Горбунов, Василий Владимирович

Василий Владимирович Горбунов
Василий Владимирович Горбунов
	Файла:Горбунов Василий Владимирович.jpg
Чачома чизэ	31 медьковонь (13 умарьковонь) 1914-це иень
Чачома тарказо	Ламбаське, Лукояновскяй уездсь[d], Нижегородскяй губерниясь[d], Россиянь империя;
Кулома чизэ	1983-це иень ацамковонь 11-це чи (69 иеть)
Кулома тарказо	Москов, СССР;
Масторозо	СССР;
Наукань сферазо	литературоведения
Важодема тарказо	Мордовия Республикань Правительстванть пингстэ гуманитарной наукань НИИ (директор, 1950—1959)
Тонавтнемазо	Н. П. Огарёв лемсэ Мордовиянь государственной университет (1937);
Учёной степенезэ	филологиянь наукань доктор
Учёной званиязо	профессор
Содави кода	мордовской литературань коряс васенце тонавтнема книгань ды тонавтома лувонь автор, журналонь редактор, литературовед, литературань критик, сёрмадыця
Казнензэ ды премиянзо	К. Д. Ушинскиень медаль

Васи́лий Влади́мирович Горбуно́в, содавикс Пурьгине псевдонименть ало — советской эрзянь сёрмадыця, литературовед, критик ды педагог. Филологиянь наукань доктор (1970), профессор (1982), СССР-нь сёрмадыцянь вейсэндявксос совиця (1953).

Эрямо кизэ

Васень иетне

Чачсь 1914-це иень медьковонь 31-це (умарьковонь 13-це) чистэ неень Мордовия Республикань Ицялбуень Ламбаське велесэ сокицянь-видицянь кудораськесэ. Эрзя. Тетязо — Владимир Яковлевич Горбунов, коммунист ды якстере командир, маштовсь Гражданской войнасо. Иван лелянзо марто Василий топавтсь велесэ стака тевть. Прядсь ушодкс школа (1928) ды Нижегородской губерниянь Лукояновань уездэнь Покш Арать велень сокицянь-видицянь од ломанень школа. 1930-це иестэ мольсь тонавтнеме Лукояновань мордовской педтехникумс, ансяк иень ютазь тусь тосто ды кармась тиринь велесэнзэ тонавтомо рузонь кель колхозонь трактористтнэнь туртов.

Образованиязо

1933-це иестэ саезель тонавтнеме Саранскоень педагогикань институтонь (мейле — А. И. Полежаев лемсэ Мордовской государственной педагогикань институт) литературань факультетэнь мордовской отделенияс, конань прядызе 1937-це иестэ. 1937—1938-це иетнестэ ульнесь Саранскоень педагогикань училищасо преподавателекс. Репрессировазель, олякстомтозель 1939-це иестэ. 1940—1944-це иетнестэ Горбунов тонавтсь Инсаронь педагогикань училищасо, ульнесь тосо завучокс ды директорокс, важодсь Инсаронь РОНО-нь заведующеекс. Тонавтсь рузонь ды тиринь кель ды литература, лововсь виев методистэкс. 1943-це иестэ саезь ВКП(б)-сэ. Войнадо икеле иетнестэ сёрмалесь велькоронь заметкат, валморонзо ды ёвтнеманзо лиснесть эрзянь периодикань нолдавкстнэсэ.

Партиянь ды преподавателень тевензэ

1943-це иестэ Горбунов кочказель ВЛКСМ-нь Мордовской обкомонь секретарекс, иень ютазь кучозель ВКП(б)-нь Мордовской обкомонь аппаратс, косо важодсь секретарекс ды 1-це секретарень лездыцякс. Партиянь ламо тевтнень лангс апак вано, В. В. Горбунов сеедьстэ вастневсь тонавтыцятнень ды эрзянь-мокшонь сёрмадыцятнень марто. 1945-це иестэ понгсь тонавтнеме ВКП(б)-нь ЦК-нть пингстэ Партиянь высшей школас, конань реорганизациядо мейле саезель аспирантокс ВКП(б)-нь ЦК-нть пингстэ Общественной наукань академияс литературань теориянть ды историянть коряс, косо тонавтнесь 1946—1950-це иетнестэ. 1949-це иестэ парсте идизе «Борьба Н. Г. Чернышевского за реалистический путь развития русской литературы» диссертациянзо ды кундась эрзянь-мокшонь литературанть коряс литературань-критикань тевтнес. 1950—1959-це иетнестэ — Мордовской АССР-нь Министрань Советэнть пингстэ Келень, литературань, историянь ды экономикань научно-исследовательской институтонь директор, областень партиянь школасо литературань кафедрань прявт ды «Изнямо» («Победа») литературань-художествань альманахонь редактор. Ламо мель явсь наукань кандидатонь ды докторонь анокстамонтень. НИИ-нь важодицятне нолдасть келень ды литературань, историянь ды экономикань, этнографиянь ды археологиянь коряс книгат, кемекстасть сюлмавкст Московонь ды Равчирень автономной республикань учёнойтнень марто.

1958—1972-це иетнестэ важодсь Мордовской государственной университетэнь старшей преподавателекс ды доцентэкс, ловнось мордовской литературань коряс историянь-литературань ды тиринь келень тонавтомань методикань коряс курс, теде башка, ветясь социалистической реализманть ды рузонь литературань критиканть историянзо коряс спецкурст. Важодсь М. М. Бахтин, И. Д. Воронин, А. И. Маскаев, Н. Ф. Цыганов, Н. И. Черапкин марто. Печатьсэ лиснесть критикань статьянзо, сёрмадыцянь съездтнэсэ ловнось докладт, важодсь «Сятко» («Искра») журналонь редколлегиясо ды а весть кортнесь драмтеатрань артисттнэнь марто раськень спектаклятнень путомаст коряс. 1972—1983-це иетнестэ Горбунов ульнесь Московсо РСФСР-нь Просвещениянь министерствань раськень школань НИИ-нь тиринь келень ды литературань методикань секторонь заведующеекс. Тесэ сон РСФСР-нь раськень школанть историясо васенцеде пурнась научной коллектив, кона ванкшнось РСФСР-нь областтнесэ ды автономной республикатнесэ тиринь литературанть тонавтнеманзо марто сюлмавозь стакачитнень. 70-це иетнень куншкавидьс анокстазельть наукань од школань прявт лувтне ды муезельть сынст кемекстамга китне.

Наукань важодевксэнзэ

Горбунов нолдась сядодо ламо важодевкст эрзянь-мокшонь литературоведениянть ды литературань критиканть коряс (1940-це иетнестэ саезь) ды малав колоньгемень важодевкст раськень школасо филологиянь дисциплинатнень тонавтомань методиканть коряс (1970—1980-це иетне). Сехте содавикстнэстэ — «Пути развития мордовской литературы» (1949), «К вопросу о формировании мордовской социалистической поэзии» (1953), «Литература возрожденного народа» (1957), «Мордовские народные песни» (1957), «На пути роста» (1960) ды лиятне. Сонзэ важодевкстнэсэ кемекстазель эрзянь-мокшонь литературанть кода раськень духовной культурань пельксэнть ды СССР-нь раськетнень литератураст пельксэнть касомадо прявт мель. 1963-це иестэ «Голос жизни» важодевкссэнзэ Горбунов макссь питне эрзянь ды мокшонь истят поэттнэнь сёрмадовксост туртов, кода А. Эскин, П. Торопкин, М. Трошкин, И. Шумилкин, А. Тяпаев, И. Калинкин, С. Кинякин, ды тейсь эрзянь-мокшонь сёрмадыцянь литературань портретт. 1967-це иестэ лиссь «Мордовской литературе пятьдесят лет» важодевксэзэ, косо сон невтизе Мордовиясо литературанть касоманзо ды пачтясь эрзянь-мокшонь поэзиясонть, прозасонть ды драматургиясонть саевкстнэде.

Московсо эрямсто В. В. Горбунов явсь мель раськень школасо тиринь кельтнень тонавтнеманть марто сюлмавозь кевкстематненень, эсензэ мелензэ-арсеманзо сон панжинзе «Научно-методические проблемы обучения родному и русскому языкам в условиях развивающегося билингвизма» ды «Об обучении устной родной речи и грамоте в национальных детских садах РСФСР» статьятнесэ. Икеле ладсо сёрмадсь литературоведениянь ды критикань статьят, ветясь тиринь литературанть тонавтнеманзо коряс наукань-методикань школанть. Ванкшнось Н. Г. Чернышевскиень, А. Н. Толстоень ды лия сёрмадыцятнень шкинемаст. Эрзянь-мокшонь литературанть коряс важодевксэнзэ лиснесть «Сятко» ды «Мокша» журналтнэсэ. Сёрмадсь И. М. Яушев содавикс морыцядонть книга. Кортась телевидениясо. Анокстась СССР-нь эрьва кодамо раськестэ лисезь филологиянь ды педагогикань наукань малав комсь кандидатт.

Тонавтнемапелензэ

Горбунов ульнесь школатнень ды вузтнэнь туртов тонавтнемань васенце книгатнень ды хрестоматиятнень анокстыцякс. 1950-це иестэ Н. П. Дружинин марто сынь теизь раськень школанть туртов VIII—X-це класстнэсэ тонавтневиця эрзянь-мокшонь литературанть коряс программанть. «Мордовской советской литературась» васенце тонавтнемапелесь лиссь 1952-це иестэ, сон теезель раськень школань VIII—X-це класстнэнь туртов. Иень ютазь нолдазель литературань коряс хрестоматиясь, кона анокстазель М. Талабаев ды В. Беззубов марто вейсэ. 1956-це иестэ лиссь Горбуновонь васенце очеркезэ — «Очерк истории мордовской советской литературы», 1973-це иестэ — «Поэзия — душа народа» эрзянь-мокшонь социалистической поэзиядонть монографиязо.

Горбунов кемекстызе кавто этапсо литературанть тонавтнемадо меленть: васенце этапось — литературань ловномась ды теориянь-литературань чарькодемань минимумонть мельс саемась (4-це классто саезь 6-це классос), омбоцесь — литературанть историянзо тонавтнемась (7-це классто саезь 10-це классос), ды те лувось нолдавсь тевс мейлеяк. Горбунов ловсь тиринь литературань коряс тонавтнема книгань теориянь тееманть прявт эскельксэкс школасо раськень литературань тонавтоманть ды тонавтнеманть эрявикс сэрьс кепедемга, тень пингстэ литературанть тонавтнемстэ вейсэндямат раськенсенть (национальноенть) ды ламо раськенсенть (интернациональноенть). Лия покш тевекс сон ловсь тиринь литературань келенть тонавтнеманзо. Сехте келейстэ ды эрьва ёндо тиринь литературань тонавтнема лувтне панжозь «Изучение родных литератур в национальных школах РСФСР» тонавтомапельсэнть, конань Горбунов нолдызе 1982-це иестэ. Теде башка, сон «История мордовской литературы» (1968, 1971, 1974) колмо томсо важодевксэнть ды эрзянь-мокшонь литературань коряс ламо тонавтнема книгань соавтор.

Драматургиязо

Литературасо эсь тешксэнзэ Горбунов кадызе кода драматургиянь произведениянь автор. Пьесанзо ютксто явовить «Эрямонь юрсто» (1966), «Кадалиця» (1968), «Валскесь кирвайсь» ды ламо лиятне.

Казнензэ

Казезь К. Д. Ушинскиень медальсэ, «Отличник народного просвещения» знаксо, Мордовской АССР-нь Верховной Советэнь Президиумонь Почётонь зярыя грамотасо, РСФСР-нь Просвещениянь министерствань ды ВЛКСМ-нь Центральной Комитетэнь Почётонь грамотасо.

Ледстнема

Кулось 1983-це иень ацамковонь 11-це чистэ Московсо, калмазь Саранскойсэ. Куломадонзо мейле лиссть кавто книганзо: «Признание» (1984) — эрзянь-мокшонь литературанть касомасо неень шкань лувтнеде — ды «Морыцянть од поразо» (1988) — И. М. Яушевень эрямодонзо.

Тешкставкст

↑ Bibliothèque nationale de France Vasilij Vladimirovič Gorbunov // Autorités BnF (фр.): اوپن ڈیٹا پلیٹ فارم, платформа відкритих даних, платформа открытых данных, plateforme de données ouvertes, piattaforma di dati aperti, Opendata-Plattform, otevřená data platforma, åben-data-platform, տվյալների բաց շտեմարան, platforma za odprte podatke, plataforma de datos abierta, plataforma de dados aberta, платформа адкрытых даных, платформа на отворените данни, platforma otwartych danych, ашық деректер платформасы, ачык маалыматтарды платформа, açıq məlumat platforması, ochiq ma'lumotlar platforma, açık verilerin platformu, платформа отвореног података, platforma otvorenih podataka, platforma otvorenog podataka, platforma otvorených údajov, πλατφόρμα ανοικτών δεδομένων, platformu atklātā datu, platforma atvira duomenų, platvormi avatud andmete, avoimen datan foorumi, nyílt adatok platformja, პლატფორმა ღია მონაცემები, платформа за отворени податоци, нээлттэй мэдээллийн тавцан, platformă de date deschise, platformo de malferma datumoj, open data platform, плятформа адкрытых зьвестак, Усьтэм даннойёслэн платформазы, асыҡ мәғлүмәт платформаһы, açıq malümat platforması, açıq malümat platforması, ачык малюмат платформасы, öppen dataplattform, платформаи додаҳои боз, ачык кӧргӱзӱлердиҥ платформазы, гом бæрæггæнæнты платформæ — 2011.

Литература

Просветители и педагоги мордовского края / Сост.: М. Т. Бибин, Е. Г. Осовский. — Саранск: Мордов. кн. изд-во, 1986.

Ссылкат

Информационный листок «Валдо ойме, чевте седей»: к 100-летию со дня рождения В. В. Горбунова Архивень копия 12 Аштемковонь 2018 на Wayback Machine
Библиотека мордовской литературы. Горбунов Василий Владимирович

[_dc7e3fd5f9ef7b17-1] Bibliothèque nationale de France Vasilij Vladimirovič Gorbunov // Autorités BnF (фр.): اوپن ڈیٹا پلیٹ فارم, платформа відкритих даних, платформа открытых данных, plateforme de données ouvertes, piattaforma di dati aperti, Opendata-Plattform, otevřená data platforma, åben-data-platform, տվյալների բաց շտեմարան, platforma za odprte podatke, plataforma de datos abierta, plataforma de dados aberta, платформа адкрытых даных, платформа на отворените данни, platforma otwartych danych, ашық деректер платформасы, ачык маалыматтарды платформа, açıq məlumat platforması, ochiq ma'lumotlar platforma, açık verilerin platformu, платформа отвореног података, platforma otvorenih podataka, platforma otvorenog podataka, platforma otvorených údajov, πλατφόρμα ανοικτών δεδομένων, platformu atklātā datu, platforma atvira duomenų, platvormi avatud andmete, avoimen datan foorumi, nyílt adatok platformja, პლატფორმა ღია მონაცემები, платформа за отворени податоци, нээлттэй мэдээллийн тавцан, platformă de date deschise, platformo de malferma datumoj, open data platform, плятформа адкрытых зьвестак, Усьтэм даннойёслэн платформазы, асыҡ мәғлүмәт платформаһы, açıq malümat platforması, açıq malümat platforması, ачык малюмат платформасы, öppen dataplattform, платформаи додаҳои боз, ачык кӧргӱзӱлердиҥ платформазы, гом бæрæггæнæнты платформæ — 2011.

[1]