Мордовия Республика

Википедиясто материал - аорев содамкундосто

Мордо́вия Респу́блика (мокш. Мордовиясь, эрз. Мордовия)[1] — республика, Россиянь вейкеть права марто субъект. Сови Равчирень федеральной ёнксов, ловови Равонь ды Вяткань экономикань буень пельксэкс. Прявтошось — Саран ош.

Географиянь аштема тарказо

Республикась ашти Чилисемань ды Европань валаня тарканть лангсо, чивалгома ёнксось ашти Окань ды Дононь валаня таркасо. Аштема тарказо — 26,2 тёжат вайгельбеть. Республиканть сехте верце тарказо — 324 метрат.

Пелеве ёно Мордовиясь шабрацек ашти Обран ёнксонть марто, пелеве-чилисема ёнга — Чувашия Республиканть марто, лембе ёнга — Пенза ёнксонть марто, чивалгомава — Рязань ёнксонть марто.

Мордовиява чудить 114 лейть. Сехте покштне: Мокша, Исса, Сивинь, Сатис, Вад чудильманзо марто ды Сура, Ратор, Инсар ды Рудня чудильманзо марто. Мордовиясо малав 500 эрькеть. Сех покштне — Инерка ды Татарка.

Эрямопинге

1928-це иень медьковонь 26-це чистэ Рав Куншкань ёнкссо теезь Эрзянь ды Мокшонь ёнкс. Мордовиясь теезель-пурназель 1930-це иень якшамковонь 10-це чистэ кода явозь ёнкс. Мейле сон кармась Автономной ёнксокс. 1934-це иень ацамковонь 20-це чистэ лемдязь Мордовиянь Автономной Советской Социалистической Республикакс. 1990-це иень ацамковонь 7-це чистэ сон теезь Мордовиянь Советской Социалистической Республикакс. 1994-це иень якшамковонь 25-це чистэ неень шкас те — Мордовия Республика. Конституциязо кемекстазь 1995-це иень таштамковонь 21-це чистэ Мордовия Республикань Конституциянь Промкссо.

Эрицятнеде

Мордовиясо эриця раськеть

Мордовиясо эрить 808 888 ломанть (2015-це ие), 807 453[2] ломанть (2016-це ие). Мордовия Республикасо 22 буеть, ошонь 1 округ ды республикань 6 ошт. Весемезэ важодемань 19 посёлкат ды 1313 велеть. Ошонь эрицятнеде — 61,22 % (2015-це ие).

Мордовиясо эрить эрзят (чилисема ёнкссо) ды мокшот (куншка таркасо ды чивалгома ёнкссо).

Мокшотнеде сех ламо Атюрьевань (90,27 %), Торбеевань (62,55 %), Сыре Шайговань (59,48 %), Зубово-Полянань (52,14 %) ды Ковылкинань (51,72 %) буетнесэ. Эрзятнеде сех ламо эрить Кочкурбуень (92,14 %), Дубёнкань (86,4 %), Отяжбуень (84,72 %), Покш Игнадбуень (83,47 %), Орданьбуень (57,85 %) ды Покш Березникень (56,84 %) буетнесэ. Саран ошонть перька эрить рузт ды лия раськеть.

Сехте ламо эрицятне лововить православиянь христианокс. Теде башка ламо эрицятнеде каить пряст мусульманонь кемемантень.

Республикань прявт кельть

Мордовиясо прявт кельтне: рузонь, эрзянь ды мокшонь. 2002-це иестэ Весе россиянь эрицятнень сёрмадстоманть коряс эрзятнеде ды мокшотнеде эрить малав 843000 ломанть. Эйстэст тиринь келенть содасызь 614260 ломанть, рузонь келенть содасызь 837534 ломанть. 2002-це иень сёрмадстомасонть эрзякс эсь пряст тешкстызь 84407 ломанть, мокшокс — 49624. Ловомась невти, эрзянь ды мокшонь эрицятнеде 1989-це иестэ саезь 2002-це иес кармасть седе аламо 27%-с (1989-це иестэ эрзятнеде ды мокшотнеде ульнесь 1 153 987 ломанть).

Наукань тевсэ эрзянь келенть рузонь валтнэнь эйстэ ванькскавтызе Анатолий Павлович Рябов эрзянь васенце профессорось.

Эрьва мезде

Неень шкасто Мордовияcь ловови аграрной ды индустриальной регионокс. Сон ашти вейке таркасо Россиянь виев ды покш предприятиятнень ютксо. Мордовиясо нолдавить электроника, экскаваторт, резинань теевкст, ормаменькст, валдонь приборт, вагонт ды лия мезе. Вирень покш таркатне аштить юрокс чувтонь тевдеемань промышленностьсэ. Республиканть велень хозяйствасо кастовить модамарть, ламбамо якстерькайть ды лия эмежть. Покш тарка саи кудо ракшань кастомась ды сывелень миемась.

Республикасо улить пек мазый таркат, тесэ вастневить тусто вирть, вирень степть, чеядавкст ды човарт, лейть ды эрькеть, поронь пандопрят ды раужо мода. Тесэ касыть куракшонь ды цецянь тёжадо ламо видт, эрить 200-то ламо нармунть ды малав 60 ракшат. Эсь мазычисэ республикась эрьва ие терди ламо оймсицят.

Мордовиясь ловови ламораськень таркакс. Тесэ ялгаксчисэ эрить эрзят, мокшот, шокшот, рузт, татарт ды лия раськеть. Республикасо тонавтнемань, шкинемань ды оймсемань ламо таркат.

Налксемат

Мордовиясь содавикс спортсменсэ, конат вадрясто невтить эсь пряст спортонь якамосо, стака атлетикасо, грекень-римень бороцямосо, пауэрлифтингсэ, спидвейсэ ды ламо лия мейсэ. 2004-це иестэ Алексей Мишин республикасто васенцекс[3] сайсь сырнень медаль Афинэнь Олимпиадасо. Неень шкасто республикасо 500-то ламо эйкакшт бажить саемс покш таркат спортонь якамонь эрьва кодамо пелькстамосо. Ды эряви меремс, тесэ ули кинь кис кенярдомс. 2004-це иестэ Денис Нижегородов[4] ды Алексей Воеводин[5] кармасть сиянь ды бронзань призёрокс Олимпиадасо Афинасо. Спортонь якамоcо содавикст Ольга Каниськина[6] ды Валерий Борчин[7], конат 2008-це иень Пекинэнь Олимпиадань изницят.

Мордовиянь тонавтнема таркат

  • Республикасо тёкш тонавтнемань 9 таркат. Сынст прявтсо Н.П. Огарёв лемсэ Мордовиянь государственной университетэсь. Панжозь 1931-це иень ожоковонь 1-це чистэ кода тонавтыцянь институт. 1957-це иень ожоковонь 2-це чистэ саезь теевсь университетэкс. Ней эйсэнзэ 14 факультетт ды 7 институтт, конатнесэ тонавтнить 35 тёжадо ламо студентт. Равчирень вузтнэстэ сехте покштнестэ вейке, сови раськень ванномань-исследованиянь университеттнэнь юткс.
  • М.Е. Евсевьев лемсэ Мордовиянь тонавтыцянь государственной университетэсь теезь 1962-це иень медьковонь 30-це чистэ. Ней эйсэнзэ 7 факультетт, конатнесэ тонавтнить малав 6 тёжат студентт. 2004-це ие иестэ Россиянь тонавтомань рейтингсэ масторонь тонавтыцянь 78 вузтнэнь ютксо саизе 36-це тарканть.
  • Россиянь кооперациянь университетэнь Саранонь кооперативной институтось теезь 1976-це иень таштамковонь 23-це чистэ. Эйсэнзэ тонавтнить малав 7 тёжат студентт. Тонавтнемась ветяви истямо лувсо: лицей-техникум-вуз. Кооперативной техникумось вети тонавтоманть 5 специальностень коряс, тёкш тонавтомась ютавтови 4 специальностень коряс.

Мордовиянь буетне

Мордовиясо 22 буеть:

Буень ланкс явомась Мордовиясо
  1. Орданьбуе
  2. Атюрьевань буе
  3. Отяжбуе
  4. Покш Березникень буе
  5. Покш Игнадбуе
  6. Дубёнкань буе
  7. Ельникень буе
  8. Зубово-Полянань буе
  9. Инсаронь буе
  10. Ицялонь буе
  11. Кадошкинань буе
  12. Ковылкинань буе
  13. Кочкурбуе
  14. Краснослободскоень буе
  15. Лямбирень буе
  16. Рузаевкань буе
  17. Ромодановань буе
  18. Сыре Шайговань буе
  19. Темниковань буе
  20. Теньгушевань буе
  21. Торбеевань буе
  22. Чаунзань буе

Лисьмапрят



  1. REDIRECT Шаблон:Навигационная таблица



Равчирева федерациянь кужось Россиянь коцтось
Башкирия | Маринь Мастор | Мордовия | Печкасонь Мастор | Удмуртия | Пермень край | Кировонь ёнкс | Обранонь ёнкс | Оренбургонь ёнкс | Пенза ёнкс | Самара ёнкс | Саратов ёнкс | Ульянонь ёнкс| Чувашонь Мастор


  1. REDIRECT ЛопаПарцун:Navbox
  2. REDIRECT Шаблон:Навигационная таблица


  1. REDIRECT Шаблон:Навигационная таблица


  1. REDIRECT Шаблон:Навигационная таблица