Шагаа
| Шагаа | |
|---|---|
 |
Шагаа (Шаг Аазы) — ковонь ды чипаень ковкерьксэнть коряс тувинэнь Од ие, коень-кирдань покшчи, кона невти од эрямонь ушодкс; чачомань, одкстомтомань ды ванькскавтомань тешкс. Ютатомань вейкине чи арась, весемесь ютавтневи якшамковонь прядовомсто саезь даволковонь прядовомас кодамо-бути чистэ.
Тешкстамонь койть ды кирдат
Шагаа покшчинть смустезэ ашти «шагның чаазы» эсензэ лементь эйсэ, кона ютавтови кода од пельксэнь, од ёнксонь, одкстомтомань ушодкс. Тыва Республикань Государственной архивсэ Шагаа покшчиденть васенце ледстнематне вастневить 1861-це иестэ «Танну-Урянхаень (Тувань) нойонтнэнь тевветямо» архивень фондонь тевконёвтнесэ, Танну-Урянхай мээрен чангы Ламажапа Угер-даа Очуру прявтонь кармавтомасо. Шагаа раськень покшчись официальнойстэ кемекстазь 1999-це иень даволковонь 12-це чистэ «Тыва Республикань эрьгелема читнеде» 143-це № законсо[1][2].
Теке марто покшчинть тешкстыть Чилисема ёнксонь ламо раськетне: китаецтнэ, монголтнэ, буряттнэ, тувинецтнэ, алтаецтнэ ды лиятне. Тень пингстэ астрологиянь ловоматнень коряс эрьва кодат мастортнэсэ покшчинть ютавтоматне а прыть вейке чистэ[3].
Те Од иень покшчияк, иень васенце ковоська, кона панжи тундонть. Тувинецтнэнь те покшчинть ланга ледстнематне кандовить минек эрямонь VI-це—VIII-це пингетненень. Покшчинь ютавтома чинь кемекстазь чизэ арась, ансяк весемесь ютавтневи косо-бути якшамковонь прядовомсто саезь даволковонь прядовомас. Шагаа ловови кезэрень покшчикс ды сонзэ улить тешкстамонь эсензэ коензэ[4].
Тешкстамонтень анокстамось ушодови вейке таргодо икеле. Аалсо, эрьва юртасо (кудосо) весементь ванькскавтыть, шлить, урядыть, таргави сех вадря ды мазый оршамось[5].
Покшчинь свалшкань коекс ловои тантей ярсамопелесь. Башка таркасо аштить ловсосто ярсамотне ды эйстэст теевкстнэ. Те ловсо марто чай, хойтпак (салтозь ловсо), курут (костязь топо), быштак (сыра). Сывеленть, ловсонь ярсамопельтнень ды лия ярсамотнень — сёксестэ таштазь весе ярсавкстнэстэ анокстави тантей каванямо[6].
«Чолукшуур» шумбракстнемань коень ютавтома
Шагаань ютавтома шкасто эряви ютавтнемс чолкшур шумбракстнемань коенть[7]. Эряви тешкстамс, чолукшуронть ютавтнесть иезэнзэ ансяк весть. Чолукшуронь ютавтнемстэ кортасть:
«Амыр менди!» — Сэтьмечи тенк!
Тень каршо ёвтасть:
«Сол менди!» — Тыненкак сэтьмечи!
Неть шумбракстнематне ютавтневсть башка тевдеематнень марто. Иень коряс сех вишкинесь венсти кавто кедензэ кедьлапатнень ёндо верев, покшось путы сынст лангс эсь кедьлапанзо верде. Те шумбракстнемасонть невтеви домка арнема, мелень ванома, стака шкасто лездомо пежетькстамо ды лездамо[8].
«Саң салыры» коесь
Саң салыр коесь — те оймевийтненень иень парсте прядовоманть ды паролгавтоманть кис сюконямонь тантей ярсамонь пелькст[9]. Тень туртов кирвазтезель коень толбандя, конань аравтокшнылизь ванькс ды вере таркасо. Толбандяс пенгетнень кочкить домкасто ваннозь. Улезт сынь видекс, парокс, ваньксэкс ды морговтомокс. Кирвазтезь толбандянть лангс путыть междевелень тарад, седе тов ашо ярсамопель, ёвтавить паронь арсемань валт, тень пингстэ сюконить ды вешить сы иестэнть паро эрямо.
Тешкставкст
- ↑ О праздничных днях Республики Тыва. docs.cntd.ru.
- ↑ Шагаа — традиции и обычаи. Порядок проведения. TMG news (5 Даволковонь 2020). Дата обращения: 29 Сундерьковонь 2024.
- ↑ Календарь народных праздников. Ethnomuseum.ru. Дата обращения: 29 Сундерьковонь 2024.
- ↑ Курбатский Г.Н. Тувинские праздники. Шагаа. — Кызыл: Тувинское книжное издательство, 1973. — С. 3—20. — 80 с.
- ↑ Из истории празднования Шагаа в Туве. Национальный архив Республики Тыва (23 Якшамковонь 2019).
- ↑ Шагаа: истоки и традиции. Материалы Круглого стола, посвященного празднику Шагаа. Блюда Шагаа. — Кызыл: ТИГПИ, 2015.
- ↑ Кенин-Лопсан М.Б. Традиционная культура тувинцев. Шагаа. — Кызыл: Тувинское книжное издательство, 2006. — С. 140—144. — 232 с.
- ↑ Как встречать Шагаа. Mkyzyl.ru. Дата обращения: 29 Сундерьковонь 2024.
- ↑ Кужугет А.К. Круг знания. Научно-информационный журнал. Вып. I. Шагаа. — 1998.
Ссылкат
 | Те сёрмадовксонть лангс а нежедить РУВИКИ-нь лия сёрмадовкстнэ. |