Романов, Михаил Яковлевич (Советской Союзонь Герой)
| Михаил Яковлевич Романов | ||||||||
|---|---|---|---|---|---|---|---|---|
 | ||||||||
| Чачома чизэ | 4 медьковонь 1922 | |||||||
| Чачома тарказо | ||||||||
| Кулома чизэ | 12 панжиковонь 2008 (85 лет) | |||||||
| Кулома тарказо | ||||||||
| Масторозо |
 СССР |
|||||||
| Кодамо ушмосо | ВВС | |||||||
| Званиязо |
 |
|||||||
| Тюремат/войнат | ||||||||
| Казнеть ды премият |
|
|||||||
Михаил Яковлевич Романов (1922-це иень медьковонь 4-це чи, Ведянцы веле — 2008-це иень панжиковонь 12-це чи, Москов ош) — Ине Отечественной войнасо улиця, авиациянь штурмань Станиславской 565-це полконь 3-це эскадрильянь командир (авиациянь штурмань Жмеринской Краснознамённой 224-це дивизия, авиациянь штурмань 8-це корпус, коштсо тюремань 8-це армия, Украинань 4-це фронт), старшей лейтенант, Советской Союзонь Герой[1].
Эрямо кизэ
Чачсь 1922-це иень медьковонь 4-це чистэ Симбирской губерниянь Орданьбуень уездэнь Тархановской волостень Ведянцы велесэ (ней Мордовиянь Ицялбуе) сокицянь-видицянь покш кудораськесэ. Руз.
Прядынзе Ведянцы велень аволь пешксе средней школанть (1938), Мордовской рабфаконь 1-це курсонть ды теке шкане Саранскоень аэроклубонть (1939), Орданьбуень средней школань 9-це классонть (1940).
1940-це иестэ саезь Якстере Армиясо. Прядынзе Энгельсэнь пилотонь военной авиациянь школанть (1941) ды Краснодаронь военной авиациянь вейсэндязь училищанть (1943). Ине Отечественной войнань фронттнэсэ — 1944-це иень эйзюрковсто саезь. Васня лейтенантокс, мейле старшей лейтенантокс тюрсь кода прявт лётчик, звенань командир, штурман ды штурмань 8-це авиакорпусонь штурмань 224-це авиадивизиянь штурмань авиациянь 565-це полконь авиациянь эскадрильянь командир 2-це ды 8-це коштонь армиятнесэ, Украинань 1-це ды 4-це фронттнэсэ. 1944-це иестэ саезь КПСС-сэ.
Ульнесь Проскуровско-Черновицкой, Львовско-Сандомирской, Карпатской, Краковской, Моравско-Остравской ды Пражской операциятнесэ. 1945-це иень чадыковсто 110 боевой паро ливтямотнень кис тензэ максозель Советской Союзонь Героень лемесь. Войнанть прядовомс «Ил-2» самолётсо 129-ксть ливтнесь разведкас ды ятонь эривийтнень ды техниканть истожамо.
1946-це иестэ саезь шумбрачинзэ коряс запассоль. 1947-це иестэ прядызе Куйбышевань чугункань кинь школань 10-це классонть, 1953-це иестэ — Куйбышевань пединститутонь истфаконть. 1949-це иестэ Куйбышевань областной партиянь кавто иень школанть прядомадо мейле важодсь партиянь ды советэнь органонь аппаратсо — КПСС-нь Куйбышевань горкомсо ды КПСС-нь Куйбышевань обкомсо. Те шкастонть кода партиянь обкомонь важодиця топавтсь Куйбышевань ГЭС-нть стявтоманзо марто сюлмавозь тевть, зярдо пекстазель Равонть прявт чудема тарказо. 1960-це иень ацамковсто ютавтозель Московов РСФСР-сэ КПСС-нь ЦК-нь бюронь Администрациянь, микшнемань-рамсемань ды ярмаконь органонь отделэнь инструкторокс. 1962-це иень эйзюрковсто аравтозель РСФСР-нь Министрань Советэнть пингстэ Архивень прявт управлениянь прявтонь полавтыцякс. 1963-це иень таштамковсто те Управлениянть пекстамодо мейле путозель Гражданской авиациянь Московонь транспортонь управлениянь политотделэнь прявтокс. Те таркасонть важодсь 1968-це иенть пес — топавтсь ливтнематнень парсте аравтомаст ды Московонь Внукова, Домодедова ды Шереметьева аэропорттнэнь стявтомаст марто сюлмавозь тевть.
1969-це иестэ тензэ максозель инвалидэнь колмоце группа, ды сон ютась важодеме СССР-нь Министрань Советэнть пингстэ Архивень прявт управлениянь кадрань отделс. Тесэ меельце 20 иетнень перть ульнесь масторсонок архивень учреждениянь прявт важодицятнень ды специалисттнэнь ёрокчист кастомань кевкстематнень коряс ветиця специалистэкс. Весе эрямонзо перть Романов важодсь 55 иеть.
1989-це иень умарьковсто лиссь пенсияс, эрясь Московсо.
Кулось 2008-це иень панжиковонь 12-це чистэ, калмазь Московсо Троекуровань калмазырьсэ (14-це участка).
Ледстнема
- Райсоветэнть 2003-це иень панжиковонь 30-це чинь 110-це аравтоманзо коряс «Родинанть икеле боевой тевензэ, военно-патриотической тонавтомантень покш путовксонзо ды буесэнть краеведениянть кастоманзо кис» М. Я. Романовнень максозель Ицялбуень почётонь гражданинэнь лемесь.
Казнензэ
- Командованиянть кармавтоманзо парсте топавтомаст кис 1945-це иень аштемковонь 29-це чистэ Романов Михаил Яковлевич старшей лейтенантонтень максозь Советской Союзонь Героень лемесь, казезь Ленинэнь орденэсь ды «Сырнень Теште» медалесь (8590 №).
- Казезь Якстере Знамянь колмо орденсэ, Отечественной войнань 1-це степенень, Якстере Тештень ордентнэсэ, советской ды чехословацкой медальсэ.