Кудонь тев
| Кудонь тев | |
|---|---|
 Тонавтницясь топавты кудонь тев | |
| Косо нолдави тевс | тонавтомасо |
Ку́донь тев эли ку́донь важоде́ма (руз. Дома́шнее зада́ние или дома́шняя рабо́та) (теке марто ДЗ эли ДР, «домашка») — тев, конань тонавтыцясь максы тонавтницятненень ськамозост аволь классо топавтомга. Истямо важодемась тевс нолдави ютазь материалонть, темань содамонть ды теде икеле ютазенть кемекстамга[1][2].
Косто саевсь кудонь тевесь
Кудонь тев марто тонавтомань васенце форматне ульнесть Кезэрень масторсо: Египетсэ, Грециясо ды Римсэ тонавтомась аштесь школасо уроконь ютавтомань ды кудонь тевень максоманть марто[1].
XVIII-це пингестэ Римень Иневанькс Империянь «раськень школатнесэ» тевс нолдтневсь классонь‑уроконь пшти лув, конас совавтневсть ськамозот теемань туртов важодематне; те лувось келейгадсь Европасо ды кемекстазель Россиясо. Западонь ванныцятне ловить, кудонь тевень неень шкань форманть паролгавтызе Хорас Манн американь реформаторось: сонзэ мелензэ-арсемензо коряс ХIХ-це пингень куншкасто Американь Вейсэндязь Штатонь школасо тонавтницятне ушодсть получамо кудосо топавтомань тевть[1][2].
XX-це пингестэ кудонь тевенть коряс кармасть ламо кортамо: США-со тонавтыцятне ловсть, тонавкстнэде башка эйкакштненень кудонь тевень макснемась вети шумбрачинь коламонтень, секскак вишка класстнэнь туртов кой-кона штаттнэ нурька шкас лоткавтызь кудонь тевень макснеманть. Масторлангонь омбоце войнадо мейле экономикань стакачитнень ды политикань талноматнень кис Америкасо школань тонавтницятнень кудонь тевест покшолгадокшнось, лиясто ламотне арсесть, кудонь тевесь колы шкинеманть, секскак те тевенть эряви аламолгавтомс. Критикань мельтнень-арсематнень лангс ванозь ХХI-це пингестэ США-сто школасо тонавтницятне кудонь тевенть лангс 1990-це иетнень коряс ютавтыть кавксть седе ламо шка (малав 4,5 част)[3]; тень пингстэ эрьва кодамо штатсо кудонь тевень покшолмась полавтневи, кой-кона штаттнэсэ кудонь тев а максневи[4][5].
Финляндиясо ды скандинавиянь ламо мастортнэсэ кудонь тевень покшолмась вишкине, ламось нежеди тонавкстнэнь качестванть ды критикань арсеманть лангс; эйкакштне ловныть ды тонавкстнэнь шкасто важодить теварсевкстнэнь лангсо. Японииясо кудонь тевесь сатышка, ансяк аравтозь ськамочинь ды практикань содамочитнень кастоманть лангс. Италиясь, Ирландиясь, Польшась ды Испаниясь совить мастортнэнь юткс, косо кудонь тевень топавтоманть лангс таргозонзо ютавтови 6 чассто саезь 10 часос. Малав истямо шка Китайсэ — тосо школасо тонавтницятне кудонь тевень топавтомадо башка важодить репетитортнэнь марто[4][5].
Россиясо
Кудонь тевде васенце ледстнематне кандовить XVII-це пингентень, зярдо Россиясо ушодсть теевеме училищатне. «Россиянь империянь раськень училищатненень уставонь» (1786-це иестэ) тевс нолдамонть марто Фёдор Янкович кемекстызе классонь-уроконь лувонть: кудонь тевесь кармась тонавтнема тевень свалшкань пельксэкс, ансяк сехте пек невтевсь кода механической тонавтома эли тонавтома. Истямо лувось ванстовкшновсь ХХ-це пингень ушодовомас, зярдо методисттнэ ушодсть полавтнеме тонавксонь лувонть; аламонь-аламонь кудонь тевтне кармасть ледстнемань туртов ды содамочинь тевс нолдамонь ёнксокс[6].
Постсоветской шкасто кудонь тевень кадновсь школань покш пельксэкс. XXI-це пингень ушодовомсто сон чарькодевсь кода материалонь кемекстамонь ды экзаментнэс анокстамонь ёнкс; электронной дневниктнень ды онлайн-платформатнень появамось полавтызе сонзэ форманть. Теке шкасто касокшность тевнеяк: зярыя предметэнь коряс ветеце ды котоце классонь тонавтницятне кудонь тевенть сеедьстэ топавтнесть кавто-колмо часонь перть, покш классонь тонавтницятне — седеяк куватьс[4][7].
2000-це иетнень ушодовомантень таго кармасть кортамо кудонь тевень эрявиксчиде. Тонавтыцятне ды общественной важодицятне тешкстасть, неень шкань технологиятне максыть топавтомс тевтнень аволь пек парсте, тень пингстэ тевс нолдыть текстэнь генератор. 2025-це иень умарьковсто Вячеслав Володин Государственной Думань Прявтось ёвтась, кудонь тевтнень а эряви макснемс «покш сталмонть кис» ды секс, мекс искусственной интеллектэнь кастоманть марто сынь теевить «шкань чаво ютавтомакс». Тень пингстэ тешкстась, ванномань ды шкинемань тевтне кастыть критикань арсеманть, секскак кевкстемась веши кортнема[8].
2025-це иень таштамковонь 1-це чистэ саезь ушодсть тевс нолдавомо Просвещениянь министерствань 704-це № кармавтомась, кона карды тонавтнемань сталмонть ды максы шка теемс кудонь тевенть школасо эрьва кодамо иень тонавтницятнень туртов. Истя, васенце классонь ды 2-3-це классонь тонавтницятненень кудонь тевенть мереви топавтомс вейке часос, 4-5-це классонь тонавтницятненень — кавто часос, 6-8-це — 2,5 часос, 9-11-це — 3,5 часос. Тевконёвось теезель Роспотребнадзоронть марто вейсэ[9].
Прявт аравтоматне
Тонавтомань методикатнень коряс кудонь тевтнень прявт аравтоматне — кемекстамс сень, мезесь ютазель тонавкссо, ледстямс ды ютамс «асатыкстнэнь». Истямо важодемась максы тонавтницятненень чарькодемс весементь лездамовтомо, вансты лия тематненень содамочитнень ды анокстамонть. Теде башка кудонь тевесь лезды тонавтыцянтень путомс питнеть сень коряс, кода парсте тонавтозь материалось, ды арсемс од важодема[1][10].
Лия ёнкстнэнь ютксо — мелень явомань, парсте чарькодемань ды темань ванномань кастома; школасо тонавтницясь касты анокстамонь содамочитнень ды шкань видестэ ютавтоманть[2]. Тонавтыцятнень мелест коряс, тень пингстэ критикань ды шкинемань арсемась кастови ванномань теварсевкстнэнь ды литературань ськамочинь ловноманть вельде[9]. Неень шкань технологиятнень пачк школасо тонавтницятненень мереви кочкамс вечкевикс лув (ловнома, видеонь ванома), мезесь лезды кирдемс мельсэ-превсэ эрьва кодамо ёндо информациянть марто содавиксэкс теевеманть. Теде башка ськамочинь важодемась лезды содамс эсь прянть: од ломантне седе парсте кармить чарькодеме мезе тенст эряви и тонадыть видестэ арсемс эсь шкань ютавтоманть[1].
Ирина Белых Госдумасо просвещениянь коряс комитетэнь прявтось корты, кой-кона предметтнэ, конатнень ютксо литературась, классонь важодеманть лувсо тонавтовить аволь педе-пес — эйкакштнень эйсэ шкинемань кастыця покш произведениятнень ловномаськак ловови кудонь тевекс[9].
Мелень-арсемань ёвтамо
2000-це иетнестэ Харрис Купер американь психологонть ванноматне невтизь, кудонь тевень покшолманть ды академической изнявксонть ютксо сюлмавомась пек вишкине, ды кудонь тевенть эйстэ лезэсь седе парсте неяви покш класстнэсэ[11]. 18 тёжат покш классо тонавтницятнень ютксо ванноматне невтизь, кудонь тевень покш важодематне — школань программань ламо сталмось ды стака материалонь чарькодемань эрявиксчись, мезесь сеедьстэ вети тонавтнемстэ мелень ёмамонтень. Лия ванномась, конасонть ульнесть 4,3 тёжат тонавтницят, невтизе, кудонь тевенть лангс ламо шкань ютавтыця эйкакштне пек парсте важодить тонавкстнэсэ, ансяк неть эйкакштнень эрси ризнэма ды шумбрачинть марто стакачить. Тень пингстэ ламо тевтне беряньгавтыть аволь пешксе кудораськестэ эйкакштнень тонавтнеманть, секс мекс тенст а сатыть кирдемась ды тонавтнеманть туртов условиятне, тетятнень-аватнень лездамось кандокшны зыян, бути сынь а чарькодить материалонть[12][13].
Россиянь тонавтыцятне сюлмить кудонь тевень покшолманть тонавтомань программатнень марто. Анна Штернберг «Тонавтыця» профсоюзс совицясь корты, кемекстазь вешематне кармавтыть тонавтницянть ютамс «ламо информация», конась кудонь тевтеме а чарькодеви. Тонавтыцясь арси, эряви полавтомс тонавтнемань программанть, ютавтомс весень ютксо келей кортамо. Дмитрий Лутовинов Просвещениянь министерстванть пингстэ общественной советэнь прявтось видькстась, кудонь тевень вейсэнь покшолмась «алкукскак ламо», ды те сюлмазь кудонь тевень максомань коряс эрявикс вешематнень арасьчинть марто. Дмитрий Казаков «Тонавтыця» профсоюзонь прявтось 2025-це иень таштамковонь 1-це чистэ Просвещениянь министерствань кемекстазь 704-це № кармавтоманть коряс кортась, од вешематнень эряви чарькодемс кода эсь мелень коряс превспутома, алкукскак а онкстави, зяро шка эрьва тонавтницянтень эряви кудонь тевтнень топавтомас[9].
Тешкставкст
- ↑ 1 2 3 4 5 Что такое ДЗ (домашнее задание): надо ли делать, обязательно ли, зачем выполнять и для чего (руз.). Умскул Журнал (20 Таштамковонь 2024). Дата обращения: 25 Таштамковонь 2025.
- ↑ 1 2 3 Кто придумал домашнее задание и зачем (руз.). SportZania (20 Таштамковонь 2024). Дата обращения: 25 Таштамковонь 2025.
- ↑ he Cult of Homework (руз.). The Atlantic. Дата обращения: 25 Таштамковонь 2025.
- ↑ 1 2 3 Домашние задания в школе: история, международный опыт, плюсы и минусы, влияние на детей и перспективы отмены в России (руз.). obr.so. Дата обращения: 25 Таштамковонь 2025.
- ↑ 1 2 Домашнее задание: есть ли в нем необходимость? — Центр развития интеллекта «Пифагорка» (руз.). Центр развития интеллекта «Пифагорка». Дата обращения: 25 Таштамковонь 2025.
- ↑ Бакулина Е. А., 2010, с. 156—157.
- ↑ Домашнее задание вызывает стресс (руз.). Педсовет (19 Чадыковонь 2008). Дата обращения: 25 Таштамковонь 2025.
- ↑ Володин предложил обсудить отмену домашнего задания для школьников (руз.). РБК. Дата обращения: 25 Таштамковонь 2025.
- ↑ 1 2 3 4 Депутаты подготовили единые требования к домашним заданиям в школах (руз.). РБК. Дата обращения: 25 Таштамковонь 2025.
- ↑ Нужна ли домашняя работа в школе? (руз.). Блог «Школы Будущего Online». Дата обращения: 25 Таштамковонь 2025.
- ↑ Стресс, конфликты, переутомление, недосып: почему школам пора отказаться от домашних заданий (руз.). chips-journal.ru.. Дата обращения: 25 Таштамковонь 2025.
- ↑ Ирина Слепухина. Учеба без передышки: почему домашние задания могут вредить школьникам (руз.). techinsider.ru. Дата обращения: 25 Таштамковонь 2025.
- ↑ Cooper H., Robinson J. C., Patall E. A., 2006.
Литература
- Cooper H., Robinson J. C., Patall E. A. Does Homework Improve Academic Achievement? A Synthesis of Research, 1987–2003 // Review of Educational Research. — American Educational Research Association, 2006. — Т. 76, вып. 1. — doi:10.3102/00346543076001001.
- Бакулина Е. А. Перспективы использования домашнего задания в обучении математике. — Проблемы и перспективы развития образования в России, 2010. — С. 156—159.