Аркаев, Леонид Яковлевич
| Леонид Яковлевич Аркаев | |
|---|---|
| Чачома чизэ | 1940-це иень аштемковонь 6-це чи |
| Чачома тарказо | Москва, СССР |
| Масторозо |
 СССР →  Россия |
| Важодемазо | спортонь гимнастикань коряс тренер |
| Тетязо | Аркаев, Яков Николаевич |
| Авазо | Аркаева, Анастасия Петровна |
| Мирдезэ | Аркаева Людмила Евгеньевна |
| Эйкакшонзо |
Екатерина и Ксения Внуки Рома, Марина, Лиза, Настя,Петя,Максим,Ваня, Клим |
| Казнензэ ды премиянзо | |
Леонид Яковлевич Аркаев (1940-це иень аштемковонь 3-це чи, Москов ош) — Советэнь, Россиянь гимнаст. Спортонь гимнастикань коряс тренер. СССР-нь заслуженной тренер ды Россиянь заслуженной тренер. Педагогикань наукань кандидат, профессор, Петровскоень наукань ды искусствань академияс совиця.
Тонавтнема
1947-це-1957-це иетнестэ Леонид Аркаев тонавтни Московонь 399-це № школасо. Сонзэ прядомадо мейле карми тонавтнеме В. В. Куйбышев лемсэ Московонь инженерно-строительной институтсо, конань прядсы 1966-це иестэ.
1977-це иестэ пряды Физической культурань Московонь областной институтонть. 1995-це иестэ П. Ф. Лесгафт лемсэ Физической культурань Петербургонь государственной университетсэ иди кандидатонь диссертациянзо.
Спортонь ки
Спортонь гимнастикав карми якамо 13 иестэ саезь. 1957-це иестэ невти эсь виензэ СССР-нь тонавтницянь спартакиадасо (Рига ош). 1958-це иестэ — СССР-нь спортонь мастер. 1959-це иестэ саезь сови СССР-нь сборноень командас.
Л. Аркаев — Московонь ламоксть изниця, Москов ошонь командасо СССР-нь раськетнень спартакиадань кавксть изниця, СССР-нь чемпионатсо перекладинасо упражнениянь коряс сиянь медалень кавксть саиця. 1986-це иестэ Дортмунд ошсо масторлангонь чемпионатонь запассо аштиця пелькстыця.
Тренерэнь ки
1973-це иестэ саезь важоди спортонь гимнастикань коряс СССР-нь цёрань командань старшей тренерэкс.
1986-це иестэ 1991-це иес важодсь СССР-нь спортонь государственной комитетэнь (Госкомспортонь) Гимнастикань управлениянь прявтокс.
1992-це иестэ саезь Леонид Яковлевич Аркаев — гимнастикань коряс Россиянь сборнойсэ цёрань ды авань командатнень прявт тренер, теке марто кочказь Россиянь спортонь гимнастикань федерациянь президентэкс. Истя важодсь 2004-це иень ацамковс.
- Монреаль-1976 (4 сырнеть, 4 сият, 1 бронза),
- Москов-1980 (4 — 7 — 2),
- Сеул-1988 (8 — 2 — 1),
- Барселона-1992 (9 — 5 — 4),
- Атланта-1996 (3 — 2 — 3),
- Сидней-2000 (5 — 5 — 5),
- Афинат-2004 (0 — 1 — 2).
2005-це иень ацамковонь прядовомсто сась Кореяв, косо важодсь авань командань прявт тренерэкс ды цёрань командань консультантокс. Лембе ёнксонь Кореянь контрактонть прядовомадо мейле ды омбомасторонь лия командатнес ютамонь вешемаст коряс а молемадонть мейле Аркаев кочкизе Мордовиясо спортонь гимнастикань стявтомань-теемань кинть. 2009-це иень эйзюрковонь 29-це чистэ Саран ошсо тевс нолдазель «Л. Аркаев лемсэ гимнастикань куншкакурось», косо Леонид Яковлевич важоди старшей тренерэкс.
Тетянзо-аванзо, кудораськезэ
Тетязо — Аркаев Яков Николаевич (1911—1943). Аркаева — Аркаева Анастасия Петровна (1911—2000). Низэ — Аркаева Людмила Евгеньевна (чачсь 1941-це иестэ). Тейтерензэ: Екатерина Леонидовна (чачсь 1965-це иестэ), Ксения Леонидовна (чачсь 1975-це иестэ). Нуцьканзо: Никита, Максим, Елизавета, Анастасия, Клим, Марина. Нуцькань эйкакштне: Полина, Брис.
Леонид Аркаевень тетянзо-аванзо чачсь-кассть неень шкань Мордовия Республикань Чаунзань буень Сайгуши велесэ. Шкань ютазь тусть Щёлковав ды важодсть химиянь заводсо. 1943-це иестэ Яков Николаевич тетязо эсь мелензэ коряс туи фронтс; секе иестэ Харьков ёнкссо вейке тюремасонть сон чавови. 1944-це иес Анастасия Петровна эйкакшонзо марто ульнесь эвакуациясо Мордовиясо.
Казнеть, почётонь лемть
- СССР-нь заслуженной тренер ды Россиянь заслуженной тренер;
- Ленинэнь орден;
- Якстере Знамянь Трудонь орден;
- Раськень Ялгаксчинь орден;
- «Почётонь тешкс» орден;
- III-це степенень «Отечестванть икеле теевкстнэнь кис» орден — государстванть икеле теевкстнэнь ды отечествань спортонь кастомас покш путовксонть кис[1].
- II-це степенень «Отечестванть икеле теевкстнэнь кис» орден — физической культурань ды спортонь кастомас покш путовксонть ды Сидней ошсо 2000-це иень Олимпиадань XXVII-це налксематнесэ спортонь покш цётамотнень кис.