Надькин, Дмитрий Тимофеевич

Надькин, Дмитрий Тимофеевич
Надькин, Дмитрий Тимофеевич
Чачома чизэ	1934-це иень панжиковонь 28-це чи
Чачома тарказо	Иваньбиё, Лугаян буе, Нижний Новгород ёнкс, РСФСР[d], СССР;
Кулома чизэ	1992-це иень медьковонь 15-це чи (58 иеть)
Кулома тарказо	Хельсинки ош, Финляндия;
Масторозо	СССР; Россиянь Федерация;
Важодемань ёрокчизэ	тонадей

Дмитрий Тимофеевич Надькин (1934 панжиковонь 28 чистэ Иваньбиё велесэ Лугаянбуесэ Обран ёнкссо, неень Алоошонь ёнкс — кулось 1992 медьковонь 15 чистэ Финляндиясо) — эрзянь сёрмадыця, профессор, ламо келень содыця.

Эстедензэ

Чачсь эрзянь сокицянь-видицянь кудораськесэ. Иваньбиёсэ прядсь сисем иень тонавтнема кудо, седе мейле Лукоянов ошонь тонавтыцянь училищань раськень пелькс. Дмитрий Надькин якстере шнамо лопа марто прядызе А. М. Горькиень лемсэ университетэнь историянь ды филологиянь факультетэнть. Важодсь Дагестансо.

Сёрмадсь зярыя тонавтнемапельть эрзянь эйкакштнень туртов, анокстась лездамопельть тонавтыцятнененьгак. Дмитрий Надькин — филологиянь наукань доктор, профессор, паро тонавтыця, конань пек вечксть студенттнэ. Теде башка сон сёрмадсь валморот.

Ламо сёвномат ды покордамот савкшнось цидярдомс те ломанентень эсь раськенть пшкадеманзо кис. Ансяк те Дмитрий Надькинэнь эзизе тандавто. Раськень тевтнень сон ветясь апак пеле, превейстэ. Покшось, кода кортыть, седе парсте неяви ве ёндо. Се, мезе кенерсь тееме эсь нурька пингензэ перть Дмитрий Надькин, кадовсь эрзятнень мельс-превс. Ушодозь тевензэ поладызь лият. А стяко ламот тешкстыть, бути аволь сон, раськень ламо кевкстематне те шкас авольть топавтово. «Чилисема» журналонь теицятне мельспаросот секс, мекс Дмитрий Тимофеевич Надькин ульнесь эрзянь эйкакшонь ды од ломанень журналонь редколлегиянь совицякс. Сонзэ мелензэ-валонзо пек лездасть журналонтень кеместэ стямс касомань-кемекстамонь кинть лангс. Надькинэнь кеме валозо валдомгавтызе эрзянь кельсодыйтнень превест. Д. Т. Надькин кадови эрзятнень мельс-превс кода алкуксонь содый, доктор, профессор, валморонь виев сёрмадыця.

Кулось 1992 медьковонь 15 чистэ Суоминь Масторсо, калмазь Саранскойсэ.

Сёрмадовксонзо

Мордовиянь книгань издательствасо лиссть валморонь колмо пусмонзо:

«Кустемат» (1977)
«Чачома эле» (1983)
«Эрямонь лув» (1987)

Дмитрий Тимофеевич Надькин покш мель явсь вишка ловныцятненень: сёрмадсь сыненст ёвкст, валморот, конат лиснесть «Чилисема» журналсо. «Лов тештинеть» (1989) вейсэнь пусмонтень совавтозь эйкакштненень алтазь Надькинэнь валморонзо. Кода алкуксонь эрзянь ломань Дмитрий Тимофеевич пек ризнэсь-мелявтсь эрзянь келенть ды раськенть кис. Те сэредьксэсь кармавтызе сонзэ стямс «Масторава» вейсэндявксонь прявтокс.

Сёрмадовкст

Дмитрий Тимофеевич Надькин. Чачома чистэнзэ 70 иетненень // «Сятко». — 2004. — № 5. — С. 86-107.