Норовава

Норо́вава (Пакся́ва) - те ине ава, паксянь кирдиця. Лиясто сонензэ мерить Паксява. Эрзятне сонзэ лемдить касыця сюронь, тикшень, умарень, кстыень, пештень Пазавакс.

Эряви меремс, те пазось лиятнень эйстэ явовсь модань тейнема койтнень кемекставомадо мейле. Неень шкань эрзянь кельсэ "норов" валось паксянть невтемс а ёвтавкшны. Весемесь полавтовсь "пакся" валсо. Икеле те смустьсэ ёвтамонть коряс кавтолдомат арасельть (саемга, маринь кельсэ нур - пакся, Нур-ава - паксянь паз).

"Норов" валось ванстовсь эрзянь кельсэ "норовжорч" ды "нартемкс" валтнэсэ, мокшонь кельсэ - "нормаль", "нярьхкамаз", "нардише" валтнэсэ.

Лововсь, эрьва веленть ульнесь эсензэ Паксявазо. Икеле нуицятне тердильть эйсэнзэ мартост ярсамо, вешсть кедьстэнзэ лезкс сюронь урядамсто эли паксянь кочкамсто, а керявомс нуемстэ:

...Паксянь-ава, паксянь кирди,
Сак мартонок ярсамо,
Ярсамодо мейле лездамо,
Илязт сэреде кеденек,
Илязт сэреде кутьмеренек.

Нуемань прядовомсто сонзэ туртов кадыльть салсо почодозь кши палнэ - ярсаволь ды аволь кежиявто. Ломантне пельсть Паксявадонть. Арсесть, сон коласы норовонть, кадсынзе кшивтеме. Паксясо важодемстэ кизэнь пси чине эрсекшнесть ёжовтомо пракшномат. Ломантне эзть сода, те - псинть эйстэ, ловсть, те Паксяванть пельде тешкст: мейсэ-бути эзь савтово тензэ.

Нороваванть эрямо тарказо

Паксяванть эрямо таркакс лововсь межась. Шандрова велень вейке авась ёвтнесь, келя, межа лангсо а удсить, те таркась Паксявань.

Сёрмадовкст