Тюштя

Тюштя

Тюштя (Тюштян) - эрзянь инязор, мараля.

Кие сон ульнесь

Эрзянь валморотнесэ, мифтнесэ ды эпостнэсэ кортамось моли Тюштядо кода эрзянь васенце инязордо. Весе моротнесэ прявт смустесь - эрзянь инязоронь кочкамо. Те ине таркантень арыця ломанесь аволь кодамояк стяконь ломань. Сон «мода лангсо сехте сюпав, менель ало сехте козяв», сон пек виев «сисем сабансо, комсьвейкее лишмесэ Тюштянь соки», сонзэ «кшнинь кочкарянзо, кевень пря касмозо, уськсэ тапарязь кумажанзо, конястонзо лиси чись, копорьстэнзэ - валдо ковось, пря чертнень пева - тештинеть»

Моросо кадовсь лемезэ

Тюштядо сехте кезэрень морось кадовсь эрзянь эрьва велесэ. Эйсэнзэ эрзятне панжить озкст, озномат, покшчить:

Тюштя
Кезэрень пингень эрзянь моро
Тюштя, да Тюштязоро,
Да Тюштязоро — да инязоро.
Ох, косо да Тюштянь масторозо?
Да косо да Тюштянь раськезэ?
Кавто да пандо, да пандо ютксо,
Кавто да ведень усиясо,
Кавто да ведень усиясо,
Ведень усьясо пижине да луга,
Ведень усьясо пижине да луга.
Луганть лангсо да путонь кудо,
Луганть лангсо да путонь кудо.
Кудынесэнть таргань морга,
Кудынесэнть таргань морга,
Морганть лангсо да ашо кшируця.
Морганть лангсо да ашо кшируця,
Руцянть лангсо да пижень яндава.
Руцянть лангсо да пижень яндава.
Яндавасонть човань пуре.
Ох, яндавасонть човань пуре.
Пуресэнть нолдазь сиянь кече,
Пуресэнть нолдазь сиянь кече.
Ков чизэ сон чаравты,
Ков чизэ сон чаравты
Тов кече пулось сон велявты,
Тов кече пулось сон велявты.
Пидезь-панезь атякшозо,
Пидезь-панезь атякшозо,
Рестазь-пуштазь нучко калозо,
Рестазь-пуштазь нучко калозо.
Верьга да ливтить колмо цянавт,
Верьга да ливтить колмо нармунть.
Сёлмо да песэст вальмас чавить,
Сёлмо да песэст вальмас чавить,
Ломань кельсэ да сынь басить,
Ломань кельсэ да сынь басить:
Тюштя, да, Тюштя, да, Тюштязоро,
Тюштязоро, да инязоро,
Тон а содат, Тюштя, мезеяк,
Тон а содат, Тюштя, мезеяк.
Душман саизе, да, Тюштя, масторот,
Ят саизе, да, Тюштя, масторот,
Ят саизе, да, Тюштя, тонь раськеть.
Коли саизе да ят мастором,
Коли саизе душман монь раськем,
0х, пидезь-панезь монь атякшом
Вельмиязо ды толгиязо.
Вельмиязо ды оймиязо
Да "ку-ка-ре-ку" сон рангстазо.
Коли саизе да ят мастором,
Коли саизе ят монь раськем,
Рестазь-пуштазь да нучко калом
Вельмиязо да оймиязо,
Вельмиязо да оймиязо,
Пурентень нолдазь да уйкшнэзэ
Ох, пидезь-панезь сон атякшось
Вельмиякшнось да толгиякшнось,
Да "ку-ка-ре-ку" сон рангстакшнось.
Ох, пуштазь*-рестазь нучко калось
Вельмиякшнось да оймиякшнось,
Човань пурес сон ювадекшнесь,
Човань пурес сон ювадекшнесь,
Яндавасонть да уйкшнекшнесь.
Ох, вачкодсь Тюштя кавто кедензэ,
Нединзе Тюштя кемень суронзо.

Тюштян ульнесь эрзянь ды мокшонь инязорокс (оцязорокс, каназорокс). Те лемесь теевсь «тюштя» нарицательной валсто, конасонть седикеле эрзятне тешкстнекшнесть сынст племань ветицятнень. Тюштядо ледстнематне неень шкас эзть стувтово эрзянь мельстэ-ёжосто. Нейгак эрзянь ды мокшонь велетнева марсеви «Тюштянь пинге» вал ёвтавксось, косо эрзятне тешкстыть се шканть, зярдо эрясть сынст покштятне-сырькайтне, ансяк велетнева пилестэ-пилес ёвтневить Тюштядо ёвтнематне ды валтнэ. Сехте питнеесь эйстэст - «Тюштянь пазчангот» весе эрзятненень.

Сёрмадовкст