Содамочинь чи
Б. Н. Ельцин лемсэ Президентэнь ловнома кудонь материалт
Б. Н. Ельцин лемсэ Президентэнь ловнома кудонь фондсто материалт
Президентэнь ловнома кудо
| Содамочинь чи | |
|---|---|
.jpg) Кисловодскоень 17-це № школасо Содамочинь чи (2024-це ие) | |
| Аравтозь |
1984-це иень аштемковонь 15-це чистэ СССР-нь Верховной Советэнь Президиумонь 373-11-це № кармавтомасо |
| Тешкстамонь чись | таштамковонь 1-це чистэ |
| Ютавтомань койтне |
школань оршамопель цецянь пусмот |
| Мезе марто сюлмазь | эрьгелемачинь промкс марто |
 Содамочинь чи | |
Содамочи́нь чи (эли Таштамко́вонь ва́сенце чи) (руз. Де́нь зна́ний (или 1 сентября́)) — государственной покшчи, кона эрьва иестэ тешкстави таштамковонь 1-це чистэ Россиянь ды постсоветской кой-кона мастортнэнь учреждениятнесэ, сюлмазь тонавтнема иень ушодовоманть марто. 1984-це иестэ «Эрьгелемань ды ледстнемань читнеде» СССР-нь Верховной Советэнь Президиумонь кармавтомасо кемекстазь официальной покшчикс[1].
Покшчинть ланга
Таштамковонь 1-це чинь покшчинть смустезэ сюлмазь кезэрень ковкерьксэнь койтнень-кирдатнень марто. Минек эрямонь IV-це пингестэ Византиясо Никейской соборонть арсеманзо коряс од иенть кармасть тешкстакшномо таштамковонь 1-це чистэ. Русенть эйсэ византиянсенть коряс од иень тешкстамонть ютавтызь 1492-це иестэ — те ие, кона ушодовсь таштамковонь 1-це чистэ, ульнесь аравтозь III-це Иван ине чинязонть кармавтомасо. Секе шкастонть рузтнэнь эрямо таркатнесэ таштамковонь 1-це чись сюлмавкшнось велень хозяйствань важодематнень прядовоманть ды налогтнень пурнамонть марто, покшчинть лемдясть Семёнонь чикс; кудотнень ды площадтнень мазылгавтнесть чувтынесэ, парсейсэ ды эрьгесэ[2].
I-це Петрань пингстэ од иенть кармасть тешкстамо якшамковонь 1-це чистэ, ансяк тонавтнемань иенть поладызь ушодокшномо сёксня: пертьпельксэсь макснесь эйкакштненень оймсемс кизна, сёксень каникулатне улевельть пек кельмекс[2]. 1804-це иестэ «университеттнэнень кандовиця тонавтнема таркатнень уставсо» кемекстазель, гимназиятнесэ тонавкстнэ кармить ушодовомо умарьковонь 1-це чистэ ды прядовомо медьковонь 1-це чистэ, «медьковось ловови важодемань вешнемань эли оймсемань ковокс». Тень пингстэ 1930-це иетнес Россиясо тонавтнемань иень ушодовомань шканть коряс вейкине шка арасель: гимназиятнень ды раськень училищатнень панжтнесть умарьковсто саезь, велень школатнес эйкакштне ушолесть якамо ансяк паксянь важодематнень прядовомадо мейле[3]. 1930-це иестэ Раськень комиссаронь советэсь мерсь сайнемс школав 8-10 иесэ весе эйкакштнень сёксня. 1935-це иень таштамковонь 3-це чистэ вейкине чинть кемекстызе СССР-нь раськень комиссаронь советэсь ды Коммунистэнь Весе Россиянь партиянь (большевикень) Центральной советэсь, кармавтозель тонавтнемань од иенть ушодомс таштамковонь 1-це чистэ[4][5].
Тонавтнемань од иень ушодовоманть коряс вейкине вешеманть лангс апак вано 1980-це иетнень куншкас таштамковонь 1-це чись ульнесь ансяк важодемань чикс. Фёдор Брюховецкий Российской Советской Федеративной Социалистической Республикань (РСФСР-нь) школань заслуженной тонавтыцясь ёвтась мель теемс те чинть покшчикс ды тонавтницятнень туртов эрьгелемачикс. Истя, 1984-це иень аштемковонь 15-це чистэ СССР-нь Верховной Советэнь Президиумось нолдась «Эрьгелемань ды ледстнемань читнеде» кармавтома, косо таштамковонь 1-це чись яволявтозель Содамочинь весе раськень чикс. Те шкастонть саезь СССР-нь весе школатнесэ кармасть анокстакшномо эрьгелемачинь промкст, чинь васенце пельксэсь алтазель тематикань тонавкстнэнень ды тонавтыцятнень марто вастовоматненень. СССР-нь каладомадо мейле коесь ванстовсь: Россиясо ды постсоветской ламо лия мастортнэсэ таштамковонь 1-це чись каднови покшчикс ды тонавтнемань васенце чикс[4][6].
Кода тешкстыть
Россиясо
Содамочинь чинть прявт коекс ловови покшчинь промксонь ютавтомась. Таштамковонь 1-це чистэ валске тонавтницятне пурнавкшныть школа икеле; гайги государственной гимнась, кепедеви масторкоцтось, прявтось ды тонавтыцятне ёвтыть эйкакштнень туртов тонавтнемань од иенть марто поздоровт. Кевейкееце классонь тонавтницясь лавтовонзо лангсо канды баягасо гайгиця васенце классонь тонавтницянть, мезесь сюлмазь тонавтнемань од иень ушодовоманть марто. Промкстнэсэ эйкакштне ловныть валморот, морыть морот, невтить эсь пряст лия мейсэ ды путыть цецят школань прядыцятнень эли войнасо улицятнень кеврунгонтень[3][7].
Покш промксто мейле ютакшныть вастовомат классонь ветицянть марто, ютавтневить тиринь масторонь вечкемань кастомадо, зыянтомочиде ды эрямонь питнечиде кортамот. 2022-це иестэ саезь эрьва пондельникстэ тонавкстнэде икеле ютавтневи «Эрявикстэ кортамот» аволь классонь курс; васенцесь истят тонавкстнэстэ алтазь Содамочинь чинтень[3].
Университеттнэсэ покшчинь промкстнэ ютавтневить седе чуросто; тень таркас васенце курсонь тонавтницятнень совавтыть студентэнь эрямос, теевтить содавиксэкс тонавтыцятнень марто ды ютавтнить содавтомань тонавкст[8].
Лия масторсо
Япониясо тонавтнемань иесь ушодови чадыковсто ды прядови сы иень эйзюрковсто; Южной Кореясо тонавкстнэ ушодовкшновить эйзюрковсто. Франциясо эйкакштне молить школав таштамковонь васенце читнестэ, ансяк эрьва иестэ молема чинть ёвты Тонавтомань министерствась. Германиясо тонавтнемань иесь ушодови умарьковонь прядовомсто саезь ожоковонь куншкас федеральной тарканть лангс ванозь, США-со вейкине чи арась: тонавтомань округтне панжить школатнень медьковонь прядовомсто саезь таштамковс. Австралиясо эйкакштне ушодокшныть тонавтнеме якшамковонь прядовомсто эли даволковонь ушодовомсто[2][6].
Койтне
Содамочинь чинть аполавтневиця прявт тешкстнэ — школань ранецэсь, баягась ды покшчинь промксось. Тейтернетне оршнить кавшаня ашо бантт ды палят, цёрынетне — школань костюмт. Лиясто Содамочинь чинть лемдить «ашо бантонь ды астрань покшчикс» — коень коряс школасо тонавтницятне ды тетяст-аваст казекшнить тонавтыцятненень цецят, ёвтыть тонавтнемань од иенть марто поздоровт. 2014-це иестэ саезь Россиясо ютавтневи «Эйкакштнень таркас цецят» акция, конань лувсо ярмактне, конатнень лангс икеле рамсесть цецянь пусмот, ней кучовить пиштиця эйкакштненень ды урозтнэнень лездамос[7][9][10].
Коень коряс масторонь, ошонь, буень ды эрьва кодамо вейсэндявксонь ветицятне ёвтыть поздоровт Содамочинь чинть марто, тень пингстэ якить инжекс тонавтнема таркатнес[11].
Ламо школатнесэ таштамковонь 1-це чистэ ютавтови тематикань классонь час — Масторлангонь тонавкс.
Тешкставкст
- ↑ День знаний: история и традиции 1 сентября (руз.). РБК Life. Дата обращения: 1 Таштамковонь 2025.
- ↑ 1 2 3 День знаний 1 сентября (руз.). Театр Светлица. Дата обращения: 1 Таштамковонь 2025.
- ↑ 1 2 3 1 сентября, или День знаний: история и традиции праздника (руз.). Коммерсантъ. Дата обращения: 1 Таштамковонь 2025.
- ↑ 1 2 И снова 1 сентября — В России празднуют День знаний (руз.). «Научная Россия» — электронное периодическое издание. Дата обращения: 1 Таштамковонь 2025.
- ↑ День знаний в России: история и традиции праздника — Ульяновск сегодня (руз.). Ульяновск сегодня. Дата обращения: 1 Таштамковонь 2025.
- ↑ 1 2 День знаний 1 сентября 2025: формат дня, история и традиции (руз.). Агроклассы. Дата обращения: 1 Таштамковонь 2025.
- ↑ 1 2 Поздравления на 1 сентября — День знаний в стихах (руз.). vprazdnik.ru. Дата обращения: 1 Таштамковонь 2025.
- ↑ 1 сентября в университете: как проходит, линейка для первокурсников(руз.). blog.fenix.help. Дата обращения: 1 Таштамковонь 2025.
- ↑ Дети вместо цветов 2025(руз.). dvc.fondvera.ru. Дата обращения: 1 Таштамковонь 2025.
- ↑ Дети вместо цветов — Благотворительный фонд помощи хосписам «Вера»(руз.). Благотворительный фонд помощи хосписам «Вера». Дата обращения: 1 Таштамковонь 2025.
- ↑ Откуда пошла традиция праздновать День знаний 1 сентября?, AiF. Ваннозь 1 Таштамковонь 2025.
Литература
Григорьев В. В. Исторический очерк русской школы / сост. В. В. Григорьев. — М.: Товарищество Типография А. И. Мамонтова, 1900.- Пластун Л. День Знаний как эффективный информационный повод для антиабортных акций // Здоровье – основа человеческого потенциала: проблемы и пути их решения. — 2010. — № 1.
- Шемраев С. Н. Всероссийский день знаний // Вестник Белгородского юридического института МВД России. — 2006. — № 2.