Тимохина, Татьяна Дементьевна

Тимохина, Татьяна Дементьевна

Тимохина Татьяна Дементьевна, эрзянь содавикс сёрмадыця

Эрямозо

Эрзянь содавикс сёрмадыцясь Татьяна Дементьевна Тимохина (тейтерькс Имайчева) чачсь 1930-це иень сундерьковонь 2-це чистэ неень Мордовия Республикань Орданьбуе ёнксонь Канаклейка велесэ. Прядсь Козловкань педучилища (1948). Аламос кенерсь важодеме школасо тонавтыцякс, Саранскоень аэропортсо метеорологокс (1947—1949). 1949-це иестэ лиссь мирденень ды тусь эрямо Челябинскоев.

Кулось 2000-це иень ацамковонь 9-це чистэ, калмазь Челябинск ошсо.

Шкинемазо

Сёрмадомань сяткось редявсь эйсэнзэ уш вишкинестэ. Войнань шкане сёрмалесь седейс токиця сёрмат велень весе цёраломантненень аваст ды нист пельде. Войнав сёрматнеде мейле сёрмалесь эсензэ туртов. Уцясказонзо, Челябинскоень металлургиянь заводсо ульнесь литераторонь вейсэндявкс. Весть тов саизеяк ялгазо. Тосо Т. Тимохина теевсь содавиксэкс Валентин Сорокин, Вячеслав Богданов, Атилла Садыков ды лия сёрмадыцятнень марто. Кортнесть литературань тевтнеде, толковасть сёрмадовксост. Т. Тимохинань сёрмадовксонзо ульнесть эрзякс, ловномс сынст вейсэндявкссонть ульнесь а кинень. Ансяк сонзэ вельть покшоль мелезэ марямс эйстэст чарькодиця ломанень вал. Те кармавтызеяк ушодомс рузонь кельсэ сёрмадомо. Ансяк тиринь келензэяк сон эзизе стувто, теевсь кавто кельсэ сёрмадыцякс.

Эрзянь кельсэ васенце ёвтнемазо («Атякш») ды ёвксозо («Туво ды Атякш») лиссть «Сурань толт» (ней – «Сятко») журналсо (1958). 1962-це иестэ нолдазель «Письмаронь варштавкс» ёвтнемань пусмозо. Весемезэ эрзянь ды рузонь кельсэ лиссть ёвтнемань ды ёвксонь комсешка книганзо. Ютксост: «Лизань тештезэ» (1964), «Хрусталень пилекст» (1965), «Кортыця граць» (1967), «Чевте варштавкс» (1975), «Авардиця каткине» (1976), «Сёвныця котат» (1978), «Розовой пель» (1986) – эрзянь кельсэ; «Учительница» (1963), «Пирожки с заплатами» (1965), «Лизина звезда» (1966), «Нервный» (1968), «Говорящий грач» (1970), «Почему Никита волка не убил» (1972), «Я исправился» (1975), «Мои хорошие друзья» (1978), «Розовое облако» (1979), «Солёный мёд» (1983), «Олина бабушка» (1985) – рузкс.  Сынь нолдазь Саранскойсэ, Московсо, Челябинскойсэ. Весе алтазь эйкакштненень.

1968-це иестэ Т. Тимохина совавтозель СССР-нь сёрмадыцянь вейсэндявксос.

Эрзянь литературоведтнэнь мелест коряс, минек эйкакшонь литературась Т. Тимохинань сёрмадовкстомо улевель ков седе кажовокс. Сон маштсь эйкакшонь ойменть чарькодеме, вишкинетнень мелявксост ды кенярксост нееме-марямо ды апак тонавтояк парос тонавтомо. Истямо ёрокчись максневи аволь эрьва сёрмадыцянтень.