Заповедникень раськеютконь чи
| Заповедникень раськеютконь чи | |
|---|---|
 Абиску раськень парк. Заполярьясо шведэнь раськень васенце парк | |
| Аравтозь | 2000-це иестэ Пертьпельксэнь ванстомань раськеютконь вейсэндявксонть мелензэ коряс |
| Тешкстави | эрьва иестэ |
| Тешкстамонь чись | Панжиковонь 24-це чистэ |
| Мезе марто сюлмазь | Швециясо 1909-це иестэ раськень парктнень тееманть марто |
Запове́дникень раськею́тконь чи (руз. Междунаро́дный день запове́дников) — покшчи, кона весе масторонть келес тешкстави эрьва иестэ панжиковонь 24-це чистэ Пертьпельксэнь ванстомань раськеютконь вейсэндявксонть мелензэ коряс. Профессиональной покшчитнестэ вейкесь сетнень туртов, кить ванстыть ды идить заповедниктнень.
Косто саевсь покшчись
1909-це иень панжиковонь 24-це чистэ Швециясо теезель раськень парк. Европасо те кармась васенце масторокс, косо появась раськень парконь ды резерватонь системась.
Заповедникень раськеютконь чись тешкстави 2000-це иестэ саезь эрьва иестэнть Пертьпельксэнь ванстомань раськеютконь вейсэндявксонть (МСОП-онть) мелензэ коряс. Прявт смустесь — ванстомс пертьпельксэнть ды идем ракшатнень[1][2].
Россиясо ули Заповедникень ды раськень парконь башка чи, кона тешкстави якшамковонь 11-це чистэ. Сон алтазь Баргузинэнь — масторсонть васенце заповедникень панжомантень.
Кода тешкстави
Те чистэнть парктнень ды заповедниктнень эйсэ панжить пертьпельксэнь ванстомань коряс тематикань невтемат, ютавтнить экскурсият, фестивальть ды мероприятият.
Заповедниктне
Заповедниктне — территориянь эли акваториянь пелькс, косо кардазь ломанень эрьва кодамо важодемась касовкстнэнь, ракшатнень, ведьпрамотнень, кезэрень кепотмартнэнь ды кевпандотнень ванстомаст кис[3].
Масторонть лангсо сех васенце заповедникесь панжозель Шри-Ланкасо минек эрадо икеле III-це пингестэ. Сестэ Деванампиятисса инязорось башка кармавтомасонзо ёвтась а сакшномс усиянь кой-кона таркатнес ды истя ванстомс неть таркатнень эсензэ ды раськетнень туртов[4].
Пертьпельксэнь ванстомань раськеютконь вейсэндявксонь даннойтнень коряс, 2024-це иестэ масторлангсо лововкшновсть раськень 6555 паркт ды пертьпельксэнь биосферань 630 заповедникть, конат аштить 119 масторсо[5].
Масторонть келес сехте покш заповедникесь ашти Африкасо. Истямо парксось вейсэндязь раськень колмо парктнень — ЮАР-со Крюгерэнь раськень парконть, Мозамбиксэ Лимпопо раськень парконть ды Зимбабвесэ Гонарежу раськень парконть вельде. Вейсэнь площадесь — 35 тёжат кавонзазь вайгельбеть[6]. Галичья Гора сех вишка заповедниктнестэ вейкесь ашти Россиясо. Парконть площадезэ ансяк 2,3 кавонзазь вайгельбеть[7].
Фотот
Серенгети. Танзаниянь пелеве ёнкссо раськень парк
Баргузинской заповедник. Россия (Бурятия)
Шри-Ланкань раськень парк
Вилпатту. Шри-Ланка. Масторонть лангсо сехте кезэрень заповедник
Лимпопо транснациональной парк. Масторонть эйсэ сехте покш
Тешкставкст
- ↑ 24 мая отмечается Международный день заповедников. gorodirkutsk.ru. Город Иркутск.РУ (22 Панжиковонь 2019). Дата обращения: 25 Чадыковонь 2025.
- ↑ Заповедный мир "Ненецкий", Русское географическое общество (24 Панжиков 2023). Ваннозь 25 Чадыковонь 2025.
- ↑ Что такое заповедник, и чем он отличается от заказника: примеры, Моя планета. Ваннозь 25 Чадыковонь 2025.
- ↑ Национальные парки Шри-Ланки. travellanka.ru. Дата обращения: 25 Чадыковонь 2025.
- ↑ Тамара Казарина. Заповедные места, ТАСС. Ваннозь 25 Чадыковонь 2025.
- ↑ В Африке создан крупнейший национальный парк, РИА Новости (11 Ацамков 2002). Ваннозь 25 Чадыковонь 2025.
- ↑ Международный день заповедников, Парламентская газета (24 Панжиков 2019). Ваннозь 25 Чадыковонь 2025.