Радиологиянь раськеютконь чи

Радиологиянь раськеютконь чи — эрьва иень покшчи, кона алтазь медицинань те специальностентень. Покшчись ловови Радиологиянь Европань вейсэндявксонть (ЕSR-нть), Кельме ёнксонь Американь радиологиянь вейсэндявксонть (RSNA-нть), Американь радиологиянь колледженть (ACR-нть) ёвтазь вейсэнь мелекс-арсемакс ды васенцеде тешкстазель 2012-це иень сундерьковонь 8-це чистэ.

Эрямопингезэ

1895-це иень сундерьковонь 8-це чистэ Вильгельм Конрад Рентген панжизе рентгенэнь сияждоманть ды истя путсь ушодкс медицинань од дисциплинанентень — радиологиянтень. Тень лувсо Радиологиянь Европань вейсэндявксось (ЕSR-сь), Кельме ёнксонь Американь радиологиянь вейсэндявксось (RSNA-сь) ды Американь радиологиянь колледжесь (ACR-сь) арсесть теемс те чинть эрьва иень покшчикс. Радиологиянь раськеютконь чинть прявт смустезэ — кепетемс ломантнень мельявомаст медицинань те пельксэнтень ды сонзэ пельде максовиця лездамонтень. Радиологиянь раськеютконь чинть тешкстамозо сась полавтомакс Радиологиянь Европань чинтень, кона ушодовсь ютавтневеме 2011-це иестэ. Радиологиянь Европань чинть вейкине тешкстамозо ютась 2011-це иень даволковонь 10-це чистэ ды сюлмазель Рентгенэнь кулома чинзэ марто. Радиологиянь Европань чинть васняяк ютавтызе Радиологиянь Европань вейсэндявксось (ЕSR-сь), седе тов Кельме ёнксонь Американь радиологиянь вейсэндявксось (RSNA-сь), Американь радиологиянь колледжесь (ACR-сь) рентгенэнь налтнэнь панжовомань чистэ ёвтасть мель теемс Радиологиянь раськеютконь чи ды тешкстамс сонзэ вейсэ.

Теке марто вант

Радиология
Рентгенэнь сияждома
Рентген, Вильгельм Конрад

Ссылкат