Орлов, Пётр Иванович
| Пётр Иванович Орлов | ||||||||
|---|---|---|---|---|---|---|---|---|
 | ||||||||
| Чачома чизэ | 1923-це иень якшамковонь 16-це чи | |||||||
| Чачома тарказо | дер. Танеевка, Саранский уезд, Пензенская губерния, РСФСР, СССР | |||||||
| Кулома чизэ | 1945-це иень чадыковонь 3-це чи (22 иеть) | |||||||
| Кулома тарказо | Чаковец, Шаблон:Мс | |||||||
| Масторозо |
 СССР |
|||||||
| Кодамо ушмосо |
 ВВС |
|||||||
| Служамонь иетне | 1940—1945 | |||||||
| Званиязо |
 старший лейтенант |
|||||||
| Частезэ | 707-й штурмовой авиационный полк | |||||||
| Тюремат/войнат | ||||||||
| Казнеть ды премият |
|
|||||||
Пётр Ива́нович Орло́в (1923 —1945) — гвардиянь старшей лейтенант, Ине Отечественной войнасо улиця, Советской Союзонь Герой (1944-це ие).
Эрямо кизэ
Чачсь 1923-це иень якшамковонь 16-це чистэ Танеевка велесэ (ней — Саран ошонть маласо аштиця веле, Мордовия Республика)[1]. Армияв саемадо икеле эрясь Танеевка велесэ, прядызе Саран ошонь 2-це номерсэ средней школанть, яксесь ошонь аэроклубов ды важодсь Саран ошоь ОСВОД-сэ.
1940-це иестэ Орлов ульнесь саезь Важодицянь ды сокицянь-видицянь Якстере Армияв, 1941-це иестэ прядызе Энгельсэнь военной авиационной ливтницянь школанть. 1942-це иень сундерьковсто саезь — Ине Отечественной войнань фронтнэсэ[2].
Ульнесь Демянской икелев молема операциятнесэ 1944-це ды 1943-це иетнестэ, Старорусской икелев молема операциясонть 1943-це иень даволковсто, Демянской плацдарманть немецэнь войскатнень каршо ламоковонь стака тюремасонть. Пётр Иванович Орлов ульнесь кеме обуця марто ды мездеяк а пелиця ломань.
1945-це иень эйзюрковсто саезь ульнесь 707-це штурмань авиаполконь 189-це штурмань авиадивизиянь 17-це менелень армиянь 3-це Украинань фронтонь звенань прявтокс. Се шкантень сон тейсь штурмовиксэ 80 тюремань ливтямот ды 692 тюремань ливтямот вень бомбардировщиксэ, мейсэ тейсь ятонтень пек ламо ёмавкст. Полксо лововсь паро ливтницятне ютксо вейкекс, стака тевень топавтомань мастерэкс.
1942-це иень панжиковонь 21-це чистэ сонензэ максозель спецтев яжамс Ловать леенть трокс переправанть, конась идезель зенитной артиллериянь виев леднемасо ды валдомтозель ламо прожекторсэ. Тень лангс апак вано, Пётр Орлов лиссь леднема алдо зонастонть ды се шкасто, зярдо автоколоннанть ульнесь переправасо заторозо, целязь бомбометаниясо яжизе переправанть. Тюрематнесэ ульнесь пек ранязь (вить лавтовос ды чамас), ансяк курок мекев велявтсь стройс. Заданиянь топавтомсто 6-8 самолет марто группасо, ютавтсь 4 менелень тюремат Ме-109, Ме-110 ды Фв-190 ятонть истребительтне марто, группань тюрематнесэ правтозельть кавто Вф-190.
1944-це иень ацамковонь 29-30 це читнестэ топавтсь командованиянь специальной боевой кармавтома стакадояк стака метеоусловиясо, тейсь 5 паро боевой ливтямот Ил-2 самолетсо, ёртнесть агитлистовкат Будапешт ошонть маласо кружазь ятонь группировканть велькссэ. Тевенть парсте топавтызе, ёртнесь 576000 агитлистовкат, мезень кис 17 ВА командующеенть пельде ульнесь максозь сюконямо ды казезель 2-це степенень «Отечественной войнань» орденсэ.
1945-це иень якшамковонь 11-це чистэ автоколоннань штурмовикень ды ятонть эрий виенть пингстэ Секешфехервардо седе северо-запад ёно 4 заходс мадстизе 1 авиабатареянть леднема толонзо, теде башка Шереда маласо сонзэ атаковизь Ме-109 кавто истребительть, ансяк стака каявоманть лангс апак вано кирдинзе весе атакатнень ды ванстызе экипажонть ды самолётонть.
1945-це иень якшамковонь 29-це чистэ 6 самолётсто аштиця группасо улемстэ яжасть ве таркас пурназь танкт ды авторанспорт шоссейной кияванть Н.-Хатош ды Надь эрямо таркатнень ютксо, зенитной артиллериянть пек виев леднема толноть лангс апак вано 6 заходс группась яжась ды лоткавтсь 5 танкт, 7 автомашинат войска ды груз марто ды вейке зенитной точка. Теке марто сонсь яжась войска ды груз марто 1 танк ды 2 автомашинат.
Казема листоконть эйстэ сёрмадовкс: «Ливтни боевой кармавтоматнес покш мель марто стака метеоусловиясо, невти ливтниця ды штурманонь тевентень пек паро анокстамо, алкуксонь невтевкс максозь цельтнень маштомсто ды техниканть, эрий виень ды ятонь каршомолиця узлатнень калавтомсто. Эсь маштомачинтень ды содамочинтень паро мельсэ тонавты сонзэ ало аштиця ялгатнень, тонавты полконь ды дивизиянь ливтницятнень сехте паро примертнэсэ, эсь отвагасо ды мужествасо кепеди лётной составонть мелензэ тюремстэ весе стакачитнень ютамсто, види эйсэст ятонтень авечкема ды апелема боевой кармавтоматенень топавтомсто».
1945-це иень чадыковонь 3-це чистэ Чаковец чугункань кинь узланть кис менелень тюреманть пингстэ эскадрильянь командирэнть самолетонзэ копачамсто кавксть понгокшнось леднемас самолетозо, ансяк тень лангс апак вано ды командирэнть тюремастонть валонзо лангс апак вано, сон седе товгак кармась тюреме. Боевой действиянь журналонть коряс 707-це шап-нь 1945-це иень чадыковонь 3-це чистэ цельденть седе вере леднема толсо правтозель 3А Орлов лейтенантонь экипажось, менелень стрелокось младшей сержантось Андросенко, конась менельсэ кирвазсь ды пек куроксто кармась молеме алов, прась Чаковец станциядонть 1 километрадо юг ёнов ды сезевсь[3].
Советской Союзонь Героень лементень ульнесь аравтозь эрямонзо пингстэ (1945-це иень эйзюрковонь 10-це чистэ), педе пес званиянь максомадо заключениясь саезель тевс 1945-це иень умарьковонь 18-це чистэ (772 парсте топавтозь тюремань ливтямотнень кис).
Берянь, мекс меельце подвигензэ кис ульнесь апак казе. Теке марто казезель Якстере Знаменень 3 орденсэ, Отечественной войнань 1-це ды 2-це степенень ордентнэсэ[2] ды медальсэ[4].
Тешкставкст
- ↑ Мордовский краеведческий музей. Петр Иванович Орлов
- ↑ 1 2
Орлов, Пётр Иванович. «Масторонь маралят» вальмась.
- ↑ Память народа::Поиск документов частей. pamyat-naroda.ru. Дата обращения: 1 Сундерьковонь 2022.
- ↑ Выписки из личных и наградных дел Героев Советского Союза, уроженцев Мордовии. Орлов Петр Иванович. 9 апреля 1945 г.
Литература
- Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
- Геройская быль. — Саранск: Мордкиз, 1985.
- Шмелев Н. А. В бой на штурмовиках : [О летчиках 707-го Краснознам. Дунайск. штурмового авиац. полка]. — М. : Изд-во ДОСААФ, 1986. — 110, [2] с., [4] л. ил. : ил. ; 20 см.