Энергетикень чи
| Энергетикень чи | |
|---|---|
 750 кВ-нь коштонь ЛЭП-нь кирдемкань колмо палманень анкерно-углововой неже, строямотне ХХ-це пингень 80-це иетнень прядовомань, СССР | |
| Типень коряс | Профессиональной покшчи |
| Аравтозь | СССР-нь Верховной Советэнь Президиумонь кармавтомасо |
| Косо тешкстави | Россиясо, Украинасо, Белоруссиясо, Армениясо, Казахстансо, Киргизиясо, Таджикистан |
| Зярдо ютавтневи | Ацамковонь 22-це чистэ |
| Кода сеедьстэ тешкстави | Ацамковонь 22-це чистэ, Казахстансо — ацамковонь колмоце таргочистэ |
| Мезе марто сюлмазь | ГОЭЛРО-нь планонь кемекстамонть марто |
 Энергетикень чи | |
Энерге́тикень чи — энергетикань промышленностень важодицятнень профессиональной покшчи, кона сюлмазь электрикань ды лембе энергиянь таргамонть-тееманть, максоманть ды саицятненень пачтямонть марто. Теде башка покшчинть тешкстыть вузонь ды ссузонь те профилень направлениянь прядыцятне, студенттнэ, тонавтыцятне, сеть оштнень эрицятне, косо энергетикань тевесь ашти прявт отраслякс[1].
Покшчись тешкстави 1966-це иестэ саезь. Оймсема чикс а ловови.
Покшчинть ланга
1966-це иестэ Советэнь Союзсо Энергетикень чинть тешкстызь васенцеде.
1980-це иень ожоковонь 1-це чистэ СССР-нь Верховной советэнь Презизидиумось нолдызе «Эрьгелемань ды ледстнемань читнеде» 3018-це № ало кармавтоманть. Сонзэ нолдамозо алтазь Россиянь электрификациянь кемекстазь Государственной планонть (ГОЭЛРО-нть)[1][2] иень топодема чинтень.
ГОЭЛРО-нь планось анокстазель теезь башка комиссиясо, конань правтокс кармась Глеб Кржижановский академикесь. 1920-це иень ацамковонь 22-це чистэ Весе Россиянь советэнь VIII-це съездэнть ютавтомсто невтезь планось кемекстазель. Те чистэнть саезь ушодовсь СССР-нь энергетикань системанть эрямокизэ. Ды те тевентень 1966-це иестэ алтазь Энергетикень кемекстазь чинть ушодовомась[3].
1980-це иетнестэ эрьгелема чинть ютавтнемазо полавтневсь. 1980-це иестэ сонзэ официальнойстэ аравтызь ацамковонь колмоце таргочинтень ды сон свал понговоль оймсема чис. Ансяк те чись эзь кемекставо. Коень коряс энергетиктне тонадсть эсь покшчист тешкстамо ацамковонь 22-це чистэ[1].
СССР-нть каладомадонзо мейле Россиясо официальнойстэ лоткасть тешкстамо Энергетикень чинть. Ды ансяк 2015-це иень ацамковонь 21-це чистэ лиссь Россиянь Федерациянь Правительствань 1396-це № кармавтомась, кона одс аравтызе Энергетикень чинть ацамковонь 22-це чистэ[1].
Россиядо башка те профессиональной покшчись тешкстави Содружествань государствень аволь зависимой мастортнэсэ (СНГ-сэ): Армениясо, Белоруссиясо, Киргизиясо, Украинасо[4]. Казахстансо сон понги ацамковонь колмоце таргочинтень[5].
Покшчинть смустезэ
Энергетикень чись — экономикань кастомасо, ломантнень эрямост паролгавтомасо энергетикень промышленностьсэнть важодицятнень теевксэст тешкстамо. Эряви меремс, энергетиктнень профессиональной покшчист сави иень сех нурькине чинть лангс — телень чинь аштема чис, зярдо Пелевеёнксонь полушариясонть энергетиктнень важодемаст неяви сехте пек[6].
Коень коряс Россиянь Президентэсь ёвты поздоровт энергетиктнень профессиональной покшчинть марто. 2022-це иестэ Владимир Путин ёвтась сюкпрянь валт энергетикань отраслянь важодицятненень Донбассонь, Запорожьянь ды Херсононь ёнкстнэсэ яжазь-тапазь калавтозь энергосистемань витемасо покш путовксонть кис[7].
Койтне
Россиясо Энергетикень чись тешкстави эрьва ие малав эрьва ошсо. Ацамковонь 22-це чистэ весе масторонок келес ютыть покшчинь концертт ды эрьгелемань мероприятият, косо тешкстыть энергетикань отраслянь сех паро важодицятнень. Предприятиятне те чинтень анокстыть профессиональной мастерствань пелькстамот, тематикань невтемат[6].
Коень коряс прявт событиятне ютыть Московсо. Покшчинь мероприятиятнес якить прявтошонь кирдивийтне ды содавикс артисттнэ. Сех паро важодицятнень казить почётонь грамотасо, медальсэ ды премиясо[6].
Россиянь энергетикань система
2020-це иень даннойтнень коряс, Россиянь электроэнергетикань системась ловови сехте покштнестэ вейкекс. Территориянь перька саевксэнть коряс сон васенце, а электроэнергиянь таргамонь-теемань коряс ашти нилеце таркасо. Россиянь Энергетикань единой системас (ЕЭС-с) совить региононь 70 энергосистемат, конат куронь-куронь пурназь ды вейсэндязь сисем энергосистематнес: Восток, Сибирь, Урал, Средней Волга, Юг, Центра ды Северо-Запад. Сынь важодить вейсэнь лувсо, эсь ютковаст вейсэндязь ламо вольтонь электропередачань линиясо 220—500 кВ напряжения марто. Россиянь весе электростанциятнень вейсэнь мощностест (конатнеде лововить вейке пель марто тёжадо ламо) малав 240 ГВт. Иезэнзэ сынь теить 1 053,8 миллиардт кВт/ч электроэнергия[6].
Теке марто вант
- Модаоень, газонь ды топливань промышленностень важодицянь чи
- Шахтёронь чи
- Шофёронь чи
- Металлургонь чи
Тешкставкст
- ↑ 1 2 3 4 День энергетика. Министерство энергетики и жилищно-коммунального хозяйства Кировской области. Дата обращения: 19 Ацамковонь 2023.
- ↑ П. Г. Грудинский. Первый съезд советских электротехников. К 60-летию 8-го Всероссийского электротехнического съезда. Журнал «Электричество» 1981 г., № 10 (Ожоков 1981). Дата обращения: 19 Ацамковонь 2023. Архивировано 20 Таштамковонь 2016 года.
- ↑ Алексей Ханин. День энергетика в России: История, традиции, интересные факты и идеи для подарков. Российская газета (13 Ацамковонь 2023). Дата обращения: 19 Ацамковонь 2023.
- ↑ День энергетика. Какой Сегодня Праздник. Дата обращения: 19 Ацамковонь 2023.
- ↑ Перечень профессиональных и иных праздников в Республике Казахстан (утверждён Указом президента Республики Казахстан от 20 января 1998 года № 3827). Архивень копия 17 Чадыковонь 2022 на Wayback Machine Информационно-правовая система нормативных правовых актов Республики Казахстан «Әділет» // egov.kz
- ↑ 1 2 3 4 Александра Егорова. День энергетика в 2023 году: история и традиции праздника. Комсомольская правда. Дата обращения: 19 Ацамковонь 2023.
- ↑ Путин отметил особый вклад энергетиков в восстановление новых регионов России. ТАСС (22 Ацамковонь 2022). Дата обращения: 19 Ацамковонь 2023.
Ссылкат
- Справка. День энергетика в России. «РИА Новости»