Ловонь шар

Ловонь шар (англ. Snow globe), «лов марто суликань шар» — суликань кондямо Роштовань казне, конасонть ашти кой-кодамо модель (саемга, покшчинтень мазылгавтозь кудыне). Истямо шаронь сорновтомсто моделенть лангс ушоды прамо аволь алкуксонь «лов». Ловонь неень шкань шартнэ пек парсте мазылгавтовить; ламотнень ули заводямост ды потсо аштиця механизмаст (кона моли музыкань шкатулкатнесэ тевс нолдавиця механизманть ёнов), кона седи Од иень мелодия.

Косто появась

Ловонь васенце шаронь появамонь таркадо мезеяк а содави, ансяк сонзэ тееме ушодсть Франциясо XIX-це пингестэ. Паряк, шардо икеле сех васенцекс появась се шкасто весенень вечкевикс пресс-папье. Тешкстама, ловонь шартнэ ульнесть невтезь 1889-це иень Парижень Весе масторонь невтемасо. Шартнэнь потсо ульнесть пек вишкине зданият, конатнень ютксо аштесь Эйфелень башнясь.

Франциясто истят казнетне састь Викториянь Англияв, а ХХ-це пингень 20-це иетнестэ ютасть иневедень трокс ды кармасть сравтневеме Американь Вейсэндязь Штатсо (США-со), истя сынь понгонесть мелень виевстэ путыця таштыцятнень паргос.

XIX-це пингень прядовомсто Эрвин Перци, кона тейни хирургонь инструментт, арсесь-тейсь Schneekugel (ловонь шар) ды тензэ максозель сонзэ тевдееманть лангс васенце патент. Васняяк прявт путовксокс ульнесь теемс валдонь максыця башка лездамопель — хирургиянь лампа. Зярдо хирургось бажась нолдамс штатолонь валдонть частицатнень марто Schusterkugel-ень (ведьсэ пештязь колбань, конась Кушкапингень шкасто тевс нолдави кода валдонь кемекстамо тарка) пачк, косо частицатне теезь эрьва кодамо материалсто ды ульнесть цитнемань валдомтыцякс, лисезь эффектэсь тензэ ледстизе ловонь прамонть. Арсеви, весень тень неемстэ чачськак ловонь шаронь теемадо мелесь-арсемась. Ловонь сонзэ васенце теезь шарось невтсь Мария Девань (Мариацеллень) Роштовань базиликень миниатюра. Истямо шаронь арсемась-теемась кармась пек вечкевиксэкс, ды Перци Людвиг ялаксозо Венасо панжсь кудораськень бизнес — микшнема кудо, косо течияк тейнить ловонь шарт, конатнень кучить микшнеме весе мастортнэва. «Ловонь» теиця материалось (потмаксос понгомадо икеле тензэ эряви уйнемс ведьсэ седе куватьс), ловови кудораськень салавачикс, кона юты пингеде-пингес.

Американь Вейсэндязь Штаттнэсэ ловонь шартнэнь лангс васенце патентэсь максозель 1927-це иестэ Пенсильвания штатонь Питтсбург ошсто Джозеф Гараджанень. 1929-це иестэ Гараджа ушодсь миниатюра марто шаронь тейнеме, косо невтезельть художественной вечкевикс произведениятне. 1940-це иетнестэ Америкасо ловонь шартнэ келейстэ тевс нолдазельть рекламасо. Теде башка ловонь шартнэ появить зярыя фильматнесэ, конатнень ютксто сех содавиксэкс ловови «Гражданин Кейн» 1941-це иестэ лисезь драмась.

Комсеце пингень куншкасто ловонь шартнэнь ушодсть тееме пек ламо ды кармасть тевс нолдамо кода казнеть. Кой-конатне сюлмазельть религиянь тематиканть марто. Религиянь невтиця сценкатнень марто ловонь шартнэ пек вечкевкшнесть эйкакштнень туртов кода католикень Роштованень казне. Шартнэ кеместэ кармасть сюлмавомо Роштовань покшчинть марто ды аволь чуросто появакшность рекламасо ды фильмасо.

1950-це иетнестэ суликань шартнэнь кармасть полавтомо пластикенсетне. Неень шкасто эйсэст теить ламо масторсо, Китайстэ ды Гонконгсто саезь (сех ламо нолдавкст) Германияс (лия ёнов а молиця мазый теевкст). Шартнэнь потсо вастневить эрьва кодат модельть, ютксост — историянь ды торпингень невтемат, аволь алкуксонь ды вечкевикс откерть, ды, нама, Од иень ды Роштовань прявт тешкст. Ловонь шартнэ тевс нолдтневсть мик вайгелень максомань ютавтома шкатнестэяк.

2000-це иетнестэ «Louis Vuitton», «Ladurée», «Sonia Rykiel» эли «Chanel» вечкевикс ды содавикс брендтнэнь туртов кармась паро коекс прявт тешксэст марто ловонь шаронь тейнемась. Те меленть-арсеманть кирдизь неень шкань артыцятне, саемга, Уолтер Мартин ды Палома Муньос, конат ловонь шартнэнь нолдыть тевс кода неень шканть невтицякс, теде башка меленть кирдизь музейтне, конатнень ули мелест невтемс содавикс артыцятнень важодемаст, саемга, Ван Гогонь, Дегень, Климтэнь^[1].

Кода теевить шартнэ

Васенце шартнэ ульнесть хрусталень ды аравтневсть керамикань кеме путовкс лангс. Пештязь сынь ульнесть ведьсэ, ловось теевкшнесь фарфоронь вишка пелькстнэстэ. Суликась ды «юрось» кармакшнось седе човинекс ды пек мазыекс; ней ловонть тейнить пластикстэ, а ведентень каяви антифриз — саемга, глицерин^[2].

Ней шартнэсэ ули музыкань механизмаяк, валдо ламо лампочкаткак, ды мик моторт — ловонь прамось ушодови заводямонть эйсэ. Сеедьстэ шаронь кирдиця путовкстнэ эрсить теке сынсь шартнэ ды мазыйстэ артовить. Ловонь шартнэнь кой-кона модельтнесэ улить социальной эли пеедькшнемань невтемаст. Кой-кона шартнэнь куншкасо улить таркат, козонь мереви путнемс фотот.

Весенень вечкевикс шартнэнь улить эрьва кодат вариацияст: саемга,«торнадо», косо ливтнить ансяк вишка объектт (сех сеедьстэ тевс нолдавить Хеллоуинстэ, вишка объектэкс лововить чопачатне ды эрьва кодат тандавкстнэ)^[2].

Культурань пеедькшнемат

Тейтернесь кирди ловонь шар

Неень шкань культурасо ловонь шартнэ тевс нолдтневить сеедьстэ. Сынь эрсить сюлмазь эйкакшпингенть, чумочинь арасьчинть эли кодаткак «валдо читнень» марто. Ансяк кой-кодат автортнэнь улить пеедькшнемань лия ёнов а молиця вановтост, тесэ сынь нолдыть тевс эсь шкинемаст тандадомань невтематнесэяк.

Арсематнень коряс, 2010-це иестэ ловонь шарось — «Coca-Cola» компаниянь Роштовань рекламасо сех прявт тешкс. Те казненть вельде Санта-Клаусось ваны весе масторонть мельга ды лиясто полавты молеманть шаронть пурдтнемстэ ды велявтнемстэ.

Фильмат

Ловонь шартнэ пек сеедьстэ невтневить фильматнесэ, конат сюлмазь телень покшчитнень марто ды аволь ансяк. Саемга, «Гражданин Кейн» фильмась ушодови сеньстэ, зярдо кулыця прявт откеренть кедьстэнзэ пры ды тапави ловонь шарось.
«Симпсонтнэсэ» Роштовань те казненть коряс лиясто тееви пеедькшнема^[3].
«Паро ловажат» («Милые кости») бестселлерсэ прявт откеренть васенце ледстнемакс ловови сонзэ кудосо ловонь шарось^[4].
«Фарго» (1996) фильмань кудонь видеосистемань (VHS) башка нолдавкссо ульнесь невтезь ловонь шарось, кона сорновтомсто човорякшнось лов ды «верь».
«Аволь кеме» («Неверная») (2002) фильмасо Эдвард Самнер (Ричард Гир) нолды тевс Конни (Дайан Лэйн) эсь нинстэнь казезь ловонь шаронть кода Пол Мартэл (Оливье Мартинес) салава вечкицянзо чавомань лездамопель.
«Санта-Клаус» фильмасо шаронть сорновтомсто цёрынесь тердекшнесь эстензэ Сантанть (эсензэ тетянзо) — се шкасто, зярдо тошнакады тетянзо кисэ.
«Мадагаскар» мультипликациянь фильмасо Алекс левесь кази ловонь шар Марти зебрантень, кона теде мейле ушоды лиякс ваномо эсь эрямонзо лангс.
«Шелдононь эйкакшпингезэ» («Детство Шелдона») телесериалонь колмоце сезононь васенце эпизодсо Джорджи Шелдононь ялаксозо микшни тесэнь эрицятненень Техасонь тешкс марто ловонь шарт ды истя налкси ловонтень тошнакадомань вечкемантень сынст ёжост лангсо.
«Освенцимстэ чемпион» («Чемпион из Освенцима») (2020) фильмасо нацистэнь тешкс марто ловонь шарось ашти концлагерень прявтонть кедьсэ. Кортамонь шкасто прявтось ёвтни, шартнэсэ васенце ловось теезель ломанень ловажасто.

Телевидения

«Сент-Элсвер» сериалонь прядовомсто невтезь, весе ютазесь ульнесь Томми Уэстхолл аутизмасо сэредиця цёрыненть прясо арсемакс, косо прявт питнечикс ульнесь сериалсо больницянть, тевдеемань невтемань прявт тарканть марто ловонь шарсо зданиянь моделесь.
«Анархиянь цёрат» («Сыны анархии») сериалонь ветеце сезононь «Вишка мастор» («Маленький мир») котоце эпизодсо Джекс Деймон Поупонь компаниясо бороци SAMCRO байк-клубонь яттнэнь марто, конатнень ютксо: «раужот» (Нордт), «тюжат» (Майанцт) ды «ожот» (Триада). Джекс пшкади Тигнень муемс леднемапель тюрьмань ванстыцянть маштомга, кона лездась лия пекстазетненень маштомс Джекс Опи эйкакшпингень ялганть, конась пекстазель Стоктононь тюрьмасо, ды ёвтась, ванстыцятне тейнесть путомат, пелькстасть, кода куватьс Опи карми куломо. Тиг эзь муе леднемапель, ды венсти Джексэнь молотка ды «Те вишкине мастор» («It’s a Small World After All») мелодиянть марто ловонь шар. Джекс кочки шаронть ды заводи эйсэнзэ. Джекс, Тиг ды Чибс састыне якить вансыцянть перька, теке клеткасо тиграт. Мейле Джекс шарсо чави ванстыцянть, ды шарось полады седямо «Те вишкине мастор» мелодиясь.

Компьютерэнь налксемат

«Кадовкст: Нью Вегас» («Fallout: New Vegas») компьютерэнь налксемасо ловонь шартнэ лововить коллекциянь предметэкс, ансяк «Кадовкст 3» («Fallout 3») налксемасонть пупстнэнь пельде налксицянтень казнеть а максовить. Налксемасонть казнетнень мереви полавтомс крышка лангс: 2000 крышкатнень кис максови вейке шар.
«Невервинтерэнь чокшнеть» («Neverwinter Nights») прявт компаниянь налксематнестэ вейке квестэсь максы понгомс масторс, кона теезь магиясо, теке ловонь шаронь потсо. Тень пингстэ мереви кортамс пелест тосонь откертнень марто. Мекев велявтозь, шаронть сорновтомсто ды потсо масторс таго совамсто, мереви кортамс откертнень лия омбоце пельксэнть мартояк. (Кортамотнень вельде кежсэ эриця неть кавто фракциятнень ладямось — те квестэнть ютамсто сех вадря тев). Лия ёнов а молиця масторонть, косо ашти свалшкань теле ды свал моли лов, теизе кежей ашо инегуесь (неть ракшатне сюлмазь кельменть марто) теизе эсь ёжонь кепетеманть кис, явинзе кавто раськетнень. Квестэнь ютамось олякстомты раськетнень пекстамонь сюдомадо ды свалшкань теледе.

Теке марто вант

Ловонь поколь
Ловнесэ налксема

Тешкставкст

↑ История появления снежных шаров от 19 века до 21. (неопр.) Дата обращения: 14 Сундерьковонь 2015. Архивировано 17 Сундерьковонь 2015 года.
↑ ¹ ² Christmas Snow Globes: A Whimsical History of An Old-Fashioned Christmas Decoration (англ.). Дата обращения: 27 Ацамковонь 2010. Архивировано 8 Медьковонь 2012 года.
↑ Серия Rosebud, к примеру.
↑ «У моего отца на письменном столе стоял стеклянный шар, а в нём — утопающий в снегу пингвин с красно-белым полосатым шарфиком на шее…» См. Введение к книге.

Литература

Nancy McMichael. Snowdomes. — 1990. — ISBN 1558590366. Книга, посвящённая истории снежных шаров. Предоставляет много информации по теме.

Ссылкат

Beautiful Snowdomes (англ.). Дата обращения: 21 Ацамковонь 2010. Архивировано 11 Панжиковонь 2012 года.
The world of snow globes and dream globes (англ.). Дата обращения: 27 Ацамковонь 2010. Архивировано из оригинала 9 Ацамковонь 2013 года.

[1] История появления снежных шаров от 19 века до 21. (неопр.) Дата обращения: 14 Сундерьковонь 2015. Архивировано 17 Сундерьковонь 2015 года.

[SG-2] ¹ ² Christmas Snow Globes: A Whimsical History of An Old-Fashioned Christmas Decoration (англ.). Дата обращения: 27 Ацамковонь 2010. Архивировано 8 Медьковонь 2012 года.

[3] Серия Rosebud, к примеру.

[4] «У моего отца на письменном столе стоял стеклянный шар, а в нём — утопающий в снегу пингвин с красно-белым полосатым шарфиком на шее…» См. Введение к книге.

[1]

[2]

[3]

[4]