Седойкин, Михаил Григорьевич
| Михаил Седойкин | |
|---|---|
| Чачомсто лемезэ | Михаил Григорьевич Седойкин |
| Чачома чизэ | 1960-це иень сундерьковонь 4-це чи (65 иеть) |
| Кулома чизэ | 2022-це иень панжиковонь 4-це чи (61 ие) |
| Важодемань ёрокчизэ | Морыця, седиця |
| Тетязо | Григорий Николаевич |
| Авазо | Мария Алексеевна |
Михаил Григорьевич Седойкин (1960-2022) — морыця, седиця.
Чачсь 1960 иень сундерьковонь 4 чистэ Мордовия Республикань Дубёнкань буень Кенде велесэ.
1976 иестэ мольсь тонавтнеме Саранонь музыкань училищав дирижёронь ды хоронь куроc. Морамонь тевентень тонавтнесь Дмитрий Еремеев РСФСР-нь заслуженной артистэнть пельде, кона се шкане важодсь Саранонь музыкальной театрань прявтокс. 1980 иестэ тонавтнемань прядомадо мейле Михаилэнь саизь армияв. Цёрась понгсь Васоло Чилисемав. Амур-лангсо-Комсомольск ошсо служась полковой оркестрасо, седясь валторнасо.
2004 иестэ лиссь «Филантроп» раськеютконь премиянь лауреатокс. Морась Россиянь Вишка театрасо, Женевасо, Лозаннасо. Кавксть тердтнизь Китаев. Сеедьстэ морсесь ошонь покшчитнесэ.
Михаил Седойкин парсте седясь гармониясо, баянсо. Вечксь морсеме раськень морот ды эрзякс ютавтозь рузонь морот. Теке марто морась Магомаевень, Кобзононь, Захаровонь репертуарсто. Интернетсэ совась «Эрзянь вал» пурнавксонтень, косо ламот тензэ пшкадсть морамс мезеяк тиринь, эрзянь. Римма Жегалина Покш Игнадбуень эрзянь келень тонавтыцясь кучсь тензэ рузонь кельстэ содавикс моротнень ютавтовкст. Эрзянь аванть энялдоманзо коряс варчнесь сынст морамс. Ды те лиссь пек парсте. Вана ёвтазель весементь коряс:
Эрян Амур-лангсо-Комсомольск ошсо 30 иеть. Эрзякс кортамс тунь а кинь марто. Келенть малав стувтыя. Интернетэнь коряс весе сёрмадыть тень эрзякс. Васня тень стакаль, а чарькодилинь весе валтнэнь. Ней аламонь-аламонь тонадовсь, бажан максомс каршо валт эрзякс. Сюконян Римма Дмитриевнанень. Сонзэ арасть музыкань содамочинзэ, ансяк ялатеке эрьва валонть ладясы мелодиянтень ды весемесь морави шождасто. Пароль морамс мезеяк неень композитортнэнь, ули истямо мелем.
Кулось 2022 иень панжиковонь 4 чистэ Амур-лангсо-Комсомольск ошсо инфаркто.