Музеень ве
| «Музеень ве» | |
|---|---|
 | |
 | |
| Отраслясь | культура, искусства, музеень тев |
| Зярдо ютавтозель васенцеде | 1997-це иестэ |
| Кода сеедьстэ ютавтневи | эрьва иестэ |
| Зярдо ютавтозель меельцеде | 2025-це иестэ |
| Ютавтыцясь | РФ-нь культурань министерства |
| Статусозо | ютавтневиця |
| Кодамо сайтс пшкадемс | museumnight.culture.ru |
 Музеень ве | |
«Музе́ень ве» (англ. Night of Museums) — раськеютконь культурань-тонавтомань акция, зярдо музейтне важодить талай чокшнес эли мик ветькак[1]. Сон сюлмазь Музеень раськеютконь чинть марто, кона тешкстави панжиковонь 18-це чистэ; аравтовозь коень коряс ютавтови маласо оймсема читнестэ — панжиковонь колмоце таргонть песэ. Акциянть прявт смустезэ — музеень сюпавчитнень марто седе ламо ломантнень содавтомась, музеень ды тонавтомань важодемань од парцунтнэнь ды лувтнень невтемась[2]. Васенцеде акциясь ютавтозель 1997-це иестэ[3].
2025-це иестэ Россиясо «Музеень весь» ютавтови панжиковонь 17-це чистэ. Акциянть темазо — «Геройть»[4].
Акциянть историязо
Васенцеде «Музеень кувака весь» (нем. Lange Nacht der Museen)[5] ютась Берлинэнь кемгавтово музейсэ 1997-це иестэ. Мероприятиятне: экскурсиятне, лекциятне, театрань путовкстнэ — мольсть вень перть. Весе сынь ютавтовсть питневтеме[1].
1999-це иестэ истямо ёнов молиця акция ютавтсь Франциянь Культурань ды коммуникациянь министерствась[6].
2001-це иестэ акциясь ютавтозель Европань ды Американь 39 масторсо[4].
2005-це иестэ Европань Советэсь кемекстызе эрьва иестэ «Музеень ве» раськеютконь акциянть ютавтомадо Франциянть арсеманзо. Арсезель, мероприятиясь карми ютавтневеме Музеень раськеютконь чинтень сех маласо оймсема читнестэ[7].
2025-це иентень акциянтень вейсэндясть 40-де ламо масторсто 3,5 тёжадо ламо музейть[7].
Россиясо
Россиясь вейсэндясь акциянтень 2002-це иень чадыковонь 20-це чистэ[8][9]. Мероприятиятнес, конатнень анокстынзе Красноярскоень музеень куншкакурось, сакшность 5 тёжадо ламо ломанть[6].
2006-це иестэ «Музеень венть» ютавтызь Санкт-Петербургсо ды Казаньсэ[4].
2007-це иестэ акциясь васенцеде ютась Московсо ды Екатеринбургсо. Московсо мероприятиянтень максозель «Музейсэ ве» лем[7]. Акциянть ютавтома лувсо эйкакштнень ды покштнень туртов ламо музейтне анокстасть невтемань ды экскурсиянь покш программат.
2015-це иестэ «Музеень вентень» максозель федеральной статус. Те шкастонть саезь акциясь ютавтневи РФ-нь культурань министерстванть лезксэнзэ вельде. Акциясонть эсь важодемаст невтнить весе масторонть келес федеральной, государственной, муниципальной, ведомственной ды башка музейтне[2].
«Музеень весь» Россиясо вейсэнди музеень 2 тёжадо ламо организацият[7]. Акциянтень мель явить невтемань куншкакуротне, театратне, галереятне, ловнома кудотне, юткошкань ютавтома куротне ды лия учреждениятне[2].
Эрьва иестэ акциясь алтави башка темас.
Кода весемесь ютавтневсь
- 2016-це иестэ акциясь ютась панжиковонь 21-це чистэ. Мероприятиятне алтазельть Россиянь кинонь иентень. Ламо музейтне ютавтсть мероприятият «Вейке экспонатонь история» тематиканть коряс. Санкт-Петербургсо, Екатеринбургсо ды Калининградсо акциянть лувсо важодиця таркатнесэ тевс нолдавсь вейкине билет[10]. Ютавтозельть музеень 130-де ламо ды ошонь зярыя кементь экскурсият, 60 концертт ды кинонь 30 невтемат. Московсо ВДНХ-со анокстазель «Кинось ды модась. Александр Васильевень фондсто кинонь содавикс налксицянь палят» невтема[11].
- 2017-це иестэ акциясь ютась панжиковонь 20-це чинь вестэнть. Прявт темась —
1917-це иень революциясь[12]. Мероприятиянть лувсо важодсть зярыя кементь культурань таркат. Ютксост: Третьяковской галереясь, «Царицына» усадьбась, ВДНХ-сь, Московонь зоопаркось, «Гараж» неень шкань искусствань музеесь ды лият. Ютавтозельть лекцият, экскурсият, искусствоведтнэнь, историктнень, фотографтнень марто вастовомат, мастер-класст ды театрань путовкст[13]. - 2018-це иестэ акциясь ютась панжиковонь 19-це чистэ. Прявт темась — «Запасникстэ шедеврат»[14]. Мероприятиятнень лувс совасть музейть, театрат, галереят, арт-курот ды искусствань школат. Музейтне невтизь питней экспонаттнэнь, конат икеле ванстовсть пекстазь фондтнэсэ эли одкстомтовсть-витневсть. Московсо ульнесть 800-до ламо событият, конатнес сакшность 500 тёжат ломанть.
- 2019-це иестэ акциясь ютась панжиковонь 18-це чистэ. Мероприятиянть прявт темазо — «Элементт»[15]. 100-до ламо музейть весе масторонть келес важодсть талай чокшнес, ютавтсть экскурсият, лекцият, перформанст ды концертт. «Гараж» музеесь анокстась инжензэ туртов «Ломенсь кода ландшафтонть туртов рамка» ды «Рашид Араин. Ретроспектива» Павел Пепперштейнэнь невтематнень коряс питневтеме экскурсият. Бахрушинэнь музейсэ анокстазель «Софокласто Мейерхольдс театра» невтевкс, конань эйсэ ваныцятне сынсь кочкизь театрань сисем «эпохатнестэ» седе вечкевиксэнть, Античностенть эйстэ саезь XVII-це пингентень молемс. «Солянка» галереянь инжетне неизь, кода моли артыцятнень важодемаст. Акциянь ютавтомань прявт таркакс кармась улеме Московонь музеесь, косо Drumsfest Russia 2019 раськеютконь фестивальсэ улицятне невтсть барабансо седямонь шоу[16].
- 2020-це иестэ «Музеень венть» прявт темазо — «Текшст»[17]. Covid-19 кезовнть кис весе мероприятиятне ютасть онлайн-лувсо панжиковонь 16—17-це читнестэ. Акциянть кирдизь Московонь 50-де ламо музейть ды галереят. Онлайн-событиятне ютавтовсть организациятнень официальной сайтсэст ды социальной сеттнесэ. Весемезэ мероприятиятнень ванызь 800 тёжадо ламо ломанть[18].
- 2021-це иестэ акциясь ютась панжиковонь 15-це чистэ. Прявт темась — «Аволь ансяк музей»[19]. Ютавтозельть невтемат, экскурсият, мастер-класст, квестт, пелькстамот, викторинат, лекторийть. Ютавтомань прявт таркакс кармась улеме Третьяковской галереясь, косо ютась «Олясчиде арсемат. Россиясо ды Германиясо романтизма» раськеютконь невтемась. Государственной исторической музейсэ сыцятне неизь кода юты питней экспонаттнэнь одкстомтомась, ванкшнызь умонь кедьсёрмадовкстнэнь. Декоративной искусствань Весе Россиянь музеень важодицятне анокстасть программа эйкакштнень туртов, ютавтсть олгосто някань теемань мастер-класст[20].
- 2022-це иестэ мероприятиясь ютась панжиковонь 21-це чистэ. Темась — «Ловомань точка»[21]. Сыцятненень анокстазельть экскурсият, концертт, музыкань ды поэзиянь перформанст, эйкакшонь ды покшонь мастер-класст, ушова питневтеме ялго якамот, лекцият, кинонь ваномат, панжадо менель ало невтемат [22]. Мероприятиятнес сакшность 300 тёжадо ламо ломанть.
- 2023-це иестэ «Музеень ве» акциясь ютась панжиковонь 21-це чистэ. Прявт темась — «Историясь ды историят»[23]. Ютавтозельть невтемат, мастер-класст, концертт, экскурсият. Акциянть кирдизь Индиянь, Саудовской Аравиянь, Венесуэлань, Катаронь, Ливанонь, Камбоджань, Монголиянь ды лия масторонь дипломатической миссиянь представительть. А. С. Пушкин лемсэ ГМИИ-сэ анокстазель «Кода гайги пейзажось» программа: сыцятне телефон ды пилес тонгомка марто ютнесть музеень залтнэва ды вейсэндясть искусствань кавто видтнэнь — музыканть ды живописенть. Востоконь музеесь ВДНХ-со анокстась инжетненень свалшкань экспозицияванть «музыкань маршрут»[24]. Акциянть лувсо ютасть 1300-то ламо мероприятият, конатнес сакшность кавто миллиондо ламо ломанть[25].
- 2024-це иестэ акциясь ютась панжиковонь 18-це чистэ. Прявт темась — «Пингестэ пингес. Кудораськень реликвият»[26]. Московонь культурань таркатне ютавтсть малав 500 мероприятият. Ютксост: литературань спектаклят, театрань путовкст, мастер-класст, квестт, викторинат, классикань ды неень шкань музыкань концертт. Акциянь федеральной таркатнес сакшность 300 тёжадо ламо ломанть.
- 2025-це иестэ «Музеень ве» акциясь ютавтома чизэ — панжиковонь 17-це чи. Прявт темась — «Геройть»[27]. Тиринь масторонь ванстыцянь иестэнть программась алтазь духовно-нравственной питнечитнень ванстомантень, эсь масторонть ды сонзэ саевксэнзэ кисэ каштанчинь ёжонть кастомантень. Мероприятиянть лувсо ютасть экскурсият, невтемат, лекцият, мастер-класст, концертт ды лия мезть[28].
Ольга Любимова Россиянь Федерациянь культурань министрась тешкстась[29]:
Ине Изнямонь юбилеень иестэнть минь ледстясынек геройтнень, конат прянь апак вансто тюрсть масторонок олячинзэ ды виевчинзэ кис ды лездасть ёртомс фашизмань терттнень. «Геройть» темась ули малавикс Россиянь эрьва кодамо ужинесэ важодиця музейтненень, эрьва региононть улить эсензэ героензэ ды историянь астувтовиця лопанзо, конат сюлмавозь кода Ине Отечественной войнанть марто, истя масторсонок лия ине тевтнень мартояк. Минь таго пшкадтяно ютазь шкань неть героической лопатненень, ледстясынек историянь эрьва кодамо шкасто ломаненек ине тевест, марясынек геройтнеде ды эсест геройтнень ёвтнемаст. Тень пингстэ од шкась чачты од геройть, ды аравтозь темась мери музейтненень кода нежедемс историянь юронть лангс, истя кочкамс неень шкантень ладиця ёнксонтькак ды ёвтнемс течинь геройтнеде.
Те акциянть марто сюлмазь читне
- Экскурсоводонь раськеютконь чи (даволковонь 21-це чи)
- Россиясо культурань важодицянь чи (эйзюрковонь 25-це чи)
- Кеврунгонь ды историянь таркатнень раськеютконь чи (чадыковонь 18-це чи)
- Музеень раськеютконь чи (панжиковонь 18-це чи)
- Кинонь ве (ютавтнема шкась эрьва иестэ полавтневи)
Тешкставкст
- ↑ 1 2 Что известно о всероссийской акции "Ночь музеев", TACC (17 Панжиков 2024). Ваннозь 27 Чадыковонь 2025.
- ↑ 1 2 3 Всероссийская акция "Ночь музеев", РИА Новости (18 Панжиков 2024). Ваннозь 27 Чадыковонь 2025.
- ↑ Денис Сидоров. Музей подготовился к грядущей ночи, Победа РФ | Новости, история, патриотизм (15 Панжиков 2021). Ваннозь 27 Чадыковонь 2025.
- ↑ 1 2 3 Когда пройдет «Ночь музеев» в 2025 году?, AiF (5 Даволков 2025). Ваннозь 27 Чадыковонь 2025.
- ↑ Всероссийская акция «Ночь музеев» 2024, Аскинский район — дата и место проведения, программа мероприятия., Культура.РФ. Ваннозь 27 Чадыковонь 2025.
- ↑ 1 2 История акции "Ночь музеев", TACC. Ваннозь 14 Панжиковонь 2025.
- ↑ 1 2 3 4 История акции. Ночь музеев. Дата обращения: 27 Чадыковонь 2025.
- ↑ «Ночь в храме», возможно, пройдет в Москве // Православие и мир. — 22.09.2015.
- ↑ Красноярский музейный центр. Дата обращения: 10 Чадыковонь 2010. Архивировано из оригинала 20 Панжиковонь 2010 года.
- ↑ Акция "Ночь музеев", посвященная Году кино, стартует по всей России, РИА Новости (21 Панжиков 2016). Ваннозь 27 Чадыковонь 2025.
- ↑ Волкова, С.. «Ночь музеев» - 2016: Хотите увидеть редкие коллекции, торопитесь зарегистрироваться, msk.kp.ru (13 Панжиков 2016). Ваннозь 14 Панжиковонь 2025.
- ↑ «Ночь музеев»-2017 посвятили русской революции, Известия (19 Панжиков 2017). Ваннозь 27 Чадыковонь 2025.
- ↑ "Ночь в музее" в Москве: Куда пойти, что посмотреть, и как добраться, Metro Москва. Ваннозь 14 Панжиковонь 2025.
- ↑ «Шедевры из запасников» станут главной темой «Ночи музеев-2018», Известия (7 Панжиков 2018). Ваннозь 27 Чадыковонь 2025.
- ↑ Когда проведут "Ночь музеев" в 2019 году? Тема акции была объявлена в конце мая прошлого года | Санкт-Петербург Центр (руз.). peterburg.center (11 Даволковонь 2019). Дата обращения: 27 Чадыковонь 2025.
- ↑ «Ночь музеев» в Москве 2019: куда идти и что смотреть, BURO.. Ваннозь 14 Панжиковонь 2025.
- ↑ Участие в «Ночи музеев — 2020». www.artnight.ru. Дата обращения: 27 Чадыковонь 2025.
- ↑ Онлайн-мероприятия акции "Ночь в музее – 2020" посетили более 800 тыс. человек, TACC. Ваннозь 14 Панжиковонь 2025.
- ↑ Анонс пресс-конференции «Ночи музеев — 2021». old.artnight.ru. Дата обращения: 27 Чадыковонь 2025.
- ↑ Ночь музеев - 2021 (руз.). nazaccent.ru. Дата обращения: 14 Панжиковонь 2025.
- ↑ Как пройдет акция "Ночь музеев" в России в 2022 году, РЕН ТВ (20 Панжиков 2022). Ваннозь 27 Чадыковонь 2025.
- ↑ Что и где посмотреть в Москве в «Ночь музеев-2022»?, AiF. Ваннозь 14 Панжиковонь 2025.
- ↑ Ночь музеев: когда будет в 2023 году, участники акции, программа, РИА Новости (5 Панжиков 2023). Ваннозь 27 Чадыковонь 2025.
- ↑ Экскурсия по бункеру, рок-концерт и закулисье театра: куда пойти на «Ночь музеев» в Москве, Global City. Ваннозь 14 Панжиковонь 2025.
- ↑ Министр культуры рассказала о рекордах "Ночи музеев" в России. Вести.ру (25 Панжиковонь 2023). Дата обращения: 14 Панжиковонь 2025.
- ↑ Объявлены дата и тема «Ночи музеев» 2024 года - Год Литературы, Год Литературы (13 Эйзюрков 2024). Ваннозь 27 Чадыковонь 2025.
- ↑ «Ночь музеев» пройдет по всей России 17 мая. Публикации СМИ. Первый канал, 1tv.ru (5 Даволков 2025). Ваннозь 27 Чадыковонь 2025.
- ↑ Ночь музеев — 2025. Официальный сайт акции. museumnight.culture.ru. Дата обращения: 14 Панжиковонь 2025.
- ↑ Ольга Любимова: Всероссийская акция «Ночь музеев» в 2025 году будет посвящена теме «Герои». Министерство культуры РФ (17 Якшамковонь 2025). Дата обращения: 14 Панжиковонь 2025.
Литература
- Казакова, О., Кошелева, С. Ночь музеев во Франции как пример современной международной кооперации и общественно-государственного партнёрства // Вестник Кемеровского государственного университета культуры и искусств. — 2023. — № 63.
- Малафий, А. Туризм впечатлений : ресурсы и перспективы развития в Тульской области // Современные проблемы сервиса и туризма. — 2019. — № 2.
- Петрунина, Л. Два лица одного музея. "Ночь музеев" в Третьяковской галерее // Телескоп: журнал социологических и маркетинговых исследований. — 2012. — № 6.
- Черткова, М. А., Аксенова, Л. В., Каримова, Э. Т. Международная акция «Ночь музеев» в Учебном ботаническом саду им А.Г. Генкеля ПГНИУ // Ботанические сады в современном мире. — 2024. — № 6. — doi:10.24412/cl-36595-2024-6-169-171.