Н. П. Огарёв лемсэ Мордовиянь государственной университет
| Н. П. Огарёв лемсэ Ванномань раськень Мордовиянь государственной университет | |
|---|---|
| (Н. П. Огарёв лемсэ МГУ) | |
 | |
| Международное название | Ogarev Mordovia State University |
| Год основания | 1931-це иень ожоковонь 1-це чистэ |
| Год реорганизации | 1957-це |
| Тип | Государственной университет |
| Целевой капитал | ₽ 10,16 миллионт |
| Ректор | Дмитрий Евгеньевич Глушко |
| Президент | Николай Петрович Макаркин |
| Студенты | 20000 |
| Расположение |
 Россия,  Саран ош |
| Юридический адрес |
430005, Россиянь Федерация, Мордовия Республика, Саран ош, ул. Большевистской куро, 68-це кудо |
| Сайт | mrsu.ru |
| Награды |
 |
 |
|
 Н. П. Огарёв лемсэ Мордовиянь государственной университет | |
Н. П. Огарёв лемсэ Ванномань раськень Мордовиянь государственной университетэсь ашти Саран ошсо, Мордовия Республикань прявт ошсо, ды регионсо ловови покштояк покш вузокс. Университетэсь теезь-пурназь 1957-це иестэ Мордовиянь тонавтыцянь государственной институтокс улемстэ. Университетс совавтозь 10 факультетт, 7 институтт, Рузаевка ды Ковылкина оштнесэ кавто институтт. Неень шкасто вузонть ректорось Д. Е. Глушко. Вузонть президентэсь — Н. П. Макаркин.
Н.П. Огарёв лемсэ МГУ-нть эрямопингезэ
Мордовиянь университетэсь вети эрямопингензэ республикасо тёкш тонавтнемань васенце таркань теевемасто — Мордовиянь агропединститутсто саезь. Сон панжозель регионсо (се шкастонть ульнесь Мордовиянь автономиянь область) 1931-це иень ожоковонь 1-це чистэ РСФСР-нь Раськень комиссаронь советэнть арсемга.
Иень ютазь, 1932-це иень сундерьковонь 23-це чистэ агропединститутось покшолгавтозель Мордовиянь тонавтыцянь государственной университетс (МГПИ-с). Эйсэнзэ ульнесть теезь историянь, математикань, химиянь, биологиянь, келень ды литературань курот. Специалистэнь васенце нолдавксось (73 ломанть) ульнесть 1935-це иестэ.
Васенце шкасто вузонть прявт путовксокс ульнесь анокстамс региононь школатнес тонавтыцят. Бойка тонавтомань ветямось ютавтовсь тонавтыцянь интститутсо, кона ульнесь панжозь МГПИ-сэ 1934-це иестэ. 1935-це иестэ МГПИ-нь студенттнэ ютасть тонавтнеме Большевистской куронь ды Рабочей курынень (ней Б. Хмельницкоень куро) ужосо ниле кепедьксэнь од кудос. Тонавтнемань васенце корпусось аштесь 2010-це иес[1], 2016-це иень таштамковонь 15-це чистэ сонзэ таркасо панжовсь Мордовиянь университетэнь тонавтнемань ды лабораториянь од корпус — Сарансо сех сэрей здания.
1938-це иестэ саезь 1957-це иес Мордовиянь агропединститутось кандтнесь Александр Полежаев рузонь валморонь сёрмадыцянть лемензэ, кона чачсь-кассь неть таркатнесэ. Теке кемень иетнестэ вузсо важодсь Михаил Бахтин рузонь покш философ ды литературань ванныця. М.М. Бахтин сась Саран ошов ды вузсо васенцеде кармась важодеме 1936-це иестэ, ссылкадо мейле. Седе тов 1945-це иестэ саезь 1961-це иес ды пенсияв лисемадо мейле Михаил Михайлович тонавтсь Мордовиянь тонавтыцянь институтонь (1957-це иестэ саезь — Мордовиянь университет) историянь ды филологиянь факультетсэ, ульнесь доцентэкс, рузонь ды омбомасторонь литературань кафедрань прявтокс. Сарансо сон анокстась книгат, конат теизь сонзэ содавиксэкс масторлангонть келес — «Проблемы поэтики Достоевского» (М., 1963), «Творчество Франсуа Рабле и народная культура средневековья и Ренессанса» (М., 1965). 2015-це иестэ, М.М. Бахтинэнь чачома чистэнзэ 120 иетненень университетэнь куншкань кампусонь скверсэ содыенть ледстнемга панжозь кеврунго, университетсэ появась М.М. Бахтин лемсэ Мемориальной ды ванномань куншкакуро.
1957-це иень ожоковонь 2-це чистэ А.И. Полежаев лемсэ МГПИ-сэ теезель Мордовиянь государственной университет, козонь совасть историянь ды филологиянь, физикань ды математикань, инженерэнь ды техникань, велень хозяйствань, естествознаниянь ды омбомасторонь факультеттнэ. Сы иестэ вузсо ушодовсь аспирантурасо наукань эсь важодицянь анокстамось. Мордовиянь АССР-нь кастомга панжтневсть од факультетт ды специальностть: седе тов молиця иетнестэ панжовсть строительствань, электронной техникань, велень хозяйствань механизациянь, экономикань, юридической, медицинань ды Россиясо светотехникань вейкине факультет (2016-це иестэ саезь — Электроникань ды светотехникань институт).
1970-це иестэ саезь Мордовиянь университетэсь кандтни Николай Огарёв рузонь валморонь сёрмадыцянть, публицистэнть ды революционерэнть лемензэ. Огарёвтнень кудораськень кудост — Сыре Шайговань буень Сыре Акшина велесэ, кона Саран ошонть эйстэ ашти 40 вайгельбень ютазь. Вузсо важоди Н.П. Огарёвонь лемсэ музей. Мордовиянь университетэнь прявт тешкстнэстэ вейкесь — Огарёвонь кеврунго, кона панжозель 1984-це иестэ.
1982-це иестэ паро специалисттнэнь анокстамонть ды наукань важодемань кастоманть кис СССР-нь Верховной Совестэнь Президиумонть кармавтомасо Н.П. Огарёв лемсэ Мордовиянь университетэсь казезь Ялгаксчинь раськень орденсэ.
1990-це иетнестэ университетсэ ульнесть полавтомат — покш факультеттнэ кармасть институтокс, теке марто панжовсть наукань ды ванномань институтт. 2000-це иестэ панжовсть Саран оштонь башка Мордовиянь университетэнь филиалтнэ панжовсть республикань кавто лия ошсо — Ковылкинасо ды Рузаевкасо.
Мордовиянь университетэнь лия ёнксось ушодовсь 2010-це иестэ «Ванномань раськень университет» покш лементь максомасто. Меельце иетнестэ Мордовиянь университетэсь кеместэ совась Россиянь сех вадря вузонь ассоциацияс ды Россиянь классикань университетэнь ассоциацияс, теке марто кемекстынзе раськеютконь сюлмавоматнень.
Рейтингтнесэ университетэнть тарканзо
Ванномань раськень Мордовиянь государственной университетэсь сови масторлангонь 800 сех вадря вузтнэнь юткс Round University Ranking университетэнь раськеютконь рейтингенть коряс ды ашти 46-це таркасо Россиянь университеттнэнь ютксо, конат совить те рейтингентень. 2016-це иестэ QS EECA 2016 (Emerging Europe&Central Asia 2016, питне путови Европань ды Центральной Азиянь 25 вузтнэнень) раськеютконь рейтингень версиянть коряс Н.П. Огарёв лемсэ Мордовиянь университетэсь совась 200 сех вадря университеттнэнь юткс. 2014-це иестэ «Эксперт РА» агентствась совавтызе вузонть Независимой Госудрарствань Содружествань вузтнэнь юткс, косо сонензэ максозь «Е» классось («студентэнь анокстамонь вадря тёкш»).
Университетэнь ректортнэ
- 1960-це иень эйзюрковонь 1-це чистэ саезь 1969-це иень ацамковонь 29-це чис — Григорий Яковлевич Меркушкин (1917-це иень сундерьковонь 23-це чи — 1979-це иень якшамковонь 13-це чи), Мордовиянь государственной, партийной ды общественной важодиця, содый-историк, тонавтыця ды драматург (ульнесь «Масторава» раськень эпосонь теицятнестэ вейкекс); историянь наукань кандидат (1947), МАССР-нь раськень просвещениянь заслуженной вжодиця (1965). Н. И. Меркушкин Мордовия Республикань ды Самара ёнксонь икелень Прявтонть лелязо.
- 1969-це иень ацамковонь 29-це чистэ саезь — 1991-це иень таштамковонь 5-це чис — Александр Иванович Сухарев (1931-це иень ожоковонь 12-це чи — 2010-це иень ацамковонь 24-це чи), содый-социолог, Мордовиянь государственной унивекрситетэнть пингстэ Регинонологиянь наукань ды ванномань институтонь прявт (1991); философиянь наукань доктор (1974), профессор (1975), РСФСР-нь наукань заслуженной важодиця (1982).
- 1991-це иень таштамковонь 5-це чистэ саезь 2010-це иень эйзюрковонь 30-це чис — Николай Петрович Макаркин (1943-це иень ацамковонь 10-це чи), содый-экономист; экономикань наукань доктор, профессор, РФ-нь наукань заслуженной важодиця (1993), наукасо ды техникасо Мордовия Республикань Государственной премиянь лауреат (1998); Саран ошонь ректоронь советэнь прявт. 2010-це иень якшамковонь 15-це чистэ ушодсь топавтомо Н.П. Огарёв лемсэ МГУ-нь президентэнь тевтнень.
- 2010-це иень эйзюрковонь 30-це чистэ саезь 2021-це иень сундерьковонь 11-це чис — Сергей Михайлович Вдовин (1958-це иень медьковонь 16-це чи), экономикань наукань кандидат.
- 2021-це иестэ саезь сундерьковонь 11-це чистэ саезь — Дмитрий Евгеньевич Глушко (1975-це иень панжиковонь 5-це чи, педагогикань наукань кандидат.
Тонавтомань тев
Мордовиянь университетсэ тонавтомань тевенть ветить 13 институтт, 5 факультетт ды 2 филиалт:
- Аграрной институт
- Историянь ды социологиянь институт
- Медицинань институт
- Архитектурань ды строямонь институт
- Наукоёмкой технологиянь ды од материалонь институт
- Механикань ды энергетикань институт
- Электроникань ды светотехникань институт
- Раськень культурань институт
- Геоинформациянь технологиянь ды географиянь институт
- Анокстамонь ды наукань ды наукань-педагогикань важодицянь институт
- Корпоративень тонавтомань ды апак лотксе тонавтнемань институт
- Омбомасторонь келень факультет
- Математикань ды информациянь технологиянь факультет
- Филологиянь факультет
- Биотехнологиянь ды биологиянь факультет
- Вуздо икеле анокстамонь ды средней профессиональной тонавтомань факультет
- Экономикань институт
- Юридической институт
- Машинань строямонь Рузаевкань институт (филиал)
- Ковылкинань филиал
Мордовиянь университетсэ невтезь тёкш тонавтомань весе ёнкстнэ: бакалавриатось, магистратурась, специалитетэсь, тёкш квалификацинь важодицятнень анокстамось, тонавтомань башка программат. Зярыя факультеттнэсэ панжозь средней профессиональной тонавтомань курот. Тонавтомась ветяви очной, очно-заочной (чокшнень) ды заочной форматнесэ.
2014-це иестэ саезь Мордовиянь университетэсь тонавтомань зярыя программат вети англань кельсэ, весемесь алтазь омбомасторонь тонавтницятнень туртов. Весемезэ вузсонть тонавтнить 53 масторсто 1100-до ломанть (весе студенттнэнь покшолманть эйстэ те 7 — малав 20000 ломанть).[2]
«Инновациянь Россиянь тонавтомань сехте вадря программат» Весе Россиянь теврсевксэнь цётамотнень коряс Мордовиянь университетэнть тонавтомань программатне эрьва иестэ совить тёкш тонавтомань сех вадря программатнень юткс.
Мордовиянь университетсэ топавтовить тонавтомань 150-де ламо башка программат. 2015-це иестэ ушодовсь «Техноколледж» Мордовиянь университетэнь, Мордовиянь инновациянь кастомань агентствань ды Mail.ru Group корпорациянть вейсэнь теварсевксэст топавтомась. Теварсевксэнь улицятне — информациянь технологиянь (IT-нь) марто специальносттнень коряс анокставиця студенттнэ ютыть веб- ды мобильной теевкстнэнь коряс практикань питневтеме тонавтома.
Тешкставкст
- ↑ Лекция о первом. Каким запомнится самый легендарный корпус мордовского университета (руз.). Новости Саранска и Мордовии «Столица С» (17 Умарьковонь 2015). Дата обращения: 10 Эйзюрковонь 2020.
- ↑ В Мордовский университет в этом году поступили почти 5 тысяч студентов | Еженедельник "Вечерний Саранск". www.vsar.ru. Дата обращения: 10 Сундерьковонь 2016. Архивировано 11 Сундерьковонь 2016 года.
