Юристэнь чи
| Юристэнь чи | |
|---|---|
| Зярдо ютавтневи | ацамковонь 3-це чи |
Юристэнь чи — юристтнэнь профессиональной покшчи, сень лангс апак вано, косо сынь важодить.
Кода тешкстави Россиясо
Россиясо Юристэнь чись тешкстави ацамковонь 3-це чистэ.
Покшчись ульнесь кемекстазь 2008-це иень даволковонь 4-це чистэ «Юристэнь чинь аравтомадо» Россиянь Федерациянь Президентэнь 130-це № Кармавтомасо. Теде икеле Россиясо эзь ульне юристтнэнь марто сюлмазь вейсэнь вейкине покшчи. Ульнесть ансяк юристэнь кой-кодат категориятнень туртов покшчить.
Вейке арсеманть коряс, ацамковонь 3-це чись кочказель а стяко, секс мекс ташто стиленть коряс 1864-це иень сундерьковонь 20-це чинь сюконьчистэ (лиякс меремс, од стиленть коряс ацамковонь 3-це чистэ) Россиясо кемекстазельть судебной уставонь ды закодательной лия актонь зярыя тевконёвт, конат кармасть судебной реформань юрокс, ды 1917-це иенть видьс Россиянь юристтнэ те чинть ловсть эсест профессиональной покшчикс. Ацамковонь 3-це чись, кона 2008-це иень даволковонь 4-це чистэ Россиянь Федерациянь Президентэнь 130-це № Кармавтомасо ёвтазь «Юристэнь чинь аравтомадо» ды одс ёвтазь 2005-це иень ожоковонь 12-це чистэ «Санкт-Петербургсо покшчинь ды ледстнемань читнеде» Санкт-Петербургонь 555-78-це № Законсо, 43.1-це пунктонь Приложениясо, 2009-це иень ожоковонь 5-це чистэ Санкт-Петербургонь 427-83-це № Закононь витемасо, — а пры ве чистэ Правительствань Сенатонтень II-це Александр Императоронть Кармавтоманзо лисемань чинть марто, кона ульнесь 1864-це иень сундерьковонь 20-це чистэ (од стиленть коряс ацамковонь 3-це чистэ).
2009-це иестэ саезь Юристэнь чистэнть максневи «Иень юрист» Россиянь юристэ сехте покш премиясь.
Юристэнь башка категориятнень туртов покшчинь ды ледстнемань читне
- Якшамковонь 12-це чистэ — Россиянь Федерациянь Прокуратурань важодицянь чи.
- Эйзюрковонь 29-це чистэ — Россиянь Федерациянь Вооружённой Вийтнесэ Юристэнь службань специалистэнь чи.
- Чадыковонь 6-це чистэ — Россиянь Федерациянь Внутренней тевень органонь Следствиянь органонь важодицянь чи.
- Чадыковонь 26-це чистэ — Нотариатонь чи[1].
- Панжиковонь 19-це чистэ — Кермартерэнь Ива (Иво Хелори) юристтнэнь, нотариустнэнь ды адвокаттнэнь ванстыцяст Иневаньксэнть чизэ.
- Панжиковонь 31-це чистэ — Россиянь адвокатурань чи.
- Аштемковонь 14-це чистэ — Россиянь миграциянь службань важодицянь чи.
- Медьковонь 5-це чистэ — Россиянь Федерациянь Раськень гвардиянь ушмотнень правань обеспечениянь подразделениятнень чи.
- Медьковонь 19-це чистэ — Россиянь Федерациянь Внутренней тевень министерствань юристэнь службань чи.
- Медьковонь 19-це чистэ — Уголовно-исполнительной системань юристэнь службань чи.
- Медьковонь 25-це чистэ — Россиянь следствиянь органонь важодицянь чи (Россиянь следствиянь комитет).
- Сундерьковонь 1-це чистэ — Судебной приставонь чи.
Беларусь Республикасо
Беларусь Республикасо Юристэнь чись тешкстави эрьва иень ацамковонь васенце таргочистэ 1998-це иень эйзюрковонь 26-це чистэ «Беларусь Республикасо государствань покшчитнеде, эрьгелемань читнеде ды ледстнемань читнеде» Беларусь Республикань Президентэнь 157-це № Кармавтомасо.
Казахстансо
Казахстансо Юристэнь чись тешкстави таштамковонь 30-це чистэ. Казахстансо те покшчись ульнесь официальнойстэ кемекстазь 2012-це иень умарьковонь 28-це чистэ Казахстан Республикань Президентэнь Кармавтомасо.
Киргизиясо
Киргизиясо Юристэнь чись тешкстави аштемковонь меельце таргочистэ. Покшчись аравтозель 1993-це иестэ[2].
Молдавиясо
Юристэнь чись тешкстави ожоковонь 19-це чистэ.
Украинасо
Юристэнь чись тешкстави ожоковонь 8-це чистэ. Покшчись аравтозь 1997-це иестэ Украинань Президентэнь Кармавтомасо. Теде башка Украинасо тешкстави Адвокатурань чи ды Нотариатонь чи.
Икелень СССР-нь пелес кемекстазь мастортнэсэ
- Сундерьковонь 2-це чистэ — Юристэнь чи Южной Осетиясо-Аланиясо.
- Ацамковонь 3-це чистэ — Юристэнь чи Приднестровьясо.
Малавикс покшчить
Американь Вейсэндязь Штатсо
Американь Вейсэндязь Штатсо (США-со) Юристэнь чи арась. Тень таркас ули Правань чи (англ. Law Day). Покшчинть 1958-це иестэ аравтызе Дуайт Эйзенхауэр США-нь Президентэсь. Тешкстави панжиковонь 1-це чистэ. Ламо масторсо те чись тешкстави кода Тундонь ды важодемань чи (США-со ули Важодемань чинь башка покшчи), ансяк сень кис, мекс Важодемань чинть коряс тешкстамотне лововсть теке коммунистэнь, США-со панжиковонь 1-це чистэ Важодемань чиденть башка тешкстави Правань чи ды Лояльностень чи[3].
Тешкставкст
- ↑ Указ Президента Российской Федерации от 26.04.2016 г. № 195(руз.), Президент России. Архивировазь 2017-це иень ацамковонь 1-це чистэ. Ваннозь 2017-це иень ацамковонь 2-це чистэ.
- ↑ Постановление Правительства Кыргызской Республики от 24 июня 1993 года № 272.
- ↑ U.S. Code, Title 36, Subtitle I, Part A, Chapter 1, § 113. Дата обращения: 16 Даволковонь 2009. Архивировано 16 Чадыковонь 2010 года.К:Рувики:Cite web (не указан язык)