Классонь ветиця
| Классонь ветиця | |
 | |
Косо ветяви тевесь |
педагогикасо, трямосо-кастомасо ды тонавтомасо |
|---|---|
Кла́ссонь ве́тиця (руз. Кла́ссный руководи́тель) — тонавтыця, кона вети тонавтомань ды аволь тонавтомань тев школасо эли училищасо вейке классонь тонавтницятнень туртов. Россиясо ушодксонь класстнэсэ классонь ветицянь тевтне путовить се тонавтыцянть лангс, кона вети те эли тона классонть, школань покш класстнэсэ эли училищатнесэ — предметэнь тонавтыцянть лангс, конась важоди те классонть/группасонть, тонавтнема таркань администрациянть мелензэ-арсеманзо коряс. Теде башка ламо мастортнэнь тонавтомань систематнесэ классонь ветицянь аравтомась кочкави тонавтыцятнень ютксто.
Косто весемесь саевсь
Россиясо классонь ветямонь институтось саи эсь ушодксонзо XIX-це пингестэ, зярдо тонавтнема таркатнесэ ульнесь комнатань мельга ваныцянь должностесь. 1813-це иестэ Раськень просвещениянь министерствась нолдась пансионатонь институттнэнь пингстэ комнатань мельга ваныцянь анокстамодо кармавтома, мельга ваныцятнень прявт тевекс ульнесь «весеме ёндо эйкакштнень обуцяст ды содамочист кастома ды масторонь идицятнень тонавтома». Комнатань мельга ваныцятненень вешематне ульнесть покшт — эрявсь улемс паронь невтицякс, содамс омбомасторонь кельтнень. Комнатань мельга ваныцятнень ды трявкстнэнь ульнесь вейке туворост, эйкакштнень мельга ваномсто комнататнесэ удость вейкень-вейкень, трявкстнэнь марто якасть тонавкстнэс, лездасть тонавкстнэнь марто, вансть ваньксчинть мельга. Ваномань смустекс ульнесь «келенть, койтнень ды танстенть мельга» ваномась, секс мекс тонавтницятненень эрявсь ветямс прянть кода рузонь дворянтнэнень.
Седе тов классонь ветицянь институтось полавтозель 1864-це иень Уставсо, кона тевс нолдась превспутыцянь институт, авань гимназиятнесэ ульнесть классонь ават. Классонь превспутыцятнень тевекс тееви аволь ваномань ёнксось (те важодемась юты классонь преспутыцянь лездыцянтень), васенце таркас лиси трямонь-кастомань ёнксось[1].
1930-це иестэ Социалистической Союзонь Советской Республикатнесэ (СССР-сэ) появась классонь групповодонь должность. Теде икеле группатнесэ трямонь-кастомань тевенть топавтсть тонавтыцятне. Классонь ветицянь должностесь Советской Союзсо тевс нолдазель Правительствань кармавтомасо 1934-це иестэ. Правительствань тевконёвсо классонь ветицядо лия кармавтомась тешкставсь 1960-це иестэ саезь. Седе тов классонь ветямонть коряс Тонавтомань министерствасо тевконёвтне тешкстазельть 1975-це иень методической сёрмасо, теде мейле 2001-це иестэ. 1990-це иетнестэ, зярдо тевс нолдазельть пионерэнь ды комсомолонь вейсэндявкстнэ, классонь ветицянь тевесь ламонь коряс ёмавтозель. Неень шкань Россиясо классонь ветицясь ловови сюлмавомань ёнксокс эйкакшонть ды эрьва кодамо предметэнь ветиця тонавтыцятнень, школанть ды тетятнень-аватнень, эйкакшонть ды вакссо полавтоматнень ютксо[2].
Европань мастортнэсэ классонь ветицянь институтось кассь теке койсэ. Германиясо (нем. Klassenlehrer), Франциясо (фр. professeur principal), Скандинавиянь мастортнэсэ (швед. Klasslärare) классонь ветицятне ламонь коряс топавтыть секе тевтнень, конатнень теить Россиясо важодема ялгаст. Американь Вейсэндязь Штаттнэсэ классонь ветицятне (англ. homeroom teacher) улить ансяк ушодксонь школасо, седе тов классонь ветицянь тевтнень эсест лангс саить куратортнэ, конат кемекстазь эрьва тонавтницянть мельга. Сынь максыть тонавтницятненень превспутомат предметэнь кочкамонь, расписаниянь, профориентациянь ды вузтнэсэ тонавтнемамань поладомань коряс[3]. Великобританиясо эрьва тонавтницянтень аравтозь тонавтыця (англ. tutor), кона ваны тонавтнемасо, спортсо ды школань эрямосо лия ёнкстнэнь мельга[4].
Прявт аравтоматне
Г. М. Коджаспировань ды А. Ю. Коджаспировань тонавтыцянь валкссо ёвтазь, классонь ветицясь (трицясь-кастыцясь) — те тонавтыця, конань важодемас совить эйкакшонь кастомасо паро условиянь теемась, сонзэ трямосо эрявикс полавтомань теемась, эйкакштнень эсест ютксо, тонавтыцятнень, тетятнень-аватнень марто стакачитнень лисемстэ лездамось, классонь коллективень анокстамось ды кастомась[5].
М. И. Рожковонь пособиясо «Классонь ветицянть» коряс весемесь ёвтави истя: классонь ветицясь — школасо тонавтыця, кона аноксты эйкакшонь эрямонть, витни лиятнень марто сюлмавоматнень ды школань эрямонь эсь классо вастневиця стака тевтнесэ ды психологиянь стакачитнесэ идиця[6].
Классонь ветицянь тевтнес совить:
- Классонь пурнамо ды кастома;
- Эйкакшонть кастомга психологонь-педагогонь паро условиянь теема, эрьва тонавтницянтень лездамо, эйкакшонть лия ёнов а молемань ванстома ды сонзэ эйсэ шкинемань панжома;
- Шумбра эрямонь ветямо;
- Классо трямонь-кастомань эрьва кодамо форматнень вельде системань анокстамо;
- Тонавтницятнень праваст ды интересэст ванстома;
- Тонавтницятнень марто системной важодемань анокстамо;
- Тонавтницятнень эсь ютковаст ды тонавтыцятнень марто сюлмавомань паролгавтома;
- Тонавтницятнень эйсэ паро мелень ды арсемань кастома;
- Тонавтницятнень эйсэ шкинемань ёнксонь анокстамо[7].
Топавтовиця тевтне
Классонь ветицянь покш тевтнес совить:
- Эйкакштнень тонавтнеманть, прянь ветямонть, школав якамонть мельга ванома;
- Тетятнень-аватнень марто сюлмавома — тетянь-авань промксонь ютавтнема;
- Стакачинь лисемстэ лездамо, седе тов стакачинь анолдамо, психологтненень, социальной важодицятненень ды правоохранительной органтнэнень пшкадема;
- Классонь часонь ютавтнема, косо теема кевкстематнень кортнема, официальной информациянь пачтямо, аволь классонь важодемань анокстамо;
- Аволь школань мероприятиянь ютавтомасо лездамо — классонь экскурсиянь анокстамо, музейс, театрас ды лия таркас якамо;
- Тевконёвонь ветямо, сонзэ списказо явовкшны ды ашти се школанть эйстэ, конасонть важоди тонавтыцясь[8].
Россиясо
Эрьва ковсто Россиянь тонавтыцятненень классонь ветямонть кис максови ярмаконь башка пандома. Россиянь Федерациянь Правительствась нолдась кармавтома, конань вельде 2024-це иень эйзюрковонь 1-це чистэ саезь классонь ветямонть кис 10 тёжат целковойть пандовить сеть таркатнесэ, косо эрицятнеде 100 тёжадо аламо, 5 тёжат целковойть оштнесэ, косо эрить 100 тёжадо ламо ломанть[9].
2020-це иестэ саезь эрьва ие ютавтневи Классонь ветицянь Весе Россиянь форум. Мероприятиянть аноксты РФ-нь просвещениянь министерствась Владимир Путин Президентэнть кармавтоманзо вельде. Форумонь программас совить тонавтомань, дискуссиянь ды культурань пелькстнэ. Кортыцякс ды экспертэкс тердевить сех вадря специалисттнэ. Тонавтыцятнень туртов те форумось ловови паро таркакс, косо эрьвась невтни эсь профессиональной содамочитнень[10].
Форумонь меморандумс совавтозь истят ёнкстнэ:
- Цифровой содамочись, кода неень шкань тонавтыцянть эрявикс вешема;
- Тонавтомань интернет-пространствань масторсо эйкакштнень зыянтомочи;
- Аволь тонавконь важодема, кода трямонь-кастомань покш вий;
- Классонь час — классонь ветицянть ды тонавтницятнень ютксо кортамонь эрявикс ёнкс;
- Классонь ветицянть тетятнень-аватнень марто ялгаксчинь сюлмавома — эйкакшонь кастомань тевсэ кеме юр[11].
Тешкставкст
- ↑ Е. В. Корябкина. Становление и развитие института классного руководства в России (руз.). cyberleninka.ru (2011). Дата обращения: 25 Таштамковонь 2025.
- ↑ Матвиевская Т.Н. История института классного руководства // Восьмое измерение : газета. — 2021. — 1 октябрь (№ 35). — С. 1.
- ↑ Среднее образование в Америке (руз.). www.iqconsultancy.ru. Дата обращения: 25 Таштамковонь 2025.
- ↑ Анастасия Карпенко. Роль тьютора в организации воспитательного процесса в школах Великобритании (руз.). 2konferentsia.ucoz.net (16 Даволковонь 2017). Дата обращения: 25 Таштамковонь 2025.
- ↑ Коджаспирова Г. М., Коджаспиров А.Ю. А.Ю. Педагогический словарь: Для студ. высш. и сред. пед. учеб. заведений.. — М.: Издательский центр «Академия», 2000. — С. 38 с.. — 176 с. с.
- ↑ Классный руководитель (руз.). sh-vadinskaya-r66.gosweb.gosuslugi.ru. Дата обращения: 25 Таштамковонь 2025.
- ↑ Об утверждении методических рекомендаций об осуществлении функций классного руководителя педагогическими работниками государственных общеобразовательных учреждений субъектов Российской Федерации и муниципальных ... (не нуждается в госрегистрации) от 03 февраля 2006 - docs.cntd.ru (руз.). docs.cntd.ru (3 Даволковонь 2016). Дата обращения: 25 Таштамковонь 2025.
- ↑ Классный руководитель в школе: кто это, зачем нужен, обязанности и права, роль в образовательном процессе (руз.). Lenta.RU. Дата обращения: 25 Таштамковонь 2025.
- ↑ Правительство утвердило постановления об увеличении размера выплат за классное руководство и кураторство (руз.). government.ru (10 Чадыковонь 2024). Дата обращения: 25 Таштамковонь 2025.
- ↑ Стартует прием заявок на V Форум классных руководителей (руз.). Минпросвещения России (27 Эйзюрковонь 2025). Дата обращения: 25 Таштамковонь 2025.
- ↑ Меморандум по итогам I Форума классных руководителей (руз.). vfkr.ru. Дата обращения: 25 Таштамковонь 2025.
Литература
- Классному руководителю: учеб.-метод. пособие / ред. М. И. Рожков. — Москва: Владос, 1999. — 280 с. — ISBN 5-691-00370-4.