Кургоня (фестиваль)
| Кургоня | |
|---|---|
 | |
 | |
| Статусозо | раськень культурань фестиваль |
| фестиваль[d] | |
| Зярдо ютавтневи | эрьва иестэ |
| Аштема тарказо | |
| Ютавтома таркась | |
| Масторось | |
«Ку́ргоня» (руз. мокшанская ватрушка) — раськень культурань фестиваль, кона ютавтневи Мордовия Республикань Рузаевкань буесэ эрьва иестэ умарьковонь меельце таргочистэ[1]. Фестивалентень лемесь максозель мокшонь сюкоронть эйстэ, кона паневи суронь почтсто топо ды модамарь марто. Раськень ёвтнематнесэ ды легендатнесэ кургонясь лездакшнось ломантненень стувтомс эрьва кодат сёвноматнень.
Мейстэ весемесь ушодовсь
«Кургоня» раськень культурань регионъютконь I-це фестивалесь ютась 2015-це иень умарьковонь 29-це чистэ Левжа велесэ.
Покшчисэ ульнесть 5 тёжадо ламо ломанть. Фестивалень сех паро ледстнематнень сёрмадстомга теезель «Кургоня» фестивалень сёрмадома» малав 1 метрань сэрьсэ чувтонь книга. Покшчинть туртов теезель покш кургоня 1 метрань 50 сантиметрань диаметрасо ды 60 килограммань сталмосо.
2016-це иестэ фестивалесь вастсь инжеть ды сыцят Сузгарье мокшонь содавикс велесэ. Фестивалень прявт тешксэнтень — мокшонь сюкоронтень — панжозель кеврунго (теицязо — А. С. Жбанов, Перхляень школань технологиянь ды артомань искусствань тонавтыцясь).
2017-це иестэ саезь фестивалень ютавтома таркакс кармась Приреченской велень поселениясь.
2020—2021-це иетнестэ коронавирусонь кезовонть кис «Кургонясь» ютавтневсь онлайн лувсо.
2022-це иестэ фестивалентень сакшность 15 тёжадо ламо ломанть.
2023-це иестэ покшчись таго ютавтозель Приреченской велень поселениянь Левженской посёлканть маласо[2]. Фестиваленть лувсо анокстазель мокшонь раськень сюкоро 3 метрань 30 сантиметрань диаметрасо ды 260 килограммань сталмосо[3]. Покштояк покш кургонянть теемга ичесть чапаксонь 60 килограммат. Теде башка анокстазель 40 килограммат почт, 2,5 килограммат сахар, 80 алт, вейке килограмма оргат, 400 граммат сал, 5,5 килограммат скалой, 12 килограммат кефир, чиньжарамо ой. Модамарьстэ, топосто, скалойстэ ды вельксстэ пештевксэнь вейсэнь сталмось 180 килограммат. Сюкоронть теизь Рузакаевкань кшинь панемань предприятиясо.
2024-це иень умарьковонь 25-це чистэ «Левженский» племенной хозяйствантень велявтоманть маласо «Кургоня» фестивалесь ютась Х-цеде[4].
Кода тешкстави
Фестивалень инжетнень ды весе пурнавозтнень туртов поздоровонь ёвтамо эрьва иестэ сакшныть республикань кирдивийтне. Фестивальсэ эрьгелемань лувсо ютавтови икелев молицятнень ды велень хозяйствасо, культурасо, тонавтомасо ды лия ёнкссо сех вадря важодицятнень казема. Коень коряс покшчинь программасо важодить интерактивень истят таркатне:
- Норовонь ярмунка;
- Инжень вастомань Мордовия;
- Паро ёжонь тарка;
- Мон — тиринь масторонь вечкиця;
- Туристэнь Рузаевка;
- Мастерэнь куро;
- Эйкакштнень туртов налксемат ды эрьгелемат;
- Фотонь теемань таркат.
Смустезэ
Фестиваленть прявт аравтомазо — кастомс раськень культуранть ды лия ёнов а молиця раськень койтнень-кирдатнень, кемекстамс раськетнень ютксо сюлмавоматнень, паролгавтомс раськетнень ютксо ялгаксчинть.
Смустень коряс «Кургоня» фестивалесь ашти ве таркасо «Акша келу» раськень ды фольклоронь лия покшчинть марто[5]. Те покшчись ютавтневи Мордовия Республикань Зубово-Полянань буень Вад леень вить чиресэ, Вадонь Велязем веленть маласо Иневанькс Троицянь чистэ. Умонь коень коряс рана валскестэ саезь аватне пурнавить раськень покшчинь оршамосо ды морыть мокшонь кельсэ морот, тень пингстэ шныть чипаенть, килеенть ды ушодыця кизэнть, конанень аватне пшкадить паро норовонь коряс. Вирентень, ведентень, пертьпельксэнтень сюконямось пек парсте невтеви эрзянь ды мокшонь мифологиясонть. Эйсэнзэ пек неявикс таркасо ашти килеень (мокш. келунь) образось, кона ловови модамасторонь теицякс. Килеесь парсте сюлмави колмо мастортнэнь марто: мода алксонь (кулозетнень образось), верце (мифологиянь ванстыцянь масторось) ды модань (вейсэндиця масторось). Ёвтамонь коряс теде икеле асодавикс чувтось васенцеде кассь Киля ногайтнень каршо тюриця мазый, апелиця тейтеренть калмазырензэ лансо. Те тейтеренть ледстнемга чувтонть лемдизьгак — Келу[6].
Фотот
«Кургоня» фестиваленть панжомазо
Раськень промылатнень микшнема таркат
Мокшонь аватне раськень оршамосо
Тешкставкст
- ↑ Фестиваль мордовского гостеприимства «Кургоня» 2024, Рузаевский район — дата и место проведения, программа мероприятия., Культура.РФ. Ваннозь 16 Аштемковонь 2025.
- ↑ Новости (руз.). e-mordovia.ru. Дата обращения: 16 Аштемковонь 2025.
- ↑ Все новости (руз.). www.e-mordovia.ru. Дата обращения: 16 Аштемковонь 2025.
- ↑ Tatyana. В Рузаевском районе отгремел фестиваль «Кургоня-2024», «НТМ» — Народное телевидение Мордовии. Ваннозь 16 Аштемковонь 2025.
- ↑ Календарь народных праздников
- ↑ 7 чудес финно-угорского мира
Ссылкат
- Фестиваль мордовского гостеприимства «Кургоня»
- «Кургонясь» кочказь вадрятнень юткс
- Артём Здунов якась «Кургоня» регионъютконь фестивалентень
- «Кургоня» фестивалесь вастсь инжеть
- Саранскойсэ юты «Russian Event Awards» туротраслянь премиянь округонь финалось
- Мордовиясь невти культурань покш программа «Россия» Раськеютконь выставкасонть-форумсонть