Ключагин, Пётр Андреевич
Ключагин, Пётр Андреевич
Ключагин Пётр Андреевич, эрзянь содавикс сёрмадыця, учёной
Эрямозо
Пётр Андреевич Ключагин (сёрмалесь Пётр Андреев, Андрей Пизёл лемтнень алояк) чачсь 1936-це иень таштамковонь 18-це чистэ неень Мордовия Республикань Отяжбуе ёнксонь Кулязбуе эрзянь велесэ. Тонавтнесь Мордовиянь госуниверситетэнь историянь-филологиянь факультетсэ (1955–1960). 1966-це иестэ прядызе Ленинградонь высшей партийной школанть. 1961–1967-це иетнестэ важодсь «Эрзянь правда» кулялопань редакциясо литсотрудникекс, эсь корреспондентэкс, пропагандань ды агитациянь, велень хозяйствань отделтнэнь прявтокс. 1967–1970-це иетнестэ ульнесь «Лениногорская правда» кулялопань ответственной секретарекс ды «Хлебороб Приишимья» кулялопань редакторонь полавтыцякс (Казахонь ССР). 1970-це иестэ саезь эрямозо кеместэ сюлмавсь Н. П. Огарёв лемсэ МГУ-нь журналистикань кафедранть марто, косо ульнесь ассистентэкс, преподавателекс, ветий преподавателекс, доцентэкс. «Особенности формирования мордовской литературы (1917–1941)» кандидатонь диссертациянзо идизе 1983-це иестэ. Сёрмадсь наукань ды тонавтомань-методикань колоньгеменде ламо важодевкст. Кулось 2021-це иень умарьковонь 31-це чистэ.
Шкинемазо
П. А. Ключагинэнь шкинемань кизэ ушодовсь университетсэ тонавтнемстэ. Се шкане сынст факультетсэнть важодсь литературань кужо, конань ветясь эрзянь содавикс поэтэсь А. М. Моро. Литкужов сакшныцятне сеедьстэ ютавтнесть поэзиянь ды прозань чокшнеть, шкинемань пелькстамот. Весе те лездась ёрокчисэ казезь од ломанентень касомс алкуксонь сёрмадыцякс. П. Ключагинэнь васенце валморонзо лиссть «Эрзянь правда» кулялопасо 1957-це иестэ, «Цярахман» ёвтнемазо максозель «Сурань толт» журналсо (ней «Сятко») 1959-це иестэ. «Од пингес кить-янт» (1977), «Пирявкс» (1979), «Меельце кулят» (1990) ёвтнемань пусмосонзо сон невтизе прянзо паро юмористэкс ды сатирикекс, кецявтынзе ловныцятнень од темасо ды образсо. «Ожо цецят. Кстыйть» (1995) книгазо алтазь эйкакштненень. 1997-це иестэ Мордовиянь книгань издательствасо лиссь «Цёканька» ёвтнемань пусмозо. Мейле нолдазельть «Апак прядо моро» (2006), «Аниськат» (2010) ды «Кочказь произведеният / Избранные произведения» (2018) книганзо, конатнес совасть ёвтнеманзо, новелланзо, валморонзо ды ледстнеманзо.
П. А. Ключагин — Россиянь Сёрмадыцянь вейсэндявксос совиця (1991), Мордовия Республикань культурань заслуженной важодиця (1994), Мордовия Республикань Прявтонь премиянь лауреат (2008). Казезь СССР-нь Министрань Советэнть пингстэ Печатень коряс комитетэнь «Печатень отличник» тешкссэ (1970).