Китаень 2025-це иень Од ие
Китаень 2025-це иень Од ие — покшчи, кона алтазь телень чипаень аштемадо мейле (лиякс меремс, ацамковонь 21-це чинь омбоце од ковдо мейле) телень од ковонь самонтень. Григорианонь ковкерькссэ те шкась пры якшамковонь 21-це чинть ды даволковонь 21-це чинть ютксо кодамо-бути вейке чинтень.
Китаень гороскопонть коряс эрьва иесь сюлмазь кемгавтово ракшатнестэ вейкенть ды пертьпельксэнь вете ёнкстнэстэ вейкенть марто: толонть, моданть, металлонть, веденть эли чувтонть[1].
Китаень ковкерьксэнть коряс 2025-це иесь ловови Чувтонь Пиже Гуень иекс. Весемесь ушодови 2025-це иень якшамковонь 29-це чистэ ды карми молеме 2026-це иень даволковонь 16-це чис. Чилисемань гороскопонь 12 иень цикласо те иесь ашти котоце таркасо.
Косто саевсь пошкчись
Китаень Од иень покшчинь тешкстамонть историязо лови ламо пингеть. Китаень ковкерькссэ те сех кувака ды эрявикс покшчи. Тешкстамонь кодамо-бути вейкине чизэ сонзэ арась. Иенть ушодовомазо савкшны телень чинь аштемадо мейле од ковонь омбоце самонтень, секскак покшчинть тешкстамозо ютавтневи якшамковонь 21-це ды даволковонь 21-це читнень ютксо.
Зодиаконь кемгавтово тешкстнэ — те 12 иестэ аштиця цикла, косо эрьва иесь сюлмазь кодамо-бути ракша марто. Китаень гороскопсо те криса, бука, тигра, нумоло, инегуй, гуй, алаша, сея, обезьган, атякш, киска, туво.
Китаень эрьва эрицясь содасы зодиаконь эсь тешксэнзэ, малавиксэнзэ ды ялганзо зодиаконь тешкстнэнь[2].
Китаень коень-кирдань культурасо неявикс пельксэкс улемстэ Китаень Од иесь нейгак кадови коень истямо покшчикс, кона максы оймамс важодеманть эйстэ ды теке марто кирди эсь потсо социокультурань домка смусть. Китайсэ ковонь ковкерьксэнть коряс Од иесь — те кудораськень вейсэндявомань, тетянь-авань ды покштянь-сырькаень туртов мелень ваномань чи[3].
Мезе марто сюлмазь Чувтонь Пиже Гуесь
2025-це иесь ловови Чувтонь Пиже Гуень иекс — сэтьмечинь вечкемань, превейчинь, пачк неемань ды полавтомас тонадомань прявт тешксэкс[4]. Гуесь а вечки кежень кирдема, берянень теема ды манчема. Кастоманть, кепетеманть ды одкстомтоманть лангс невтиця чувтось ловови те иень пертьпельксэнь прявт ёнксокс, а пиже тюсось — весементь мазылгавтома.
Чилисемань культурасо гуесь — паро обуця марто ракша. Ёзныця те ракшась кенярды эрямонтень ды мукшны парочи эрьва кодат ёнкстнэсэ. Эрямосонть гуесь эрси зыяновокс, ансяк пельдензэ каявоманть эряви учомс сестэ, бути сонзэ парсте савтомс кежензэ[5].
Ловови, Чувтонь Пиже Гуень иестэ чачозь ломантнень ули вементь лангс домка вановтост ды сынь маштыть топавтомс онкстазь мельть-арсемат. Сынь вадрясто чарькодить вакссо аштицятнень. Гуйтнень пек парсте кастозь оймесэ ёжомарямост, кона лезды тенст неемс икелев ды теемс паро тевть. Чувтось максы тенст шкинемань вийть, конат лездыть муемс лия ёнов а молиця арсемат. Пиже тюсось невти сэтьмечи, паро ёжо, эрьванть марто чарькодема.
Гуйтне шождасто тонадыть полавтоматненень ды муить од кить-янт икелест аравтозь путовкстнэнь топавтомга. Сынст ули пертьпельксэнь мазычист ды сынь маштыть парсте кортамо лия ломантнень марто. Те тешксэнть ало чачозтне сеедьстэ тейневить прявтокс ды покш ломанекс. Сынь покшкавтницят ды путовксонь топавтницят, эрямосо изнявксонть кис анокт вадрясто важодемс.
Тень пингстэ Гуйтне кекшницят ды арсить кирдемс мелест-арсемаст эсест потсо[6].
Чилисемань гороскопонть коряс зодиаконь лия тешкстнэнь марто сюлмавомат
Китаень зодиакось, кона теезь Вете Элементэнь теориянть лангс нежедезь, невти лув, конасонть эрьва тешксэсь совавты эсензэ эйс вете класст (чувто, тол, мода, металл, ведь), конат невтить весе предметтнэнь ды уликсчитнень виест ды ёжост. Неть сюлмавоматне лововить Менеленть-масторонть эйсэ весе эриксэнть вейсэнь коекс ды полавтомакс.
Те теориянть коряс Гуень тешксэсь сюлмави Гуень, Атякшонь ды Букань тешкстнэнь марто. Теке марто лиясто сон сюлмавкшны Инегуень, Обезьганонь, Крысань, Кискань, Тигрань, Алашань, Кудонумолонь ды Сеянь тешкстнэнь марто. Чарькодема а муи ансяк Тувонть марто.
Те иесь карми пек кенярксовокс Гуень, Инегуень ды Атякшонь иестэ чачозтнень туртов. Сынь невтьсызь весе ёрокчист, важодемаст, сынст карми изнямо ды ярмаконь касома. Изнямось сы весенень, кие сюлмазь шкинеманть эли арсемань важодеманть марто[7].
Койть-кирдат
Китайсэ Од иень вастовоманть марто сюлмазь ламо койть ды Од иень кемемат. Кезэрень коень коряс Од иеде икеле эряви прядомс кудонь весе тевтнень. Урядамонть эряви ушодомс совамосто саезь ды прядомс эрямо таркань куншкасо, мейле лездамонь весе кедьёнкстнэ вачкамат кекшевиця ужинес.
Тешкстамонь шкасто Китайсэ сех неявикс таркасо якстере тюсось — чипаень ды кенярксонь тюс.
Од иеде икеле кенкшпряс понгавтыть конёвонь вете кувака кикст, конат невтить «уцяскань вете ёнкст»: удаламо, мельванома, кувака эрямо, сюпавчи ды кеняркс[8].
Коень коряс Китайсэ Од иеде икеле эряви теемс шалт. Ули ёвтамо, конань коряс те шкасто эсь эрямо таркасто панезь кежей оймевийтне вешнить од таркат ды иень перть кудонь азортнэнень кандыть апарочи.
Од иень вастовомань прявт тешкстнэстэ вейкекс лововить эрьва кодамо формань мазылгавтозь фонартне. Сех вадрятне — ниле ды кото ужонь газонь валдонь максыцят, конат мазылгавтозь эрьва кодамо тюсонь коцтсо ды артовкссо. Китайсэ кузонть таркас цецянь гирляндасо ды фонариксэ мазылгавтыть Валдо Чувтонть.
Китайсэ Од иеде икеле венть лемдить «явовомадо мейле векс», секс мекс те ансяк кудораськень покшчи, конань бажить ютавтомс малавикстнэнь марто. Кудораськес весе совицятне нолдыть эсест ютксо чумонть[3].
Китайсэ башка мель путови од иень покшчинь чокшнень ярсамонтень, конань пингстэ весе кудораськесь пурнави ве тувор экшсэ. Тесэ таркатне кадозь кудораськень шкастонзо а кенерицятнень туртовгак.
Ули кемема, кода вастсак Од иенть, истя сон ютыяк. Секскак Китаень эрицятне ваныть покшчинь туворонть эрьва кодамо каванямосо пештямонть лангс. Од иень чокшнень ярсамосо улезт саразонь, калонь ярсамопельть ды «доуфу» — соянь топонь ярсамо, кона содави кода «тофу». Китаень кельсэ неть валтнэ малавиксстэ гайгить «уцяска» ды «сатовкс» валтнэнь марто.
Од иень покшчинь чокшнень ярсамось прядови «уцяскань ярмаконь» явшемасо. Покштне казить эйкакштненень ярмак марто якстере конвертт, конат, кода чарькодеви, весе од иенть перть кармить кандомо изнявкс. Покшчинь чокшнень ярсамодо мейле а мереви мадемс удомо эсь уцясканть а менстямга.
Китайсэ мереви макснемс кавто пельксстэ аштиця казнеть, конат невтить вейсэндявома ды кудораськесэ вечкема. А мереви казнемс част, сехте сеедьстэ сыре ломантненень, эли эйкакшонь налкшнеть ды оршамот сетнень туртов, кинь эйкакшонзо зярс эзть чачо. Коень коряс инжетне макснить азортнэнень од иень казнеть туемадо икеле, лиясто весементь кадныть салава[9].
Гуень иестэ чачозь содавикс ломанть
- Одри Хепбёрн,
- Андрей Миронов,
- Том Харди,
- Дмитрий Медведев,
- Канье Уэст,
- Джоан Роулинг,
- Дэниел Рэдклифф,
- Тейлор Свифт,
- Александр Масляков,
- Боб Дилан,
- Ким Чен Ир,
- Чарльз Дарвин,
- Пабло Пикассо,
- Авраам Линкольн,
- Грета Гарбо,
- Мухаммед Али,
- Индира Ганди,
- Людмила Зыкина,
- Александра Пахмутова,
- Махатма Ганди,
- Джон Кеннеди,
- Кристиан Диор,
- Франс Шуберт,
- Анри Матисс,
- Гюстав Флобер,
- Эдгар Аллан По,
- Грета Гарбо,
- Николай Коперник,
- Аристотель Онассис,
- Джакомо Казанова.
Тешкставкст
- ↑ Как встречать 2025 год, чтобы год был хорошим, Мой Санта (2024-це иень ожоковонь 13-це чи). Ваннозь 2024-це иень ожоковонь 13-це чистэ.
- ↑ Цзя Хуэйминь. Лунный календарь и знаки зодиака в повседневной культуре Китая . cyberleninka.ru. Манускрипт (2016). Дата обращения: 13 Сундерьковонь 2024.
- ↑ 3,0 3,1 Цзя Хуэйминь. Китайские новогодние праздники по лунному календарю в повседневной культуре современного Китая . cyberleninka.ru. Общество: философия, история, культура (2016). Дата обращения: 13 Сундерьковонь 2024.
- ↑ Козлова, Екатерина. Принесет удачу: каким будет 2025 год Зеленой Деревянной Змеи, Пятый канал (2024-це иень сундерьковонь 9-це чи). Ваннозь 2024-це иень сундерьковонь 13-це чистэ.
- ↑ Зеленая деревянная змея - символ 2025 года: что важно знать о главном символе, КП.ру. Ваннозь 2024-це иень сундерьковонь 13-це чистэ.
- ↑ Комарова, Валентина. Зеленая деревянная змея — символ 2025 года: что означает, характеристика символа, когда наступает, каким будет и как правильно встречать, Гороскопы Mail (2024-це иень умарьковонь 30-це чи). Ваннозь 2024-це иень сундерьковонь 30-це чистэ.
- ↑ Екатерина Стрелкова. Как встретить год Змеи 2025: что приготовить, во что нарядиться - Zoon.ru(руз.). zoon.ru. Дата обращения: 13 Сундерьковонь 2024.
- ↑ Евгения Григорьевна Белая. Новый год в Китае, Корее, Японии и России . cyberleninka.ru. Россия и АТР (2005). Дата обращения: 13 Сундерьковонь 2024.
- ↑ История и традиции празднования Китайского Нового года, РИА Новости (2014-це иень якшамковонь 31-це чи). Ваннозь 2024-це иень сундерьковонь 13-це чистэ.