Самбонь Весе Россиянь чи

Самбонь Весе Россиянь чи
Самбонь Весе Россиянь чи
Типесь	Государственной покшчи
Аравтозь	2022-це иестэ Владимир Путин Россиянь Федерациянь Президентэнь кармавтомасо
Тешкстави	Россиянь Федерациясо
Тешкстамонь чись	сундерьковонь 16-це чистэ
Зярдо тешкстави	сундерьковонь 16-це чи

Самбонь Весе Россиянь чись — спортонь покшчи, конась Россиянь Федерациясо 2022-це иестэ саезь эрьва ие тешкстави сундерьковонь 16-це чистэ самбонь кода тюремань видтнэнь эйстэ вейкенть кастомга ды кепетемга. Самбонь коряс масторсо те сех покш пелькстамо (пелькстамотне ды покшчинь мероприятиятне ютавтневить весе масторсонть), социальной покшчи, конань вельде спортонтень тердевить седе ламо эйкакшт ды од ломанть.

Сундерьковонь 16-це чись аравтозь 2022-це иень ацамковсто Владимир Путин Россиянь Федерациянь Президентэнь кармавтомасо^[1].

«Самбонь Весе Россиянь чись — те аволь ансяк пелькстамо пелькстамонь кис. Те паро тев важодемс вейке масторонть марто вейсэ вейке командасо. Мероприятиясь ютавтневи эйкакштнень, од ды покш ломантнень пельде самбонтень седе покш мельявоманть кис. Покшчись ютавтневи федеральной тёкшсо. Прявт тевесь — тердемс ламо ломанть Самбонь Весе Россинь чис. Истят пелькстамотнесэ арасть изнязть, эряви самс ды невтемс эсь вийтнень.»
— Сергей Елисеев, самбонь Весе Россиянь федерациянь президент

Косто саевсь покшчись

Самбонь чачома чикс ловови 1938-це иень сундерьковонь 16-це чись, зярдо СССР-нь спортонь комитетэсь нолдась «Вольной стилень (самбонь) кастомадо» 633-це № ало кармавтома ды совавтызе сонзэ масторсо спортонь кастовиця видтнэнь юткс. Спортонь те видэсь появась масторсонок 1923-це иестэ^[2].

Васенцеде келейстэ тешкстамс самбонь кастомань покшчинть арсесть пек ламо иень ютазь. 2008-це иень ожоковонь 19-це чистэ Московсо ютась «Якстере площадьсэ самбонь юбилей» концертэнь ды спортонь покшчи, кона алтазь Россиянь самбонь 70 иетненень. Покшчинь анокстыцякс ульнесть Весе Россиянь ды Московонь самбонь федерациятне. Те мероприятиянтень сакшность ветерант, спортсмент, тренерт, прявтт, самбонь региононь федерациятнень ветицят ды покш инжеть^[3].

2008-це иестэ саезь сундерьковонь ушодкссто эрьва ие Весе Россиянь самбонь федерациясь ютавтнесь «Самбонь чинтень» алтазь ламо ломань марто спортонь мероприятият.

Самбонь Весе Россиянь чи

2015-це иестэ пелькстамотне ютасть Россиянь 100 оштнесэ, эсь виест невтизь
11000-до ламо ушодыця спортсмент, косо пелькстамонь 98 оштнесэ ульнесть региононь телеканалт, СМИ-нь ды интернет-изданиянь важодицят. Се иестэнть тешкстамотне ютавтневсть од лувсо. Пелькстамос сыцятненень эрявсь максомс «Тон анокат ГТО-нь максомантень?» тест, меревсь топавтомс эсь прянь ванстомань коряс приёмт ды элементт, конат совасть «Анокан важодемантень ды идемантень» физкультурань ды спортонь Весе Россиянь комплексэс. Теде башка ульнесть Россиянь Федерациянь сборной субъекттнэнь ютксо командань пелькстамот.

2016-це иестэ пелькстамонь ютавтыцятне анокстасть лия ёнов а молиця каземат ды казнеть. Се иестэнть Самбонь Весе Россиянь чинть тешкстамосо васенцеде ульнесь Донецкой Раськень Республикасто сборной командась.

2017-це иестэ «Самбонь чись» ютась «Самбо-70» Спортонь ды тонавтнемань куншкакуросо. Пелькстамосо эсь виест невтизь 200 сех од спортсментнэ Россиянь Федерациянь федеральной весе округтнень 16 командатнестэ. Эрьгелемачинь панжомсто прявт тематнестэ вейкекс ульнесь космосось. Покш инжекс кармась Фёдор Юрчихин Россиянь Федерациянь Откересь, ливтницясь-космонавтось. Сон максызе Сергей Елисеев Самбонь Весе Россиянь ды Европань федерациятнень президентэнтень космоссо ульниця коцтонть.

Фёдор Юрчихин Россиянь Федерациянь Откересь, ливтницясь-космонавтось максы космоссо ульниця самбонь федерациянь коцтонть

2018-це иесь самбонть туртов кармась юбилеенсекс, тензэ топодсть 80 иеть. Те чистэнть пелькстамотне ды эрьгелемань мероприятиятне ве шкасто ютасть Россиянь 150-де ламо оштнесэ. Юбилеень тешкстамонь лувсо «Лужникинь» Славань аллеясо ютась Анатолий Харлампиев, Василий Ощепков ды Виктор Спиридонов раськень самбонь арсицятнень туртов кеврунгонь юронь путома. Теде башка те чистэнть Владимир Путин Россиянь Президентэсь тешкстась «Россиянь Федерациясо самбонтень кастомань ды кепетемань лездамодо» распоряжения.

2020-це иень ацамковонь 18-це чистэ Московсо «Лужники» комплексэнь Спортонь славань аллеясо ютась самбонь арсицятнень туртов мемориалонь панжома. Монументэсь теезь бронзасто ды гранитстэ. Сонзэ теизе Салават Щербаков Россиянь артыцянть прявтсо скульпторонь коллективесь. Скульптурась невти бороцицятнень, конат теить «ведьгев» ёртома, сынь ветить карксавиця орбитасо вейке-вейкень каршо бороцямо. Орбитасо неявить прявт валтнэ: «Самбось — изнямодо наука». Панжомасо ульнесть Владимир Мединский Россиянь военно-исторической вейсэндявксонь прявтось, Рашид Нургалиев Самбонь Весе Россиянь федерациянь попечительской советэнь прявтось, Олег Матыцин Россиянь спортонь прявтось, Сергей Собянин Московонь прявтось. Ды коень коряс те чистэнть ютасть ламо ломань марто спортонь мероприятият^[4].

2020-це иень ацамковонь 18-це чистэ Московсо «Лужники» комплексэнь Спортонь славань аллеясо панжовсь самбонь теицятненень мемориал

2022-це иень даволковонь 22-це чистэ «Лужники» спортонь комплексэнь Славань аллеясо ютась самбонь арсицятненень стелань панжома. Стелась ашти Самбонь мемориалонть эйстэ зярыя метрань ютазь.

2022-це иень ацамковонь 19-це чистэ Владимир Путин Россиянь Президентэнь кармавтомасо покшчинтень максозь Весе Россиянь лем.

2023-це иестэ самбось тешкстась 85 иеть. 2023-це иень сундерьковонь 15-це чистэ саезь 17-це чис пелькстамотне ютасть Россиянь 100 ошсо. Тешкстамонь сех покш мероприятиякс кармась «Шкась изнямс» форумось, косо кемекстазь Россиянь сборноень коцтось, пежетькстамось ды самбистэнь кодексэсь. Сундерьковонь 16-це чистэ ютась самбонь 85-це иентень алтазь маркань тешкстамо. Маркась нолдазь Россиясо «Спортонь видт» сериянть лувсо. Маркань васенцеде тешкстамодонть башка мереви рамамс вейксэ блоктнестэ маркат. Почтань маркань нолдавксонтень башка нолдазь васенце чинь конвертт ды теезь Московонть ды Санкт-Петербургонть туртов штемпельть ды картмаксимум. Теде башка 2023-це иень сундерьковонь
16-це чистэ Рашид Нургалиев Россиянь Федерациянь Зыянтомочинь советэнь секретарень васенце полавтыцясь, Самбонь Весе Россиянь федерациянь попечительской советэнь прявтось «Лужникисэ» Самбонь ды боксонь раськеютконь куншкакуросо казсь знамя Сергей Елисеев Самбонь Весе Россиянь федерациянь президентэнтень^[5].

Самбонь 85 иетненень марка ды конверт

2024-це иестэ ютась «Самбось весень туртов» Весе Россиянь самбонь чинтень алтазь Весе Россиянь фестивалесь. Сон ютавтневсь 2024-це иень сундерьковонь 11-це чистэ саезь 17-це чис тонавтнема таркатнесэ. Фестивальсэнть анокстазь сюпав программа, косо самбонь пелькстамотнеде башка спортонь эстафетат, ГТО-нь вешематнень максома, тренировкань ютавтомат. Спортонь покшчисэ ульнесть тонавтнемань таркатне, «Zа самбо» Весе Россиянь теварсевксэнь «Самбось ВУЗтнэс» ды «Самбось Профтнес» пелькстнэнь улицятне. Ламо ломань марто спортонь мероприятиясо эсь виест невтизь:

тонавтнема таркатнестэ 7-18 иесэ тонавтницят;
«профобразованиянь студентт» — 15 иестэ саезь 18 иес;
«ВУЗтнэнь студентт» категориясо — 18 иестэ саезь 25 иес тёкш ды профессиональной таркатнестэ тонавтницят;
«специалистт» категориясь: административной кадрат, физической культурань тонавтыцят (преподавательть), дополнительной тонавтомань педагогт ды тонавтома таркатнесэ тонавтомань-судиянь составось — иетнень коряс кардамовтомо^[6].

Коень коряс 2024-це иень «Самбонь Весе Россиянь чись» ютась Московсо. Эсь виест невтизь Россиянь 15 регионсто 12 иестэ саезь 14 иес од ломанть^[7].

2024-це иень сундерьковонь 19-це чистэ Сочи ошсо «Самбонь Весе Россиянь чись»

2024-це иень сундерьковонь 19-це чистэ Сочисэ ютась кудораськень-спортонь покшчинь «Самбониада», кона алтазель «Самбонь Весе Россиянь чинь» тешкстамонтень. Мероприятиясо, конань смустезэ лавшо шумбрачи марто эйкакштненень лездамосо, ульнесть Самбонь адаптивной куншкакуросто эйкакшт ды Сочистэ самбонь федерациянь спортсмент. Коень коряс изницякс кармась эрьва пелькстыцясь ды казезель медальсэ ды шнамо конёвсо^[8].

Мероприятият

Коень коряс те покшчистэнть ютавтневить пелькстамот. Покшчинь панжовомсто ютавтневи присяга — спортонь школатнень од трявкстнэ ёвтыть спортонь эсь видэнтень вечкемга кемечинь валт.

Мельстуиця фактт

Официальной кемекстамо — Оружиявтомо эсь прянь ванстомась панжовсь Московсо 1923-це иестэ, ансяк спортонь официальной видэкс самбось кармась 15 иень ютазь — 1938-це иестэ.

Васенце тешкстамо — Самбонь Весе Россиянь чинть васенцеде тешкстызь сестэ, зярдо спортонь те видэнтень топодсть
70 иеть — 2008-це иестэ. Ожоковонь 19-це чистэ Московсо ютась «Якстере площадьсэ самбонь юбилей» концертэнь ды спортонь покшчи.

Россиясо самбонть статусозо — 2003-це иестэ Госкомспортось ёвтызе самбонть Россиясо раськень ды спортонь сех бойкасто касыця видтнэнь эйстэ вейкекс.

Самбонь теицятненень кеврунго — 2018-це иестэ самбонь 80-це иень тешкстамсто «Лужникинь» Славань аллеясо ютась те спортонь видэнть арсицятнень туртов кеврунгонь юронь путома. Официальнойстэ мемориалонть невтизь 2020-це иень ацамковонь 18-це чистэ.

Самбось — спортонь олимпиадань вид — 2021-це иестэ Олимпиадань раськеютконь комитетэсь ловизе самбонть олимпиадань спортонь видэкс. Ансяк олимпиадань программас самбось зярс апак совавто.

Зяро иестэ мереви ушодомс якамо самбов? — Самбонь коряс спортонь школань секциятнес эйкакштнень сайнить 10 иестэ. Кой-кона секциятне терднить седе од шкань спорстмент. Ансяк мартост тренертнэ ютавтнить самбонь элементт марто физической вейсэнь анокстамо, секс мекс вишка эйкакштнень туртов самбонь коряс кемекстазь программа арась^[9].

Тешкставкст

↑ Указ президента Российской Федерации "О Дне самбо" №924 (неопр.). www.publication.pravo.gov.ru. Дата обращения: 19 Ацамковонь 2022.
↑ Путин ввел в России День самбо (неопр.). www.sportrbc.ru. Дата обращения: 19 Ацамковонь 2022.
↑ Всероссийская федерация самбо (неопр.). www.sambo.ru.
↑ В Москве открыли мемориал основоположникам самбо (неопр.). www.iz.ru. Дата обращения: 18 Сундерьковонь 2020.
↑ "Время побеждать". Русскому национальному единоборству самбо - 85 лет (неопр.). www.tass.ru. Дата обращения: 16 Сундерьковонь 2023.
↑ Всероссийский фестиваль «САМБО ДЛЯ ВСЕХ», посвященный Всероссийскому дню самбо (неопр.). www.sportobr.ru.
↑ Финал турнира "Всероссийский день самбо – 2024" состоялся в Москве (неопр.). www.m24.ru. Дата обращения: 20 Сундерьковонь 2024.
↑ В городе Сочи прошла праздничная семейно-спортивная «Самбониада», приуроченная к празднованию Всероссийского дня самбо! (неопр.) www.sambo.ru. Дата обращения: 19 Сундерьковонь 2024.
↑ Всероссийский день самбо в 2024 году: история и традиции праздника (неопр.). www.kp.ru.

Ссылкат

Всероссийская федерация самбо Официальный сайт.

[1] Указ президента Российской Федерации "О Дне самбо" №924 (неопр.). www.publication.pravo.gov.ru. Дата обращения: 19 Ацамковонь 2022.

[2] Путин ввел в России День самбо (неопр.). www.sportrbc.ru. Дата обращения: 19 Ацамковонь 2022.

[3] Всероссийская федерация самбо (неопр.). www.sambo.ru.

[4] В Москве открыли мемориал основоположникам самбо (неопр.). www.iz.ru. Дата обращения: 18 Сундерьковонь 2020.

[5] "Время побеждать". Русскому национальному единоборству самбо - 85 лет (неопр.). www.tass.ru. Дата обращения: 16 Сундерьковонь 2023.

[6] Всероссийский фестиваль «САМБО ДЛЯ ВСЕХ», посвященный Всероссийскому дню самбо (неопр.). www.sportobr.ru.

[7] Финал турнира "Всероссийский день самбо – 2024" состоялся в Москве (неопр.). www.m24.ru. Дата обращения: 20 Сундерьковонь 2024.

[8] В городе Сочи прошла праздничная семейно-спортивная «Самбониада», приуроченная к празднованию Всероссийского дня самбо! (неопр.) www.sambo.ru. Дата обращения: 19 Сундерьковонь 2024.

[9] Всероссийский день самбо в 2024 году: история и традиции праздника (неопр.). www.kp.ru.

[1]

[2]

[3]

[4]

[5]

[6]

[7]

[8]

[9]