Пшеничников, Николай Андреевич

Николай Андреевич Пшеничников
Николай Андреевич Пшеничников
Чачома чизэ	1924-це иень медьковонь 20-це чи
Чачома тарказо	Урей Третий, Краснослободскоень уезд[d], Пензань губерния[d], РСФСР[d], СССР;
Кулома чизэ	1986-це иень чадыковонь 1-це чи (61 ие)
Кулома тарказо	Ковёл ош, Мордовиянь Автономной Советской Социалистической Республика[d], РСФСР[d], СССР;
Масторозо	СССР
Кодамо ушмосо	морской пехота СССР; стрелоконь войскат
Служамонь иетне	1942—1946; 1950—1956
Званиязо
Частезэ	Ине Отечественной войнань иетнестэ:; • 83-це морской пехотань башка стрелоконь бригада;; • 989-це стрелоконь полк 226-це стрелоконь дивизия;; • 683-це стрелоконь полк 151-й стрелоконь дивизии
Тюремат/войнат	Ине Отечественной война;

Николай Андреевич Пшеничников (1924—1986) — советской военной. Ине Отечественной войнасо улиця. Советской Союзонь Герой (1945). Старшой лейтенант.

Эрямо кизэ

Николай Андреевич Пшеничников чачсь 1924-це иень медьковонь 20-це чистэ Пензань губерниянь Краснослободской уездэнь Урей велесэ (ней — Урей 3-це, Мордовия Республикань Темниковань буе, Россия) Андрей Михайлович ды Анна Фёдоровна Пшеничниковтнень сокицянь-видицянь семиясост. Руз. Прядсь 7 класст. Школань прядомадо мейле Николай Андреевич тусь Тбилисив. Прядсь фабрично-заводской ученичествань школа. Важодема пингензэ ушодызе слесарекс Тбилисинь станко-инструментальной заводсо.

Важодицянь ды сокицянь-видицянь Якстере Армияс Н. А. Пшеничниковонь саизе Тбилиси ошонь Ленинской райононь военкоматось 1942-це иень умарьковсто. Ютынзе од боецэнь курсатнень. Важодиця армиясо Н. А. Пшеничников красноармеецэсь 1942-це иень ожоковонь 14-це чистэ саезь кармась 144-це башка стрелковой батальононь Туапсень военно-морской базань 83-це морской пехотань башка стрелковой бригадань стрелококс. 1942-це иень ожоковонь 17-це чистэ бригадась совавтозель Закавказкой фронтонь 56-це армиянь Черноморской войскань группань составс. Немецэнь-фашистэнь ятонть марто тюрематнесэ Николай Андреевич 1942-це иень ожоковонь 18-це чистэ саезь. Кавказонь кис тюрематнесэ улиця. Боевой крещениязо ульнесь Туапсень идемань операциянть пингстэ Краснодаронь ёнксонь Фанагорийской веленть кис тюремстэ. Теде мейле, кода немецтнэ ёртозельть Туапсе ошонть эйстэ, бригадась ливтезель резервс, косо ульнесь 1943-це иень даволковс. 1943-це иень даволковонь 4-це чистэ саезь Николай Андреевич ульнесь Мысхаконь десантсэ. Штабонь ванстомань ротасо улемстэ тюрсь Вишка модасо Федотовка веленть маласо, казезель «Отвагань кис» медальсэ. 1943-це иень эйзюрковонь 13-це чистэ Николай Андреевич ульнесь ранязь, ансяк теке кадовсь стройсэ. 1943-це иень сёксестэнть Н. А. Пшеничников красноармеецэсь ульнесь Новороссийскоень-Таманень операциясонть, эсь подразделениянь составсо олякстомсь Новороссийск ошсонть, штурмовась пек виевгавтозь ды эшелонировазь Готенкопф немецэнь оборонань линиянть, ваньскавтсь ятонь войскатнеде Таманень пельсусиянть. Таманьсэ меельце тюрематнесэ 1943-це иень ожоковсто сон таго ранязель ды понгсь больницяс.

Пичкамодо мейле 1943-це иень сундерьковсто Н. А. Пшеничников красноармеецэсь ульнесь кучозь 1-це Украинской фронтов. Николай Андреевичэнь совавтызь 226-це стрелковой дивизиянь 989-це полкс, косо ёроков тюрицянть сеске путызь 4-це стрелковой ротань командирэкс. Киевской оборонительной операциястонть ды 1943-це иень ацамковонь 19-22 читнестэ сонзэ отделениясь эсь ротань составсо ульнесь вермахтонь 48-це танконь корпусонь контрударонь кирдемстэ Коростеня маласо.

Зярдо лоткавтовсь Киев ало контрнаступлениясь, 1-це Украинань фронтонь войскатне сыргасть наступленияс Житомирско-Бердичевской операциянь пингстэ. Н. А. Пшеничников красноармеецэсь невтизе прянзо Житомирэнь ёнксонь Любар веленть кис тюремасонть. 1944-це иень якшамковонь 13-це чистэ эсь отдления марто удалов потыця ятонть мельга панемстэ сон васенцекс велентень ды маштсь колмо немецэнь солдат, конатне арсесть пултамс веленть, мезенть кис казезель «Боевой заслугатнень кис» медальсэ. Витьберёконь Украинань олякстомсто Николай Андреевич ульнесь Ровно-Луцкой ды Проскуровско-Черновицкой операциятнесэ, эсь подразделениянь составсо лездась олякстомо Шепетовканть, Изяславонть ды Надворноенть. Львовско-Сандомирской операциянть пингстэ 226-це стрелковой дивизиясь 18-це армиянь составсо ветясь тюремат Станислав ошонть ало.

Тюрематнесэ Н. А. Пшеничников невтизе прянзо ёроковокс ды мездеяк а пелиця командирэкс, конась машты топавтомо путозь боевой задачатнень. Станиславонь олякстомодонзо мейле сонзэ кучизь нурькине армейской младшой лейтенантонь курсас, конатнень прядомаст мейле 1944-це иень ожоковсто Николай Андреевичэнь аравтызь 151-це стрелковой дивизияс, конась се шкастонть совсесь 18-це армияс, ды сон саизе командования алов 683-це стрелковой полконь стрелковой взводонть. Офицерэнь васенце тюремазо Н. А. Пшеничниковонь ульнесь Карпатско-Ужгородской операциянь пингстэ Мучкаево ошонть маласо. Мейле ветясь эсь взводонзо тевтнесэ Чопа ошонть олякстомсто. 1944-це иень сундерьковсто 151-це стрелковой дивизиясь ульнесь максозь Украинской фронтонь 7-це гвардейской армиянтень. Н. А. Пшеничников младшой лейтенантось пек прянзо невтизе Будапештской операциянть пингстэ.

1944-це иень сундерьковонь 26-це чистэ 7-це гвардейской армиянь подразделениятне сезизь ятонь оборонанть Хатван ошонть маласо, ды немецэнь ды венгерской войскатнень оборонань опорной пунктонть самадонзо мейле сыргасть икелев Будапештэнь направлениясонть. Ятось арсесь лоткавтомс армиянь пелькстнэнь икелев молеманть Асод ошонть маласо теде икеле анокстазь позициятнес. 1944-це иень ацамковонь 7-це чистэ батальононтень, конантень совазель Н. А. Пшеничников младшой лейтенантонь взводось, максозель кармавтома саемс Иклад эрямо тарканть ды тень эйсэ керямс ятонь группировканть коммуникациянзо, конась кирдсь Асодонть. Иклад кис тюремасонть Пшеничниковонь взводось ятонь пулемётонь ды артиллериянь пек виев леднема ало виев ёртовкссо васенцекс совась велентень, соовамсто яжась эсь ки лангсо кавто леднемань таркат ды 13 ятонь солдат. Атаканть пингстэ Пшеничников младшой лейтенантось мольсь сехте икеле ды весенень невтемга усксь мельганзо эсь боецтнэнь боевой кармавтомань топавтомантень. Теке чистэнть 7-це гвардейской армиянь войскатне саизь Асод ошонть. Венгриянь столицанть маласо Сада веленть вакссо 1944-це иень ацамковонь 11-це чистэ немецэнь-венгрань войскатне пехотань ламо вийсэ артиллериянть лездамо марто зярыяксть якасть контратакас. Пшеничников младшой лецтенантонь взводось эсь балаьононть вить флангонь пекстазь кирдсь ятонь веете кежей атакат, тень пингстэ маштсь ц лендемань таркат, 3 шожда пулемет ды малав 15 ятонь яолдатт. Тюремань сехте стаканть шкастонть Николай Андреевич кепединзе боецэнзэ кедьсэ тюремас ды сынь ёртызь ятонть седикелень позициятнес. Пшеничниковонь взводонть героекс прянь ветямозо аволь ансяк идизе батальононь флангонть, теке марто лездасть совамс ятонть оборонантень.

Ятонть ламо виензэ кирдезь 1944-це иень ацамковонть прядовомантень 7-це гвардецской армиянь подразделениятне лиссть Будапешт ошонь петнес. Ацамковонь 27-це чистэ Н. А. Пшеничников младшой лейтенантонь взводонтень максозель боевой кармавтома артиллериянь лездамонзо марто сеезмс ятонь оборнанть ды кемекставомс Ракошсантмихаль^[1] эрямо тарканть ало, конась ашти Венгриянь прявтошонть маласо. Уськень приявксонть ютамодонзо мейле Николай Андреевич эсь взводонзо марто совась прявтошонть ало аштиця таркатнес ды эшкинзе каршо аштиця венгрань солдатонь ротанть. Ансяк ятось курок чаркодсь, кода Пшеничниковонь взводсонть кадовсь 10-шка тюрицят. Зярдо эрьва ёндо саизь советской солдатонь аволь покш отрядонть, венгратне 3 бронетранспортёронь лездамо марто арсесть сынст маштомс, ансяк Николай Андреевич эсь тюрицятнень марто кеместэ кирдсь саезь позициятнесэ. Кежей тюремасо ятонь ротась ламо ёмавтсь, малав 47 чавозь солдатт, 15 эйстэдесть маштынзе сонсь Пшеничников младшой лейтенантось. Теке марто Николая Андреевич кирвазтсь кавто бронетранспортёрт. Зярдо взводонть тевензэ кармасть улеме пек берянть, Николай Андреевич кадынзе вете тюрицятнень оборонань кирдеме, сонсь лия веете солдат марто сезизе окружениянть, вейсэндявсь батальононть прявт вийтне марто ды велявтсь мекев подкрепления марто. Ятось ульнес педе пес колазь, боевой кармавтомась топавтозель.

1945-це иень чадыковонь 28-це чистэ СССР-нь Верховной Советэнь Президиумонь кармавтоманзо коряс немецэнь-фашистэнь каявицятнень каршо тюремань фронтсо парстеяк парсте командованиянь боевой кармавтоматнень топавтомаст кис ды тень пингстэ отвагань ды геройствань невтемань кис Пшеничников Николай Иванович младшой лейтенантонтень ульнесь максозь Советской Союзонь Героень покш лемесь.

1945-це иень телестэнь Н. А. Пшеничников ульнесь Будапештсэ ушонь тюрематнесэ. Эрьва ёндо саезь ошсо немецэнь гарнизононть маштомадонзо мейле 151-це стрелковой дивизиясь ульнесь максозь 3-це Украинань фронтонть 26-це армиянь составс, конась сехте пек саизе эсь лангс СС-нь 6-це танконь армиянь каявоманть Балатонской оборонительной операциянть пингстэ. Войнань прядовомсто Николай Андреевич ульнесь Венской операциясонть, эсь подразделениянть составсо олякстомстсь Эньинг ды Вашвар оштнэнсэ. Тюрема кизэ прядовсь Австриясо Лафниц ошонть маласо^[2].

1946-це иестэ Николай Андреевич ноладзель запасос. Сон велявтсь Мордовияв, ансяк 1950-це иестэ таго саезель военной службас. 1954-це иестэ сон прядызе Саратовонь пехотань училищанть. 1956-це иес служась Советской Армиянь строевой частнесэ. Запасос Н. А. Пшеничников тусь старшей лейтенант званиясо. Эрясь Мордовиянь АССР-нь Ковылкина ошсо, важодсь токарень бригадирэкс Ковылкинань электромеханической заводсо. 1986-це иень чадыковонь 1-це чистэ Николай Андреевич кулось. Калмазь Ковылкинасо.

Казнеть

«Сырнень Теште» медаль (28.04.1945);
Ленинэнь орден (28.04.1945);
Отечественной войнань 1-це степенень орден (11.03.1985);
Якстере Тештень орден (21.12.1944);
медальть, сынст ютксо:
- медали «Отвагань кис» кавто медальть (24.08.1943; 15.12.1944);
- медаль «Боевой заслугатнень кис» (25.06.1944);
- «Кавказонь оборонань кис» медаль.

Лемень кундамо

Н. А. Пшнеичниковонь Советской Союзонь Героенть лемесь максозь Ковылкинасо ульцянтень, кудонть лангсо, косо сон эрясь, поводезь мемориалонь лаз.

Тешкставкст

↑ Ныне XVI район города Будапешта.
↑ По другим данным Н. А. Пшеничников завершил боевой путь в Праге (источник: биография Н. А. Пшеничникова на неофициальном сайте города Темникова).

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
Андреев С. А. Совершённое ими бессмертно: в 2 кн. — М.: Высшая школа, 1976. — Т. 1. — С. 268. — 336 с.
Геройская быль: очерки и зарисовки о Героях Советского Союза — уроженцах Мордовии. — Саранск: Мордовское кн. изд-во, 1985. — С. 273—275. — 376 с.