патриархть Адрианть кагодсонза кемокстаф и монастырть путомац, и сяка кагодса максф бславама церькавонь строяманди». Строяфоль сон 1699-це иеде аф сяда меле, а аделафоль стройкась 1701-це иестэ. Тя кемокстаф 1701-це иень якшамковонь 31-це чистэ сёрматф указса, коса корхтафоль: «мярькф тейне, Иосиф архимандритти, иняруяфтомс Предтечень монастырть церькавонц и эста иняруяфтыне сонь». Омбоце церькавсь — Шкаень Тядять — ушетфоль 1709-це иестэ. Сонь колганза улихть тяфтама сёрматфт: «нинге 1709-це иень 18-це чистэ Великай Оцязорть указонц коряс максфоль бславама Рязанень и Муромонь Митрополитть Инярудонга Иняру Стефонть эзда… путомс церькав Шкаень Тядять лемса». Тя шуфтонь кафта церькафне валом-валом таштолготкшнесть.

Мзярда монастырсь нолдафоль, церькавсь арась приходкс. Мишендись-рамсись Миляков Андрей Тарасович макссь ярмак ды 1772-це иестэ ташта церькавть вастс путфоль кевонь од храм, кона васенце кизотнень лемневсь Иоанн Кстиндайть лемса. 1777-це иестэ сявомок теенза максови омбоце лемсь — Смоленскяй. Тя лемсь максфоль Шкаень тядять Смоленскяй шкайликонянц лемса. Кевонь кельме храмсь лемтьфоль Шкаень Тядяти. Сонь лемозонза престолть тиезь инь оцюкс, а Иоанна-Предтеченнеть — омбоцекс, приделса. Церькавсь кагод коряс лемневсь Смоленскяйкс, а ломаттне сонь лемнезь Предтеченскяйкс. Кирпицень церькавсь 1772-це иестэ зданиять юрозонза, конань строязе мишендись-рамсись А. Т. Миляков, строяфоль одукс 1849-це иестэ. Фкя купол мархта храмсь, конань пряса шурьхкя пря лаца купол, ярхцама васта и пайгонь куд мархта, конатнень пряса стане жа шурьхкя пря лаца купол. 1893-це иестэ церькавть перьф путфоль кевонь перяфкс кшнинь решётка мархта. Ярхцама вастса Иоанн Предтечень приделоц, Лука Евангелистонь ды вмч. Варварань. Срафтфоль-калафтфоль XX-це сяда кизотнень кучкаста.

Кирпицень церькав, кона строяфоль XIX—XX-це векнень ёткса 1770-це иень кевонь кудть вастс. Фкя купол мархта храм, планца виде ужа мархта, сонь видесонза колма ярус мархта пайгонь куд. Ярхцама вастса ульсть приделхт Покравонь и Алексиень Шкаень ломанть лемса. Инколи сон ащесь Покравонь авань монастырьса (монастырсь ащесь Краснослободскяень ваксарошть шивалгомань ширень стенанзон ваксса, коса тяни Севастьяновонь кудонза-пирьфонза) и ульсь, кода и монастырть сембе кудонза, шуфтонь. Строямань пингонц ули кода содамс сёрматфть коряс, кона тифоль приходской Покравонь церькавть типиконзонза: «пуроптомань кизоц сёрматфса 1672-цесь, а церькавть иняруяфтома кизоц — 1675-цесь». Церькавсь ульсь кафта престолонь — Шкаень Тядянь Покравонь и Николай Чудотворецонь. Монастырть нолдамдонза меле 1764-це иестэ церькавсь арась приходскойкс и теенза «ульсь сёрматф Ильинскяй церькавть эзда 69 десятинат и Николаевскяйть эзда 9 десятинат». Таштомдонза меле сон ётафтфоль лия вастс (тоза, коса тяни ащи РОВД-сь) ды мишендить-рамайть Миляковонь ярмаконзон лангс одукс строявсь кевста.

• Владимирэнь ознома кудо

Владимирскяй церькавсь ащесь ошень Владимирскяй (Карьгинскяй) площадьса. 1680-це иестэ тя вастса путфоль омбоце приходской церькавсь Николай Чудотворецень лемса. Церькавонь путомс ярмакне кочкафтольхть тяфта: «пушкарьхне и сокайхне-видихнемВаська Гусев и Сидорка Григорьев эняльдьсть мярьгомс строямс церькав». Пингонь ётазь шуфтонь церькавсь таштомсь ды 1762-це иестэ промышленникне Милякофне шуфтонь кафта церькафнень вастс Николаевскяйть и Владимирскяйть, кона ульсь Карьгаса, строясть кевонь фкя церькав Владимирскяй Шкаень Тядять лемса, конань ульсь приделоц Николай Чудотворецень лемса. Кирпицень церькавть келептезь XIX-це пингень васенце пяльксстонза, ульсть приделхт Никольскяй и Всехсвятскяй. Калафтф XX-це пингень кучкастонза, тяни ся вастса ащихть автовокзалсь ды ГИБДД-сь. Кодамоль ланга тя церькавсь аф содаф, ванфтовсь аньцек фкя фотография, коса ичкозде няеви тя церькавть куполоц, но сонць кяшфоль куттнень мархта.

• Успениянь ознома кудо (вант Краснослободскоень Успениянь авань монастыренть)

Строяфоль рамсить-пишендить меценатть А. Д. Муромцевонь ярмаконзон лангс 1810−1816-це иетнестэ. Успенскяй церькавсь ульсь приходскойкс 1861-це иентень самс (кагод коряс Успенскяй авань монастырть панжема кизоц).

• Петропавловской ознома кудо

Карафть ваксса, Малая Саранскоень ульцять песа, ащесь калмолангонь Петропавловскяй ёмла церькавнясь. Сонь колганза содаф прокс кржа, сонь тевоц сотфоль ризфса, сяс лама коса сон лемневи кода «калмолангонь» и лятфневи, мзярда 1817-це иестэ лиссь оцю пожар, мзярда «Соборнай, Покровскяй, Благовещенскяй и Смоленскяй церькафне мянцть толда, но калмолангонь шуфтонь церькавнясь палсь педа-пес …». Пожарда меле мишендить-рамсить А. Д. Муромцевонь ярмаконзон лангс сон кантфоль сай пингонь Успенскяй монастырти. Улема, архитектурань пяльде сон ульсь аф шта ни кодама и сяс сяда мельдень каготтнень эса аф лятфневи. XX-це пингень ушетксста калмолангса кельме ширде Успенскяй монастырть ваксса строяфоль рузонь стильса фкя пря мархта кирпицень церькав. Калафтфоль XX-це пингень куншкасто.

• Скорбященской ознома кудо (Весе ризныцятнень кенярдовтомга Пазонь авань пазавань ознома кудо)

(руз. Церковь иконы Божией матери Всех скорбящих радость)

Кудонь храм ошень тюрьмань замкаса, кона ащесь леенть вакссо. Фкя пря мархта четверик, лямбе и шинь стямань ширде петфтафоль пякстамгудонь корпусти. Тя кудсь строяфоль императорть I-це Николаень мярьгоманц коряс XIX-це пингень 30-це иетнестэ. Кармай эльбятьксокс арьсемс, бта императорсь шарфтсь башка мяль уездонь ошти, сяс мес тя пингть сембе уездонь ошнень эса, коса улихть пякстамгудонь замкат, стройсевсть тяфтама церькафт. Калафтфоль XX-це векть кучкаста.

1917-це иень революциядо мейле

Ревлюцияда меле ламошка куттне срафтфтольхть-калафтфтольхть. Церькафнень тевсна кальдяфтольхть: синь марнек юмафтфольхть-арафтфольхть. Ся васттнень эса, коса синь ащесть, аш кодамовок лятфнембяль синь колгаст. Тяда башка, ся пингонь ломаттнень мяльсноль аф аньцек калафтомс церькафнень, но и нардамс мялямть синь колгаст. Кодамовок оцю исследования тя аймаконь монастырьхнень и церькафнень колга ся пингть ашезь сёрматкшнев В. Б. Смирновать и Т. Н. Протасьевать работаснон башка. Косот архивонь ся каготтне, конатнень лангс няфнесть эсь работасост тяфтама содаф краеветтне, кода И. Беляев, Г. Петерсон, Н. Соколов, И. Голубинский, Шарьхкотьф, синь ашет ни. Синь эздост кой-конатнень юмафтозь-арафтозь.

Литература

• Соколов Н. М. Историко-статистическое описание Краснослободского Троицкого собора (1624—1894 г. г.) // Пензенские Епархиальные ведомости. — 1894. — № 17. — С. 788.
• Беляев И. Эпизоды из истории города Краснослободска и его уезда в XVIII столетии // Пензенские Епархиальные ведомости. — 1868.
• Лютов А. В. Церкви и монастыри Краснослободска // Красная Слобода. — 1993. — № 46,47,48,49.