Почтань масторлангонь чи

Википедиясто материал - аорев содамкундосто
Почтань масторлангонь чи
Russia stamp 2019 № 2550.jpg
Типесь Профессиональной чи
Официальной лемезэ англ. World Post Day
Теде башка руз. Международный день почты
Смустезэ Весе масторонть лангсо почтань обслуживаниянь тевень кепетема ды кастома, почтань отделениянь важодицятнень туртов поздоровонь ёвтамо
Аравтозь 1969-це иестэ
Ютавтыцясь Почтань масторлангонь вейсэндявкс, Раськетнень Вейсэндязь Организация
Тешкстави Earth flag PD.jpg Раськеютконь чи
Тешкстамонь чись Ожоковонь 9-це чи
Мезе марто сюлмазь 1874-це иень ожоковонь 9-це чистэ Почтань масторлангонь вейсэндявксонь теевеманть марто
Логотип РУВИКИ.Медиа Почтань масторлангонь чи

По́чтань масторлангонь чи (руз. Всеми́рный де́нь по́чты) ( ООН-нь официальной кельтнесэ: англ. World Post Day, ар. اليوم العالمي للبريد, исп. Día mundial del correo, кит. 世界郵政日, фр. Journée mondiale de la poste ) — раськеютконь профессиональной чи, кона 1970-це иестэ саезь Сёрмань таргонть лувсо эрьва иестэ тешкстави ожоковонь 9-це чистэ. Кемекстазь Почтань масторлангонь вейсэндявкссо, сови Раськетнень Вейсэндязь Организациянь (ООН-нь) Раськеютконь читнес.

Покшчинть ланга

1939-це иестэ Буэнос-Айрессэ (Аргентинасо) Почтань масторлангонь ХI-це конгрессэ ёвтазель мель теемс «Почтань масторлангонь вейсэндявксонь чи». Тешкстамонь чикс аравтомс — ожоковонь 9-це чинть[1][2]:

  • 1874-це иень ожоковонь 9-це чистэ Бернсэ (Швейцариясо) теезель Почтань масторлангонь вейсэндявксось.

1957-це иестэ Оттавасо (Канадасо) Почтань масторлангонь ХIV-це конгрессэ кемекстазель «Сёрмань тарго». Тешкстамонь чикс аравтызь — ожоковонь 9-це чинть[1][3].

1969-це иестэ Токиосо (Япониясо) Почтань масторлангонь ХVI-це конгрессэ меленть ёвтызь одов[1][2].

1970-це иень ожоковонь 9-це чистэ васенцеде тешкстазель «Почтань масторлангонь вейсэндявксонь чись». Те чись сови Раськетнень Вейсэндязь Организациянь (ООН-нь) масторлангонь ды раськеютконь читнес[3].

Кемекстазь покшчинть прявт смустекс ловови весе масторсонть почтань обслуживаниянь кепетемась ды кастомась, теке марто почтань важодицятнень туртов поздоровонь ёвтамось[2].

1984-це иестэ Гамбургсо Почтань масторлангонь ХIХ-це конгрессэ «Почтань масторлангонь вейсэндявксонь чи» лементь полавтызь «Почтань масторлангонь чинть» лангс[1].

Сюлмазь событиятне

Теде башка улить почтанть марто сюлмазь светской ды раськеютконь (масторлангонь) профессиональной чить:

  • Россиянь почтань чи (медьковонь омбоце таргочистэ)
  • Филателиянь чи (умарьковонь 19-це чистэ, СССР-сэ/покшчись лоткавтовсь тешктавомо)
  • Почтань маркань чи (умарьковонь 19-це чистэ, Россиясо)
  • Сёрмань тарго (ожоковонь 9-це чистэ, Раськеютконь чи)
«Почтань масторлангонь чи», Стандартной марка, Казахстан
(2003-це ие)

Чинь тематне

Эрьва иестэ «Почтань масторлангонь чинтень» ООН-ось раськеютконь прявт мероприятиятнень ютавтомга ёвты чинь теманть:

  • 2004-це иестэ — «Почтань услугатнень ланга эрьва кува ёвтнема» (руз. «Повсеместное распространение почтовых услуг»);
  • 2006-це иестэ — «Почтань масторлангонь сеть: весень туртов ды эрьва ошсо» (руз. «Всемирная почтовая сеть: для всех и в каждом городе»);
  • 2007-це иестэ — «Почтань масторлангонь сеть. Универсальной услуга ды сонзэ экономикань паро ёнкстнэ» (руз. «Всемирная почтовая сеть: оставайся на связи. Универсальная услуга и её экономические преимущества»)[4];
  • 2008-це иестэ — «Почтань сюлмавомась кадови пек эрявиксэкс» (руз. «Почтовая связь остаётся востребованной»)[5];
  • 2009-це иестэ — «Вейсэ кемеманть кис: вейсэнь важодема зыянтомочинть ды сюлмазь сыцячинть кис» (руз. «Вместе во имя доверия: сотрудничество во имя безопасного и взаимосвязанного будущего»);
  • 2011-це иестэ — «Почтань служба — общественной эрявикс услуга» (руз. «Почтовая служба — ценная общественная услуга»)[6];
  • 2012-це иестэ — «Спортсменэнтень эли спортонь вейсэндявксонтень эряви сёрмадомс паро ёжонь сёрма ды эсеть туртов ёвтамс Олимпийской налксематнень смустенть ланга» (руз. «Спортсмену или спортивной организации следует написать письмо с выражением восхищения, чтобы объяснить, что для вас значат Олимпийские игры»)[6];
  • 2013-це иестэ — «Предприятиятнень ды ломантнень туртов почтань кандома» (руз. «Доставка почты предприятиям и частным лицам»)[6];
  • 2014-це иестэ — «Коммуникациянь полавтневиця ландшафтсо почтась вансты эсь тарканзо» (руз. «В меняющемся коммуникационном ландшафте почта отстаивает свои позиции»)[6];
  • 2015-це иестэ — «Масторонть ланга ёвтнемга тыненк эряви покшолгадомс» (руз. «Вы должны повзрослеть, чтобы рассказать о мире»)[6];
  • 2016-це иестэ — «Одкстомтомат, вейсэндявома ды паролгавтома» (руз. «Инновации, интеграция и инклюзивность»)[6];
  • 2018-це иестэ — «Интернетэсь а полавтсы алкуксонь почтанть» (руз. «Интернет не заменит традиционную почту»)[7];
  • 2019-це иестэ — «Почтань масторлангонь вейсэндявксонь улемантень 145 иеть» (руз. «145-летие существования Всемирного почтового союза»);
  • 2020-це иестэ — «Почтадо седе ламо» (руз. «Больше, чем просто почта»);
  • 2021-це иестэ — «Вельмевтеманть туртов одкстомтоматне» (руз. «Инновации в целях восстановления»)[8];
  • 2022-це иестэ — «Почтась весе планетань службанть туртов» (руз. «Почта на службе всей планеты»)[9];
  • 2023-це иестэ — «Почтань сетесь — весень туртов» (руз. «Почтовая сеть — доступная для всех»)[10];
  • 2024-це иестэ — «Эрьва масторонь раськетнень туртов связень теемань, правань ды содамочинь кастомань 150 иеть» (руз. «150 лет обеспечения связи и расширения прав и возможностей народов разных стран»)[11];
  • 2025-це иестэ — «Локальной услугатне. Покш кундавома. #PostForPeople» (руз. «Локальные услуги. Глобальный охват. #PostForPeople»)[2].

Почтань масторланогонь вейсэндявксонь прявтонь кучоматне

Эрьва иестэ «Почтань масторлангонь чистэнть» Почтань масторлангонь вейсэндявксонь генеральной прявтось невти весе масторонтень кучовкс:

Почтань отделениятне аштить эрявикс куншкакурокс виев, паро, вейке-вейкень марто сюлмазь вейсэндявкстнэнь туртов.

«Вейсэ кемеманть кис» – те стявтыця тердема весе правительстватнень ды почтань сынст оператортнэнь туртов кирдемс почтань цифровой вейкине территориянь кастоманть, кона сюлмазь пингеде-пингест теевиця физической сетьсэ. Те иень Почтань масторлангонь чистэнть тердян Тынк важодемс Почтань масторлангонь вейсэндявксонть марто сень кис, весе ломантненень цифровой экономикантень доступонть получамга а эряволь ваномс почтань эсеть отделениядо седе васов. Карматано важодеме вейсэ истямо масторонь теемга, косо эрьванень мереви нолдамс тевс цифровой ды физической зыянтомочинь услугатнень, конатнень мереви невтемс почтань минек покштояк покш сетесь.

Ёвтан поздоровт Почтань масторлангонь чинть марто!Масахико Метоки, 2023-це ие, [12]

Мероприятиятне

«Почтань масторлангонь чистэнть» эрьва иестэ ютавтневить истят мероприятият[2]:

  • филателистической невтемат;
  • почтань од маркань нолдамот ды сынст башка тешкстамот;
  • плакатонь невтемат;
  • почтань отделениятнесэ панжадо чинь ютавтомат, культурань эрьва кодат куншкакуротнесэ ды музейтнесэ конференциянь, семинаронь, практикумонь ютавтомат;
  • культурань, спортонь мероприятият;
  • сехте вадря важодицятнень каземат.

Те чинтень почтань кой-кона администрациятне нолдыть башка казнеть (футболкат, значокт ды седе тов)[2].

1971-це иестэ саезь Почтань масторлангонь вейсэндявксось эрьва ие ютавтни од ломантнень (9 иестэ саезь 15 иес) туртов сёрмань сёрмадомань коряс Раськеютконь пелькстамо. Сёрмань сёрмадомга кочкави эрявикс тема. 2025-це иестэ ушодовсь «Арсек, теке тон — океан» (руз. «Представьте, что вы — океан») од ломантнень туртов сёрмань сёрмадомань Раськеютконь 54-це пелькстамо, прявт мероприятиятне ютасть Дубаисэ (Арабонь вейсэндязь Эмиратсо). Пелькстамось ютавтневсь Иневедень раськеютконь вейсэндявксонть, ООН-ть, ЮНЕСКО-нть лездамост вельде.

2015-це иестэ ООН-нь Генеральной Ассамблеясь ёвтась «2030-це иес паро кастоманть туртов 17 путовкст» прявт аравтомат, конат аравтозь покш кажонь, вачочинь, аволь видечинь ды аволь вейкетьксчинь бороцямонть каршо, теде башка ушолксонь полавтоманть каршо. Эрьва теварсевксэнть коряс почтась максы неть путовкстнэнь кастомга инфраструктуранть[2][13].

2017-це иестэ Куала-Лумпурсо (Малайзиясо) ютась «Pos Silang» почтань маркань нолдамо. Истямо койсэ нолдазель од открыткак, папкат ды конвертт. Куала-Лумпурсо ды Кота-Кинабалусо ютась «Postcrossing Meetup» 5-це вастовома, теде башка почтань открыткань невтема[14].

«Почтань масторлангонь чись» Абуджа ошсо (Нигериясо), 2020-це ие

Россиясо

2006-це иестэ Архангельскоень почтамтсо панжозель «Сорочка письма» почтань конвертэнь невтема. Приднестровьясо ютась зярыя сядонь сыця ды туиця корреспонденциянтень тешксэнь путома. Украинань Донецкой ёнкссо ютась филателистической невтема, теде башка анокстазельть балонной ды парашютной почтань рейсат (кучозь эрьва конвертэсь мазылгавтозель почтань башка штемпельсэ ды наклейкасо)[15][16].

2007-це иестэ Россиянь почтань (руз.) (эрз. региононь филиалтнэсэ ютасть «Мон артан алфавитэнть» (руз. «Я рисую алфавит») артомань коряс Весе Россиянь пелькстамонь изницятнень ды лауреаттнэнь каземась, весемесь алтазель Россиясо почтань васенце маркань тевс нолдамонтень, теке марто Рузонь келень иентень ды Россиянь почтань историянтень. Пелькстамонь ютавтыцякс ульнесть: «Россиянь почта» федеральной государственной унитарной предприятиясь, «Марка» нолдамонь микшнемань куншкакурось ды Россиянь филателистэнь вейсэндявксось[17].

2019-це иестэ Ульяновскойсэ «Почтовое дело Симбирска – Ульяновска» музейсэ «Почтантень кемень иетнень тешкстамонь музеень 10 вастовоматнень» лувсо анокстазельть зярыя промкст. Казизь сехте вадря важодицятнень. Демид Устинов пурныцянть-коллекционерэнть пельде музеентень казезель Брестсэ ютавтозь филателистэнь невтемасто Сырнень медаль[18].

2023-це иестэ Выборгсо Алвар Алтонь ловнома кудосо ютась «Тыненк сёрма» книгань невтемань выставка. Невтевсть Михаил Адрианович Дубайлов библиотекань ловныцянть эсензэ коллекциясто материалтнэ[19].

2024-це иестэ Санкт-Петербургсо А. С. Попов лемсэ Связень центральной музейсэ (руз.) (эрз. анокстазель «Россия 2024» Филателистэнь раськеютконь невтема, кона алтазель Ине Отчественной войнасо Изнямонь 80 иетненень[20].

Секе иестэнть «Северэнь ине экспедициянь маршруттнэсэ» (руз. «Маршрутами Великой Северной экспедиции») просветительской федеральной теварсевксэнть лувсо ютась «Северэнь ине экспедиция» (руз. «Великая Северная экспедиция») почтань Раськеютконь эрьва иень флешмоб (2021-це иестэ саезь), кона алтаезль Россиянь наукань академиянь 300 иетненень ды Таймырэнь ванноматненень «Путт ютамо ки» (руз. «Проложи маршрут») прявт валтнэнь марто. Эйкакштнень, тетяст-аваст ды тонавтыцяст ютксо полавтневить открыткат, анокставить невтемат ды тематикань мероприятият[21].

Мельстуиця факттнэ

  • Египетсэ ульнесь муезь почтань содавикс тевконёв, конанень минек эрадо икеле 255 иеть[22];
  • 1653-це иестэ Парижсэ появасть почтань васенце парготне[23];
  • 1840-це иень панжиковонь 6-це чистэ Англиясо нолдазель модамасторонть лангсо «Раужо пенни» (руз. «Чёрный пенни») почтань васенце марка[24];
  • 1911-це иень даволковонь 18-це чистэ Аллахабадасто Найнив (Индиясо) почтань васенцеде ускомась ютась аэроплан вельде, кучозельть 6 тёжадо ламо сёрмат ды 250 открыткат[25];
  • 1916-це иестэ Америкасто бизнесменэсь банконь зданиянь строямос почтань вельде кучсь лия ошов аволь покш кучомасо 80 тёжадо ламо кирьпецть. Сонзэ ловоматнень коряс, почтань пачк строямонь материалтнэнь кучомас ютавтозь аламо ярмакт. Теде мейле почтань кучоматнень коряс тевс нолдазельть кой-кодат кардамот: чизэнзэ вейке ломанентень меревсь кучомс 91 килограммань аволь седе стака сталмосо кучома[25];
  • Римень Прявт Озныцянтень кучовить модамасторонть лангсо сехте ламо сёрмат (эрьва таргосто зярыя тёжат кучомат)[25].

Тешкставкст

  1. ↑ 1 2 3 4 Всемирный день почты (World post day). kerchmuseum.ru. Дата обращения: 17 Таштамковонь 2025.
  2. ↑ 1 2 3 4 5 6 7 Nations, United. Всемирный день почты | Организация Объединенных Наций, United Nations. Ваннозь 17 Таштамковонь 2025.
  3. ↑ 1 2 Письма Богу и другие почтовые послания - ТАСС, TACC. Ваннозь 17 Таштамковонь 2025.
  4. ↑ На Урале стартует неделя письма, Новый День (5 Ожоков 2007). Ваннозь 17 Таштамковонь 2025.
  5. ↑ Почтовая связь остается востребованной, Новости ООН (8 Ожоков 2008). Ваннозь 17 Таштамковонь 2025.
  6. ↑ 1 2 3 4 5 6 World Post Day 2024: Information, Theme & Dates, IAS Paper (4 Ожоков 2024). Ваннозь 17 Таштамковонь 2025.
  7. ↑ Всемирный день почты: интернет не заменит традиционную почту, Новости ООН (9 Ожоков 2018). Ваннозь 17 Таштамковонь 2025.
  8. ↑ Всемирный день почты, РИА Новости (9 Ожоков 2021). Ваннозь 17 Таштамковонь 2025.
  9. ↑ Всемирный день почты, РИА Новости (9 Ожоков 2022). Ваннозь 17 Таштамковонь 2025.
  10. ↑ 9 октября отмечается Всемирный День почты, www.ap22.ru. Ваннозь 17 Таштамковонь 2025.
  11. ↑ 9 октября — Всемирный день почты: история и традиции праздника, Известия (8 Ожоков 2024). Ваннозь 17 Таштамковонь 2025.
  12. ↑ Обращение генерального директора ВПС по случаю Всемирного дня почты (руз.) (PDF). www.upu.int/ (2023). Дата обращения: 17 Таштамковонь 2025.
  13. ↑ Первая страница — Устойчивое развитие(руз.). www.un.org. Дата обращения: 17 Таштамковонь 2025.
  14. ↑ 06 October 2017: Media Preview World Post Day – Pos Silang, myfdc (6 Ожоков 2017). Ваннозь 17 Таштамковонь 2025.
  15. ↑ Двина-Информ | Главные Новости | В Архангельской области отметят Всемирный день почты. web.archive.org. Дата обращения: 17 Таштамковонь 2025.
  16. ↑ «Почта Приднестровья» проводит сегодня специальное гашение корреспонденции, приуроченное к Всемирному дню почты. web.archive.org. Дата обращения: 17 Таштамковонь 2025.
  17. ↑ Награждение участников областного этапа Всероссийского конкурса рисунка почтовой марки «Я рисую алфавит» (руз.). www.samru.ru. Дата обращения: 17 Таштамковонь 2025.
  18. ↑ gtrkvolga. Всемирный день почты – ГТРК ВОЛГА Ульяновск(руз.). gtrk-volga.ru. Дата обращения: 17 Таштамковонь 2025.
  19. ↑ Выставка "Вам письмо" (руз.). aalto.vbgcity.ru (9 Ожоковонь 2023). Дата обращения: 18 Таштамковонь 2025.
  20. ↑ Валерий Сушков. Филагид-путеводитель во Всемирный день почты отмечен большой серебряной медалью в номинации «Филателистическая литература» на Международной филателистической выставке «Россия 2024» (руз.). оиак.рф (10 Ожоковонь 2024). Дата обращения: 18 Таштамковонь 2025.
  21. ↑ Международный почтовый флешмоб «Великая Северная экспедиция» пройдет во Всемирный день почты (руз.). оиак.рф (3 Ожоковонь 2024). Дата обращения: 18 Таштамковонь 2025.
  22. ↑ World Post Day 2020: Date, Theme and Significance, News18. Ваннозь 17 Таштамковонь 2025.
  23. ↑ Патрина, Дарья. Сыграть в ящик: факты о почте и почтовые рекорды, Вокруг света. Ваннозь 17 Таштамковонь 2025.
  24. ↑ Самая первая марка. Как все начиналось... - Статьи. antiqueland.ru. Дата обращения: 17 Таштамковонь 2025.
  25. ↑ 1 2 3 10 интересных фактов о почте - Телеканал «О!». Ваннозь 17 Таштамковонь 2025.

Ссылкат

Саезь "https://myv.ruwiki.ru/w/index.php?title=Почтань_масторлангонь_чи&oldid=538184"-стэ