Кудораськень, вечкемань ды кемемань чи

Википедиясто материал - аорев содамкундосто
Learning.svg

Б. Н. Ельцин лемсэ Президентэнь ловнома кудонь материалт

Arrow-Right.png
Library.png
Те сёрмадовкссо тевс нолдазь
Б. Н. Ельцин лемсэ Президентэнь ловнома кудонь фондсто материалт
Б. Н. Ельцин лемсэ
Президентэнь ловнома кудо
Кудораськень, вечкемань ды кемемань чи
Пейделька — покшчинь прявт тешкс
Пейделька — покшчинь прявт тешкс
Типесь Светской
Официальной лемезэ 2022-це иень аштемковонь 28-це чистэ саезь
Аравтозь 2008-це иестэ
Тешкстави Россиясо
Тешкстамонь чись медьковонь 8-це чистэ
Зярдо тешкстави ютавтневить урьвакстомат-мирдененень лисемат, фестивальть, концертт
Мезе марто сюлмазь Пётронь ды Феврониянь чинть марто
Логотип РУВИКИ.Медиа вечкемань ды кемемань чи Кудораськень


Кудорáськень, вéчкемань ды кéмемань чи (руз. День семьи́, любви́ и вéрности) — Россиясо эрьва иестэ медьковонь 8-це чистэ тешкставиця покш чи, сюлмавозь Пётр иневанькс князенть ды Феврония нинзэ православиянь ледстнема чист марто. Кода Весе Россиянь покшчи кемекстазь 2022-це иень аштемковонь 28-це чистэ Президентэнь (руз.) (эрз. кармавтомасо[1].

Иневанькстнэнь историяст

Историктне арсить, Муромонь Пётр — те Давид Юрьевич князесь, кона аштесь Муромонть прявтсо 1205-це иестэ саезь 1228-це иес. Пётр лементь сон саизе манахокс прянзо наравтомадо мейле, неень шкань конёвтнесэ сон ледстневи те лементь ало[2].

Пётр ды Феврониянь невтема марто вельтямо — Фёдор инязоронть ды Ирина инязораванть Богородице-Рождественской соборс путовксост, (теезь 1593-це иестэ инязоронь мастерскойсэ)

Легендань коряс, зярыя иеде седе икеле, кода сон кармась улеме князекс, Пётр иневанькс торосо маштызе идемевсень гуенть, кона сакшнось Павел лелянзо нинстэнь. Куломсто гуесь пургизе Петрань верьсэ, мезде тона ормалгадсь проказасо. Онстонзо Пётр кармась содамо: ормадонть менстясы Феврония, Рязань ёнксонь Ласкова велестэ мекшень кирдиенть тейтерезэ. Феврония ульнесь ормаменстиекс ды лездась сы шкань князентень, ансяк теде икеле тонанень савсь алтамс урьвакстомс лангозонзо. Пётр эзизе кирде максозь валонзо. Феврония кадокшнось рунгозонзо апак пичкавто струп, конань кувалма проказась велявтсь мекев. Пётр таго пшкадсь лезкс мельга Феврониянень ды ней саизе никс[2].

Сыредезь Пётр ды Феврония тусть эрьвась лия манастырев, наравтызь пряст ды сайсть лемть Давид ды Евфросиния. Ёвтамонь коряс, сынь кулость эсест келиятнесэ вешкане 1228-це иень медьковонь 8-це чистэ. Манахокс ды манахинякс улемаст кувалма сынст эзизь калма ве кандолазсо, уловост путызь лия-лия обительга, ансяк омбоце чистэ сынь теевсть ве таркасо. Теде мейле полатнень калмизь вейсэ Муромсо Иневанькс Паз Авань Роштовань соборонь церькованть ваксс. 1547-це иестэ Рузонь православиянь церьковась кемекстынзе сынст кода иневанькстнэнь[3].

Тешкстамось

Кудораськень, вечкемань ды кемемань чись тешкстави Россиясо ды лия масторсо — Болгариясо, Белоруссиясо, Азербайджансо, Украинасо, Германиясо, Великобританиясо, Франциясо. Россиясо покш чинть кемекстызь Муромсо, те ошось ловови тешкстамонь куншкакурокс. Медьковонь 8-це чистэ Муромсо панжовить микшнемань ды ремёслань ярмаркат, эйкакштненень анимациянь курот, ютавтневить концертт.

2022-це иестэ Кудораськень, вечкемань ды кемемань чинть ошсонть тешкстызь кеветеецеде. Правоохранителень органтнэнь ловомаст коряс, ошкуншкасо интерактивной куротнень те чистэнть содавтызь малав 117 тёжат Муромонь эрицят ды инжеть, лейчиресэ концертэнть ваномо сакшность 75 тёжат ломанть[4].

  • Муромсо Кудораськень, вечкемань ды кемемань чинть тешкстамо
  • Покшчинь Муром (медьковонь 8-це чи)

    Покшчинь Муром (медьковонь 8-це чи)

  • Муромсо Кудораськень, вечкемань ды кемемань чинть ютавтома

    Муромсо Кудораськень, вечкемань ды кемемань чинть ютавтома

  • Покш концерт

    Покш концерт


Медьковонь 8-це чистэ Россиянь келес ютавтневить содавтомань акцият, конатне алтавить кудораськень питнейчитнень кемекстамонтень, эйкакштнень ды од ломантнень духовно-нравственной тонавтомантень[5][6].

Покшчинть историязо

1990-це иетнестэ Муромонь эрицятне сайсть мель ве чистэ тешкстнемс Ошонь чинть ды Кудораськень питнейчитнень чинть.

2006-це иестэ ошонь прявттнэнь мельявомаст коряс Муромонь эрицятне пурнасть 15—20 тёжат кедьтешкст «Вечкемань ды кудораськесэ уцяскань весероссиянь чиде (Муромонь Пётр ды Феврония благоверной князтнень ледстнемга)» яволявксонть ало, конасонть энялдсть теемс медьковонь 8-це чинть весероссиянь покш чикс. Арсезель истямо ладсо полавтомс чивалгома ёнксонь Вечкицянь чинть[7].

2008-це иень якшамковонь 18-це чистэ покшчись кармась тешкставомо весе масторонть келес. Российской Федерациянь Счётной палатань главась, Муромонь почётонь гражданинэсь ды Спасо-Преображенской монастырень (руз.) (эрз. попечителень советэнь главась Сергей Степашин, манастырень настоятелесь игуменэсь Кирилл (Епифанов) ды государственной ды общественной лия деятельтне кемекстызь покш чинть. Меленть кирдизь региононь прявттнэ ды общественной деятельтне, Государственной думась, Федерациянь Советэсь ды Рузонь православиянь церьковась[8][9].

2008-це иень медьковонь 8-це чистэ васенцеде тешкставсь Кудораськень, вечкемань ды кемемань весероссиянь покш чись. Сонзэ ютавтыцякс ульнесь Социально-культурной инициативань фондось, конань прявтсо Светлана Медведева, Россиянь колмоце президентэнть Дмитрий Медведевень низэ. Покш чись кармась тешкставомо эрьва иестэ[10].

2016-це иестэ ЛДПР партиянть пельде Государственной думань депутаттнэ Ярослав Нилов ды Алексей Диденко совавтсть парламентс медьковонь 8-це чинть оймсема чикс яволявтомадо закононь проект. Думань профильной комитетэсь сась мельс: оймсема чинь яволявтомась вишкалгавтсы важодема шкань фондонть, берянь теи производствантень ды кастсынзе бюджетэнь ютавтовкстнэнь, иень ютазь закононь проектэсь лоткавтозель васенце ловномасонть[11][12].

2022-це иень аштемковонь 28-це чистэ медьковонь 8-це чись яволявтозель государственной покш чикс. Тень лангс апак вано сон кадовсь важодема чикс[13].

2024-це иень медьковсто Госдумань кудораськень ванстомань комитетэнь главась Нина Останина пшкадсь РФ-нь Минтрудов Кудораськень, вечкемань ды кемемань чинть ламо эйкакшонь тетятнень-аватнень туртов оймсема чикс теемадо[14].

Покшчинь койтне

Чартявкс

Кудораськень, вечкемань ды кемемань чинь чартявксокс кармась пейделькась. Покшчистэнть кодыть пейделькасто каштазт, казить пейделькань пусмот ды «февронькат» — пейделька ды кудораськень лия чартявкс марто панжаткеть. Паро коекс теевсь медьковонь 8-це чистэ полыямось. Ансяк православиянь христианствань койтнень коряс тень теемс а мереви, секс мекс чись сы Петровонь постс (руз.) (эрз.[15].

Пейделька — покшчинь прявт тешкс

«Казть монень эрямо» акциясь

Эрьва иестэ ютавтови «Казть монень эрямо» акциясь, кона лезды ванстомс кудораськень питнейчитнень ды койтнень. Анокставить конкурст, фотонь невтемат, сравтневить информация марто материалт, вастовомас тердтневить эрьва кодамо тевень топавтыця ломанть: медикть, юристт, психологт, журналистт, религиянть ды обществань тевтнень марто сюлмавозь организациятнесэ важодицят[16].

«Казть монень эрямо» акция

Кинофестиваль

2006-це иестэ саезь Кудораськень, вечкемань ды кемемань чистэнть Россиясо ютавтневи «В кругу семьи» кудораськень ды эйкакшонь фильмань раськеютконь кинофестиваль[17].

«Вечкемань ды кемемань кисэ» медалень максомась

Истя жо те чистэнть коень коряс максовить «Вечкемань ды кемемань кисэ» медальтне. Казненть кемекстызе Кудораськень, вечкемань ды кемемань чинть ютавтоманзо коряс организационной комитетэсь. Казненть удалце ёнкссонзо пейделька, икельцесэнть Пётр ды Феврония иневанькстнэнь ликест ды «За любовь и верность семье» валтнэ.

«Вечкеманть ды кемеманть кис» наградань вейке пельксэнь невтема ды удостоверения

Казнесь максневи полатненень, конат эрить вейсэ 25 иеде ламо, «содавикст лия ломантнень ютксо кудораськень кеме лувсост» ды «тризь-кастызь эйкакшост паро ломанекс». Кандидаттнэнь яволявтни муниципальной кирдивиесь, каземась эрси региононь ды федеральной[8][18][19]. Россиянь кой-кона регионтнэсэ полатненень, конат эрясть вейсэ 50 иеде ламо, максовить ярмакт. Тень кисэ кавонест туртов улема Российской Федерациянь гражданинэкс, полыямост улезэ тешкстазь конёвсо[16][20]. Московсо 2025-це иестэ пандовсь:

  • 27 972 целковойть — полакс улемань 50 иетнень кис
  • 34 964 целковойть — 55 ды 60 иетнень кис
  • 41 955 целковойть — 65 ды 70 иетнень кис[21]

Ледстнемапелень аравтомась

Кудораськень, вечкемань ды кемемань чинть кемекстамозо путсь ушодкс Россиянь ламо оштнесэ Петранень ды Феврониянень ледстнемапелень аравтомантень. 2016-це иентень аравтозельть малав 60 ледстнемапельть, мезесь теинзе иневанькстнэнь XXI-це пингень Россиясо ледстнемапелень сехте содавикс героекс. Ледстнемапельтнестэ пелест аравтозельть «В кругу семьи» вейсэнь национальной программанть лувсо, лиятне — таркасо прявттнэнь мельявомаст коряс. Программанть лувсо аравтозь седе ламо ледстнемапельтне теезельть Московсо В. И. Суриков лемсэ художественной институтонь прядыця скульпторонть Константин Чернявскиень вете композициянзо коряс[22].

Тешкставкст

  1. ↑ Указ Президента Российской Федерации от 28.06.2022 № 411 «О Дне семьи, любви и верности»
  2. ↑ 1 2 История любви святых. lenta.ru (6 Чадыковонь 2025). Дата обращения: 27 Аштемковонь 2025.
  3. ↑ День семьи, любви и верности в России: когда отмечают, традиции праздника, РИА Новости (27 Аштемков 2025). Ваннозь 27 Аштемковонь 2025.
  4. ↑ Праздничные мероприятия в Муроме посетило 117 тысяч человек. муром24.рф (11 Медьковонь 2022). Дата обращения: 30 Медьковонь 2025.
  5. ↑ Как отмечают праздник. lenta.ru (8 Чадыковонь 2025). Дата обращения: 27 Аштемковонь 2025.
  6. ↑ День семьи, любви и верности в России: когда отмечают, традиции праздника. РИА новости (23 Аштемковонь 2025). Дата обращения: 27 Аштемковонь 2025.
  7. ↑ 8 июля — День семьи, любви и верности: история и традиции праздника. iz.ru (7 Медьковонь 2024). Дата обращения: 27 Аштемковонь 2025.
  8. ↑ 1 2 Ольга Светлова. Приложение 4: Праздник день семьи, любви и верности // Святые покровители брака и семьи Петр и Феврония. — М.: АСТ, 2011. — 192 с. — (Святые вам помогут). — ISBN 978-5-17-074464-0.
  9. ↑ В России может появиться свой День всех влюблённых. РБК (21 Якшамковонь 2008). Дата обращения: 5 Медьковонь 2017. Архивировано 8 Медьковонь 2018 года.
  10. ↑ День семьи, любви и верности (2008-2017). Красный квадрат. Дата обращения: 9 Чадыковонь 2019. Архивировано 9 Медьковонь 2021 года.
  11. ↑ День семьи предложили сделать выходным для повышения рождаемости. Lenta.ru (8 Медьковонь 2016). Дата обращения: 5 Медьковонь 2017. Архивировано 5 Якшамковонь 2021 года.
  12. ↑ День, семьи, любви и верности не сделают выходным. m24.ru (16 Аштемковонь 2017). Дата обращения: 5 Медьковонь 2017.
  13. ↑ День семьи, любви и верности в России: когда отмечают, традиции праздника. РИА новости (23 Аштемковонь 2025). Дата обращения: 27 Аштемковонь 2025.
  14. ↑ В Госдуме предложили сделать День семьи выходным для многодетных, РБК (3 Медьков 2024). Ваннозь 3 Медьковонь 2024.
  15. ↑ День семьи, любви и верности в 2025 году: история и традиции праздника. vesti.ru (7 Панжиковонь 2025). Дата обращения: 27 Аштемковонь 2025.
  16. ↑ 1 2 День семьи, любви и верности в России. РИА Новости (6 Аштемковонь 2024). Дата обращения: 2 Медьковонь 2024.
  17. ↑ В кругу семьи кинофестиваль. vkrugu7i.com. Дата обращения: 30 Аштемковонь 2025.
  18. ↑ День семьи, любви и верности в России: история и традиции праздника. РИА Новости (8 Медьковонь 2013). Дата обращения: 5 Медьковонь 2017. Архивировано 8 Медьковонь 2018 года.
  19. ↑ День семьи, любви и верности в России. РИА Новости (8 Медьковонь 2015). Дата обращения: 5 Медьковонь 2017. Архивировано 8 Медьковонь 2018 года.
  20. ↑ В России проходит акция «Подари мне жизнь!» Фонд социально-культурных инициатив.
  21. ↑ День семьи, любви и верности в 2025 году: история и традиции праздника. vesti.ru (7 Панжиковонь 2025). Дата обращения: 7 Аштемковонь 2025.
  22. ↑ День семьи, любви и верности. БУЗ ВО "Сомовский санаторий для детей". Дата обращения: 8 Медьковонь 2024.

Ссылкат

Саезь "https://myv.ruwiki.ru/w/index.php?title=Кудораськень,_вечкемань_ды_кемемань_чи&oldid=539594"-стэ