Сэтьмечинь раськеютконь чи
| Сэтьмечинь раськеютконь чи | |
|---|---|
| Зярдо ютавтневи | Таштамковонь 21-це чи |
 Сэтьмечинь раськеютконь чи | |
Сэтьмечинь рачькеютконь чи (ООН-нь официальной лия кельтнесэ: англ. International Day of Peace, ар. اليوم العالمي للسلام, исп. Día Internacional de la Paz, кит. 国际和平日, фр. Journée internationale de la paix ) — тешкстави 2002-це иестэ саезь таштамковонь 21-це чистэ. Ульнесь кеместазь ООН-нь Генеральной Ассамблеянь 36-це покш промкссо (1981-це иень сундерьковонь 30-це чистэ A/RES/36/67 № резолюциясо).
Васняяк покшчись тешкставсь таштамковонь колмоце вастаньчистэ (овторникстэ) — ООН-нь Генеральной Ассамблеянь эрьва иень покш промксонь панжовомань чистэ. Таштамковонь 21-це чистэ Сэтьмечинь раськеютконь чинть тешкстамодо арсемась кемекстазь ООН-нь Генеральной Ассамблеянь 55-це покш промкссо (2001-це иень таштамковонь 28-це чистэ A/RES/55/282 № специальной резолюция).
Генеральной Ассамблеясо те покшчись тешкстави кода весе масторонть лангсо нарьгамонь ды толонь лоткавтоманть эйстэ чи. Весе мастортнэнень ёвтазь те чистэнть торпингень тевдеемань а ютавтомадо мель.
Эрьва иень таштамковонь 21-це чистэ ООН-со ютавтневить эрьва кодат покшчить, конат коень коряс ушодовить Сэтьмечинь баяганть вакссто. Весемесь панжови ООН-нь Генеральной секретаренть пшкадемасто, теде мейле кортыцясь вачкоди баягас. Седе тов, чатьмонемань минутадо мейле, пшкадема марто корты ООН-нь Зыянтомочинь советэнь прявтось. Те чистэнть ютавтови апак регистрировазь леднемапелень максома, чувтонь озавтома, шумбрачинь ванстомань тевть, спортонь покшчить.
Содавиксэкс покш теевема ды касома тейсь «Peace One Day» («Сэтьмечинь вейке чи») аволь коммерческой вейсэндявксось, кона бажи топавтомс-ютавтомс весе масторонть лангсо нарьгамонь ды толонь лоткавтоманть эйстэ чинть эрьва иень покшчинь койтнень.
Те чистэнть кочказь тематне
- 2022-це ие — «Прядомс расизманть марто. Теемс сэтьмечи».
- 2021-це ие — «„Икельцеденть седе вадря“» арсеманть коряс вельмевтема».
- 2020-це ие — «Вейсэ сэтьмечинтень».
- 2019-це ие — «Сэтьмечинть кис пертьпельксэнтень паро тевдеемат».
- 2018-це ие — «Сэтьмечинть лангс права: Ломанень правань весеме ёндонь декларациянть кемекстамодо мейле 70 иеть».
- 2017-це ие — «Вейсэ сэтьмечинть кис: арнема, зыянтомочи ды весень туртов мелень путома».
- 2016-це ие — «Покш кастомасо путовкст: сэтьмечинь теиця зярыя ёнкст».
- 2015-це ие — «Сэтьмечинть кирдемга ялгаксчись — эрьванть сех паро тевезэ».
- 2014-це ие — «Раськетнень сэтьмечинть лангс права».
- 2013-це ие — «Сэтьмечинть ёнкссо тонавтома».
- 2012-це ие — «Кеме сэтьмечи сыця шкань кеме сэтьмечинть кис».
- 2011-це ие — «Сэтьмечи ды демократия: ёвтык эсь мелеть».
- 2010-це ие — «Од ломантне сэтьмечинть ды касоманть кис».
- 2009-це ие — «Леднемапелень а нолдамо ды а кастома».
- 2008-це ие — «Ломанень прават ды сэтьмечинь кирдема».
- 2007-це ие — «Сэтьмечись — Раськень Вейсэндязь Вейсэндявксонь (ООН-нь) сехте покш тев».