И. М. Яушев лемсэ музыкальной театра

И. М. Яушев лемсэ музыкальной государственной театра
И. М. Яушев лемсэ музыкальной государственной театрась веть
Театрань типесь	музыкальной
Зярдо панжовсь	1935-це иень таштамковонь 1-це чистэ
Театранть зданиязо
Кодамо таркасо ашти	Россиясо Саран ошсо
Косо ашти	Б. Хмельницкиень куросо, 36-це кудосо
Ветицятне
Прявтось	Шарапов Владимир Иванович
Прявт дирижёрось	Акулов Максим Александрович
Прявт балетмейстерэсь	Выскубенко Юрий Сергеевич
Прявт хормейстерэсь	Евстифеева Светлана Раильевна
Прявт артыцясь	Фурсов Владимир Николаевич
Сайтэсь	muzteatr-saransk.ru
И. М. Яушев лемсэ музыкальной театра

И. М. Я́ушев ле́мсэ музыкáльной госудáрственной теáтра (руз. Госуда́рственный музыка́льный теа́тр и́мени И. М. Я́ушева) — Мордовия Республикань Саран прявтошсо музыкальной театра. Сонзэ репертуарсо опера ды балет, оперетта ды мюзикла (музыкальной комедия), эйкакштнень туртов спектаклят ды классической музыкань концертт.

Театранть историязо

Зярдо ушодызе важодеманзо

Театранть историязо ушодовсть 1935-це иень таштамковонь 1-це чистэ, зярдо театрась путозель Мордовиянь Автономной Советской Социалистической Республикань (МАССР-нь) свалшкань бюджетс. Секе иень сундерьковонь
28-це чистэ «Кажов студент» (руз. «Нищий студент») Карл Миллёкерэнь опереттань премьерасо труппась панжизе театрань эсь васенце сезононть. Театранть аволь весть полавтнизь статусонзо ды официальной лемензэ, профессиональной вешематнень ды аравтоматнень.

Башка таркасо музыкальной театранть историясо ашти Оперань ды балетэнь театракс улемась, кона ульнесь Саран ошсо 1937-це иестэ саезь 1948-це иес (важодемасо кой-кона лоткавтоматнень марто Ине Отечественной войнань шкасто). Се шкасто труппанть юрсо ульнесть масторонь эрьва кодамо ошсто артисттнэ — те ёроков морыцят, конатнень ламо содамочист ды музыкань эрьва кодамо ёндонь тонавтомаст. Ялатеке башка мель ды покш тарка явовсь эрзянь ды мокшонь раськень од морыцятнень искусствантень. Сех вадрятнень ютксо ульнесь Илларион Яушев — ёроков музыкантось, П. И. Чайковский лемсэ Московонь консерваториянь прядыцясь.

1969-це иестэ те театрастонть теезельть кавто театрат: Эрзянь ды мокшонь драмань государственной театра ды Музыкальной комедиянь театра.

Постсоветской шка

1992-це иень ожоковонь 30-це чистэ шкинемань коллективесь ушодызе эсь эрямосо од пельксэнть кода музыкальной театра. «Травиата» Джузеппе Вердинь оперань коряс васенце спектаклясь пек вечкевсь ваныцятненень ды невтизе, аволь ламо ломаньстэ пурназь ёроков солистэнь труппась маштсь путомо классикань сехте стака операт.

2010-це иестэ ютась «Пингетне вейсэндявкс казсть тенек» (руз. «Века нам братство подарили») гала-концерт, кона алтазель
И. М. Яушев лемсэ музыкальной государственной театрань панжомсто 75 иетненень ды ютась сеть мероприятиятнень лувсо, конат алтазельть эрзятнень ды мокшотнень Россиянь государствасо лия раськетнень марто 1000 иень вейсэндявомантень.

2011-це иестэ ютавтозель «Браво!» классикань балетэнь раськеютконь васенце фестиваль, теде башка юбилейной 75-це иентень музыкальной театрантень максозель покш казне: мазый од здания. 2011-це иень таштамковсто театрань труппась ютась од зданияс, конань залозо кельгстякшнось 714 ломанть ды сценанть площадезэ 400 кавонзазь метрат. Театрань залонь акустиканть ды технической тевтнень марто важодсть Россиянь сех вадря специалисттнэ. Тень коряс ютавтозель ламо важодема репертуаронь спектаклятнень од сцена лангсо путоманть ды од постановкатнень нолдамонть марто. Зданиясонть теезель покштояк покш витема: икеле од театранть таркасо ульнесь Ошонь культурань куншкакуро, кона стявтозель советской шкасто кода Политикань просвещениянь кудо. Витемадо мейле театрань зданиясь моли мазый покш кудо ёнов, конасонть улить ниле этажт ды маласо стявтозь вейксэ этажт.

Неень шкасто музыкальной театрасо арась прявт режиссёр. Режиссёрокс-путыцякс ловови Александр Александрович Челышев.

Театрань историясо дататне

• 1935-це иестэ — Саран ошсо теезь Музыкальной комедиянь театра. Труппасонть малав 80 ломанть. Васенце невтемась — «Кажов студент» Карл Миллёкер Австриянь композиторонь невтемась.
• 1937-це иестэ — театрась теевсь Мордовиянь оперань ды балетэнь государственной театракс.
• 1941-це иестэ — оперань ды балетэнь театрась вейсэндязь драмань театранть ды моронь ды киштемань ансамблянть марто.
• 1943-це иестэ — невтезь П. Кирилловонь драманзо коряс «Литова» эрзянь ды мокшонь музыкально-эпической васенце спектакля.
• 1944-це иестэ — невтезь Л. П. Кирюковонь «Несмеян и Ламзурь» Мордовиясо васенце опера.
• 1959-це иестэ — театрась кармась Мордовиянь АССР-нь музыкально-драматической государственной театракс.
• 1969-це иестэ — музыкально-драматической театрась явозь кавто театрас: драмансес ды музыкальной комедияс (вейсэнь дирекция марто ды вейке зданиясо).
• 1992-це иестэ — музыкальной комедиянь театрась теевсь Мордовия Республикань музыкальной государственной театракс.
• 1994-це иестэ — театрантень максозь Илларион Максимович Яушев РСФСР-нь ды Мордовиянь АССР-нь раськень артистэнь, театрань ёроков солистэнь лемесь.

Тешкставкст

Ссылкат

• И. М. Яушев лемсэ музыкальной театранть официальной сайтэзэ
• Саран ошонь театратне
• Сынь казить кеняркс ломантненень
• Саранскойсэ седясь Валерий Гергиевень прявтсо Симфонической оркестрась
• Эрямонь тевесь – хормейстер
• Татьяна Дудникова: «Балеринань профессиясь лездась неемс модамасторонть»
• Культурась – минек сюпавчинек