Ожо ормань бороцямонь каршо масторлангонь чи

Ожо ормань бороцямонь каршо масторлангонь чи
Типесь	Шумбрачинь ванстома
Официальной лемезэ	World Tuberculosis Day
Смустезэ	кастомс содамочитнень вирусонь ожо орматнень коряс, седе ламо содамс масторлангсо профилактикань ды шумбралгадомань мероприятиятнеде
Аравтозь	2010-це иестэ саезь
Ютавтыцясь	Шумбрачинь ванстомань масторлангонь вейсэндявксось
Тешкстамонь чись	медьковонь 28-це чистэ
Зярдо тешкстави	медицинань ванномань, лекциянь, семинаронь, невтемань ютавтомасо
Мезе марто сюлмазь	Барух Бламберг профессоронть, Нобелевской премиянь лауреатонть ды B ожо ормань васенце панжицянть чачома чинзэ марто
Ожо ормань бороцямонь каршо масторлангонь чи

О́жо о́рмань бороця́монь ка́ршо масторла́нгонь чи (руз. Всеми́рный день борьбы́ с гепати́том) (англ. World Hepátitis Dáy) — эрьва иень раськеютконь покшчи, кона алтазь вирусонь ожо орматнеде содамочитнень кастомантень, сынст профилактикантень, ванномантень ды шумбралгадомантень. Ютавтневи Ожо ормань бороцямонь каршо раськеютконь вейсэндявксонть мелензэ коряс. Тешкстамонь прявт смустесь — кастомс содамочитнень вирусонь ожо орматнень коряс, седе ламо содамс масторлангсо профилактикань ды шумбралгадомань мероприятиятнеде. Шумбрачинь ванстомань масторлангонь вейсэндявксонь орматненень алтазь те ниле официальной покшчитнестэ вейкесь, ютксост — Тубёркулёзонь бороцямонь каршо масторлангонь чись (эйзюрковонь 24-це чи), Маляриянь бороцямонь каршо масторлангонь чись (чадыковонь 22-це чи), СПИД-нь бороцямонь каршо масторлангонь чись (ацамковонь 1-це чи).

Покшчинть историязо ды смустезэ

Васенцеде ютавтозель 2008-це иестэ пациентэнь вейсэндявкстнэнь мелест-арсемаст коряс ды тешкставсь панжиковонь 19-це чистэ. 2010-це иестэ Шумбрачинь ванстомань масторлангонь вейсэндявксось совавтызе те чинть Раськетнень Вейсэндязь Организациянь (ООН-нь) шумбрачинь официальной покшчитнень юткс. 2011-це иестэ чись полавтозель медьковонь 28-це чис, Барух Бламбергень чачома чистэнть, 1965-це иестэ содыентень максозель Нобелевской премия ожо ормань вирусонь панжоманть кис, профессорось кулось 2011-це иестэ.

Покшчинь мероприятиятнень прявт аравтоматне

• A, B, C, D, E ожо ормань вируссо ормалгадомадо ёвтнематне;
• Ливчакавтомань путомадо кортамо (сехте пек A ды B ожо орматнень каршо);
• Тестэнь ютамонь тердема, секс мекс ламо ломантне а содыть эсест ормадо;
• Ожо ормасо сэредицятнень ёндо стигмациянть каршо бороцямо;
• Ормань а нолдамодо кортамо.

Покшчинь прявт валтнэ

2008-це иестэ Ожо ормань бороцямонь каршо масторлангонь чинть прявт валокс кармась «Мон 12-цесь?» («Am I number 12?») валтнэ. Сынь ледстнесть, Масторонть лангсо эрьва 12-це ломанесь ормалгавтозь ожо ормасо. Неть прявт валтнэнь марто Правительстватненень сёрмадозь «12 вешемат» — ормань бороцямонь каршо алкуксонь арсемат.

2010-це ды 2011-це иетнестэ прявт валтнэ ульнесть истят: «Те ожо орма» («This is hepatitis»).

2012-це иестэ прявт валтнэ: «Те ожо орма… Сон седеяк маласо» («This is hepatitis… it’s closer than you think»). Неть валтнэ тердсть арсемс, ожо ормасо, паряк, ормалгады эрьвась, ды а эряви арсемс теке те сюлмазь ансяк лиятнень марто.

2013-це иестэ тевс нолдазельть истят валтнэ: «Те ожо орма… Содадо сонзэ ланга. Ванстодо прянк сонзэ эйстэ» («This is hepatitis… Know it. Confront it.»), неть валтнэ кармавтсть седе ламо арсемс орманть ланга, ютамс ванномат ды бути эряви — сеске ушодомс шумбралгавтоманть.

Мезе кортыть ловоматне

В ожо орманть кастомазо

Масторонть лангсо ожо ормань кандтницятнеде весемезэ 500 миллиондо ламо — эрьва 12-це эрицясь. ВИЧ-сэ ормалгадозь ды онкологиянь ормасо весе сэредицятнеде те 12-ксть ламо:

• 350 миллионт ломанть сэредить B ожо ормасо.
• 170 миллионт ломанть сэредить С ожо ормасо.
• 1,4 миллионт ломанть сэредить А ожо ормасо.

Эрьва иестэ ожо ормадо кулыть миллиондо ламо ломанть, мезесь седе ламо ВИЧ-сэ ды онкологиянь ормасо сэредицятнень коряс. Хронической ожо ормась 15-30 иень перть вети максонь циррозонтень ды раконтень.

Тешкставкст