Асманов, Александр Владимирович

Александр Владимирович Асманов
Александр Владимирович Асманов
Чачома чизэ	7 якшамковонь 1924
Чачома тарказо	Од Чамза, Ардатовскяй уездсь[d], Симбирской губерния[d], СССР;
Кулома чизэ	22 ожоковонь 1943 (19 лет)
Кулома тарказо	Ходоров веле, Ржищевень буе, Киев ёнкс, Украинань ССР, СССР
Масторозо	СССР
Кодамо ушмосо	противовоздушной оборона
Служамонь иетне	1942—1943-це
Званиязо
Частезэ	зенитэнь-артиллериянь; 981-це полк
Тюремат/войнат	Ине Отечественной война;
Сюлмавомат	К. В. Аксёнов, В. И. Темчук, А. Ф. Гребенёв, П. А. Жулябин, П. Г. Лаврентьев, М. И. Бондаренко, И. И. Сорокин, И. Ф. Степанов марто

Александр Владимирович Асманов (1924-це иень якшамковонь 7-це чи, Од Чамза веле, Симбирской губерния — 1943-це иень ожоковонь 22-це чи, Ходоров веле, Мироновонь буе, Киев ёнкс) — Важодицянь ды сокицянь-видицянь Якстере Армиянь младшей сержант, Ине Отечествань войнасо улиця, Советэнь Союзонь Откерь
(1943-це ие). Эрзя.

Эрямокизэ

Александр Асманов чачсь 1924-це иень якшамковонь 7-це чистэ Симбирской губерниянь Ардатовань уездэнь Торгово-Талызинской волостень Од Чамза велесэ (ней — Мордовия Республикань Покш Игнатовань буе) сокицянь-видицянь кудораськесэ. 1927-це иестэ аванзо марто сась эрямо Валдо Пандот посёлкав
(неень шкасто сови Москов ёнксонь Красногорск ошонь округс). Кармась тонавтнеме Юрлова шабра велень ушодксонь школасо. Кемготово иестэ саезь важодсь «Валдо Пандот» совхозсо^[1].

1942-це иень умарьковсто тердезель служамо Важодицянь ды сокицянь-видицянь Якстере Армияв Калинин (ней — Тверь) ёнксонь Рамешковской буень военной комиссариатонть пельде. 1943-це иень якшамковсто саезь — Ине Отечествань войнань фронтнэсэль. Ульнесь Курскоень тюремасо, Белгородонь, керш чирень Украинань олякстомтомасо. 1943-це иень сёксентень Асманов младшей сержантось ульнесь Украинань 1-це фронтонь 40-це армиянь зенитэнь-артиллериянь
9-це дивизиянь зенитэнь-артиллериянь 981-це полконь орудиянь 4-це батареянь прявтокс, те шкантень правтсь немецень 3 менельвенчть. Пек парсте невтизе эсь прянзо Днепра леенть кис тюремасо^[2].

1943-це иень таштамковонь 23-це чинь чокшнестэнть 40-це армиянь подразделениятне лиссть Днепрантень. Таштамковонь 24-це чинь валскестэнть леенть ютамодо мейле ледстнемань 161-це ды 337-це дивизиятнень ушмантнэ саизь Киев ёнксонь Мироновонь буень Луковица ды Ине Букрин велетнень, кельгстявсть немецень оборонань 3-4 вайгельбес. Весе вийсэ теезель Букринэнь плацдарма, конасонть арсезель пехотань идеманть туртов ятонь авиациянть каявоматнень эйстэ аравтомс зенитэнь артиллерия. Таштамковонь 28-це чистэ Константин Аксёнов лейтенантонть прявтсо зенитэнь-артиллериянь 981-це полконь 4-це батареянтень максозь кармавтома ютамс Днепранть пачк ды кемекставомс плацдарманть лангсо. Те батареянь ледстнемапельтнень ютксо ульнесь Асмановонь орудиязояк. Таштамковонь 29-це чинь вестэнть немецень виев толонть лангс апак вано вейсэндязь паромсо противовоздушной оборонань средстватне пачтязельть леенть трокс. Асмановонь расчётось сех васенцекс ютась леенть лия чирес ды арась Зарубинцы веленть маласо толонь леднемань таркас^[2]^[3].

Секе чистэнть немецень ушмотнень пелькстнэ штурмонь авиациянь лездамонть вельде арсесть плацдарманть лангсо ютавтомс каявома Советэнь подразделениятнень лангс. Каявоманть идемстэ Асмановонь расчётозо правтсь вейке «мессершмитт». Плацдарманть идемазо мольсь ожоковонь 12-це чис, зярдо ушодовсь плацдармань келейгавтомань коряс покш каявома. Ожоковонь 21-це чистэ батареясь ютась седе икелев, аравтсь толонь леднемань таркат Киев ёнксонь Ржищевень (ней Мироновонь) буень Ходоров веленть песэ. Ожоковонь 22-це чинь валскестэ Советэнь ушмотнень аштиця таркатнень лангс каявсть «Ю-87» бомбань ёртниця 27 менельвенчть. Аксёновонь батареянь расчётнэ ушодсть леднеме менельвенчтнень лангс, бомбань ёртниця вейке менельвенченть правтызе Асмановонь расчётось. Сонзэ лангс каявсть бомбань ёртниця кавто менельвенчть, теде мейле орудиянь окопсо аштиця зенитчиктне чавовсть. Асманов калмазель Украинань Киев ёнксонь Мироновонь буень Ходоров велесэ^[2].

1943-це иень ацамковонь 24-це чистэ СССР-нь Верховной Советэнь Президиумонь кармавтомасо «Днепрань вить чирень тюрематнесэ виевчинь ды смелчинь невтеманть кис» Александр Асмановнень куломадо мейле максозель Советэнь Союзонь Откерь покш лемесь, конань марто тензэ казезельть Ленинэнь орденэсь ды «Сырнень Теште» медалесь^[4]. Асмановонь марто Героень лемесь максозь сонзэ расчётонь весе ушмантнэнень: Василий Темчукнень, Аркадий Гребенёвнень, Пётр Жулябиннэнь, Павел Лаврентьевнень, Михаил Бондаренконень, Иван Сорокиннэнь, Иван Степановнень^[2].

Теде башка казезель Якстере Тештень орденсэ^[2]^[5].

Тешкставкст

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
Геройская быль. — Саранск: Мордкиз, 1985.

Ссылкат

[1] Должен знать каждый

[wh-2] ¹ ² ³ ⁴ ⁵ Асманов, Александр Владимирович (неопр.). «Масторонь маралят» вальмась.

[3] Истории ветеранов Великой Отечественной войны — Асманов Александр Владимирович

[4] Асманов Александр Владимирович

[5] Асманов Александр Владимирович

[1]

[2]

[3]

[4]

[5]