Таганов, Дмитрий Анатольевич

Таганов Дмитрий Анатольевич, эрзянь валморонь содавикс сёрмадыця

Эрямозо

Дмитрий Анатольевич Таганов чачсь 1972-це иень якшамковонь 2-це чистэ Оренбург ёнксонь Северной буень Боризвелесэ. 1980-це иестэ кудораськенек ютасть эрямо Нижнекамск ошов (Татарстан), косо прядызе средней школанть. Седе мейле тонавтнесь Бугуруслан ошонь медучилищасо, прядызе Оренбургонь медицинань академиянть (1998). Важодсь Бугурусланонь райононь больницясо анестезиологокс-реаниматологокс (1998–2001), мейле – реанимациянь отделениянь ветицякс (2001–2013), прявтонь полавтыцякс (2013–2015), 2015-це иестэ ладязель теке больницянь прявт врачокс. 2021-це иестэ саезь важоди Москов ёнксонь Руза ошонь больницясо прявт врачонь полавтыцякс ды анестезиологокс-реаниматологокс.

COVID-19 орманть изнямга тевензэ кисэ казезь «Медицинский Олимп Оренбуржья» Оренбургонь Губернаторонь премиясо, Бузулуконь ды Сорочинскоень Алексий епископонть пельде медальсэ.

Шкинемазо

Валонзо коряс, литературанть вакска тензэ ютамс а кодаль. Авазо тонавтсь школасо рузонь кель ды литература, кудосост свал ульнесть ламо книгат ды журналт. 1986-це иестэ теевсь содавиксэкс «Сятко» журналонть марто ды се шкастонть саезь свал ловнось сонзэ. 1989-це иестэ зярыя сёрмадовксонзо кучинзе редакцияв, ды курок сынь лиссть ломанень сельме икелев. Те седеяк кастызе сёрмадомань мелензэ. Аламонь-аламонь теевсь содавиксэкс Мордовиянь ды Оренбургонь сёрмадыця ломантнень марто. Кармась сакшномо Саранскоев од сёрмадыцянь семинартнэс. Васенцеде те ульнесь 1993-це иестэ. Весе те макссь покш лезэ ды вийть молемс седе тов шкинемань киванть.

1997-це иестэ Мордовиянь книгань издательствасо лиссь «Сола вал» васенце книгазо. Мейле нолдазельть «Седейсэ тарка» (2009) ды «Тундонь пиземе» (2015) пусмонзо. Валморонзо максневить «Сятко», «Чилисема», «Мокша», «Странник» журналтнэсэ, «Гостиный двор» альманахсо, совасть ламо вейсэнь пусмос.

Дмитрий Таганов — С. Т. Аксаков лемсэ литературань премиянь лауреат. 2007-це иестэ саезь Россиянь Сёрмадыцянь вейсэндявкссо.