Россиянь печатень чи

Россиянь печатень чи
Россиянь печатень чи
	; «Санкт-Петербургонь ведомосттне»
Аравтозь	1991-це иестэ
Тешкстави	эрьва иестэ
Тешкстамонь чись	якшамковонь 13-це чи

Россиянь печатень чись тешкстави якшамковонь 13-це чистэ. Кемекстазь
1991-це иень ацамковонь 28-це чинь Россиянь Федерациянь Верховной Советэнь Президиумонь кармавтомасо ды алтазь «Ведомости» (апак сюлма «Ведомости» неень шкань кулялопанть марто) Россиянь васенце кулялопань нолдамонь ушодовомантень. Кулялопась теезь I-це Петрань кармавтоманзо вельде.
1703-це иень якшамковонь 2-це чистэ (од стилень коряс якшамковонь 13-це чистэ) Московсо лиссь «Санкт-Петербургонь ведомосттне» («Санкт-Петербургские ведомости») неень шкань лемень кандниця рузонь кельсэ кулялопань васенце номерэсь, кона сестэ лемдязель «Московонь Государствасо ды маласо аштиця лия мастортнэсэ торпигень ды лия тевтнеде, конатнень ланга эряви содамс ды ледстнемс» («Ведомости о военных и иных делах, достойных знания и памяти, случившихся в Московском Государстве и во иных окрестных странах»)^[1]. I-це Петра ваннось кулялопанть кода эсь масторсон покш полавтовоматнень кис бороцямосо ды Россиянь империянь кемекстамосо лездамопель.

2009-це иень ушодовомантень Россиянь Федерациясо ульнесь тешкстазь печатень 33 тёжадо ламо изданият. Эрьва чистэ сравтневить 20 миллиондо ламо нолдавкст.

2016-це иень якшамковонь 12-це чистэ Дмитрий Медведев РФ-нь Премьер-министрась казсь 2015-це иенть кис массовой средствань важодемасо Россиянь Правительствань премиянь лауреаттнэнень дипломт. Покш промксось алтазель Россиянь печатень чинтень. Коень коряс 10 премиятнестэ вейкесь максовкшновсь Правительствань Прявтонть мелензэ-арсеманзо коряс. Се иестэ истямо премиясь максовсь Ясен Засурский — МГУ-нь журналистикань факультетэнь президентэнтень СМИ-тнес кастомань покш путовксонть кис. Медведев тешкстась, Засурский ламо иень перть невтсь журналистикань кастомань прявт ёнкстнэнь. Теке марто Правительствань Прявтось явсь мель «Аргументтнэнь ды факттнэнь» специальной теварсевксэнтень, кона алтазель Ине Отечествань войнань шкань дневниктненень. Премьерэнть валонзо коряс, «Аргументтнэнь ды факттнэнь» журналисттнэ ютавтсть покш важодема торпингень шкань эйкакшонь ламо дневниктнень пурнамсто. Медведев лоткась лия лауреаттнэнь важодемаст лангсояк. «Зярс весе кудосот» («Пока все дома») телепрограммань теицятне тешкстазельть «Эйкакшонь видеопаспорт» («Видеопаспорт ребёнка») теварсевксэнь топавтоманть кис, а Ольга Алленова «Коммерсантонь» специальной корреспондентэсь — эйдекс саемасо ды паро тевень теемасо вастневиця стакачитнень зярыя сёрмадовкстнэнь кис. Премият максозельть Лев Иванов-Аннинский литературань содавикс критикентень рузонь литературань критикасо койтнень ванстомань ды кастомань путовксонть кис, ды Эдуард Салагаев Телерадиовещателень раськень ассоциациянь президентэнтень телевидениянь кастомасо путовксонть кис. Александр Логвинович «Заря» Брест ёнксонь (Белоруссия) кулялопань прявт редакторось тешкстазель «внешней ды внутренней политикань, экономикань ды культурань кевкстематнень парсте невтеманть кис». «Од мастор» («Новый мир») журналонь коллективентень максозель казне «отечествань литературань, просветителень тевень ды неень шкань сёрмадыцятнень кирдеманть кис». 2015-це иень премият максозельть региононь кавто СМИ-тнененьгак — «Сургут Информ-ТВ»-нтень ды Воронеж ёнкссто «МОЁ!» кулялопантень. РФ-нь Правительствань премиясь кемекстазель 2005-це иестэ «массовой информациянь печатень средствасо ды важодемань тевсэ кастомань кис». Седе тов тенст вейсэндясть электронной СМИ-тне ды телевидениянь теварсевкстнэ. Эрьва премиянть покшолмазо — 1 миллион целковойть, весемезэ казнеть максозь
10 лауреаттнэнень (башка журналисттнэнень эли коллективтненень)^[2].

Советэнь печатень чи

Печатамонь изданиянь профессиональной покшчись васенцеде ульнесь кемекстазь
СССР-сэ. 1991-це иень якшамковонь 13-це чистэ РСФСР-нь Верховной Советэнь кармавтомасо панжиковонь 5-це чистэ «Советэнь печатень чинть» таркас, кона алтазель «Правда» большевикень кулялопань васенце номерэнь нолдамонтень, ульнесь теезь од лем марто покшчи.

Белоруссиясо «Печатень чинть» тешкстыть панжиковонь 5-це чистэ.

1994-це иестэ саезь эрьва иень панжиковонь 3-це чинть тешкстыть кода Прессань масторлангонь чи.

Теке марто вант

Олячинь печатень масторлангонь чи

Ссылкат

Тешкставкст

↑ Лисовский Н. М. Санкт-Петербургские Ведомости // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
↑ ТАСС: Общество — Медведев вручил дипломы лауреатам премии правительства в области СМИ за 2015 год

[1] Лисовский Н. М. Санкт-Петербургские Ведомости // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.

[2] ТАСС: Общество — Медведев вручил дипломы лауреатам премии правительства в области СМИ за 2015 год

[1]

[2]