Фотонь теицянь чи
| Фотонь теицянь чи | |
|---|---|
 | |
| Смустезэ | фотоиндустриясо важодицятнень профессиональной покшчи |
| Тешкстави | эрьва иестэ |
| Тешкстамонь чись | медьковонь 12-це чи |
| Мезе марто сюлмазь | фото марто |
Фотонь теицянь чи (англ. International Photographer Day) — фотоиндустриясо важодицятнень профессиональной аволь официальной покшчи. Тешкстави эрьва иестэ медьковонь 12-це чистэ[1]. Россиясо те покшчись ютавтневи 2009-це иестэ саезь.
Фотонь теицянь важодемадо
Кемень меельце иетнестэ фотонь теицянь важодемась бойкасто тееви пек эрявиксэкс. Фотонь теицятне эрявить журналистикасо, моделень ды рекламань бизнессэ. Фотонь кой-кона теицятне снимить урьвакстомань-мирденень лисемань ды кудораськень фотот, ушонь ды мазый оршамонь фотот. Лиятне важодить компьютерэнь обработкань фототнень марто. Теде башка те важодемасонть улить чуросто вастневиця ёнкст, конат сюлмазь фотодокументалистэнь, криминалистэнь ды лабораториянь фотонь тееманть марто.
Фотонь теицянь важодемась веши ламо анокстамо, лездамопель, шка, валдо марто важодема ды эрьва кодамо пертьпельксэнтень тонадома. Те ёнксонть эйсэ ламо важодицятнень арась тёкш школань содамочист, ансяк весе ютасть эрявикс тонавтома мастер-класстнэсэ ды семинартнэсэ.
Эрямопингезэ
Фотонь теемань важодеманть кастомазо
Покшчинть эрямопингезэ сюлмазь фотонь искусстванть кастоманзо марто. Неень шкань фототнень невтемакс ловови камерась-обскурась — лездамопель, кона невти объектэнь оптиканть невтеманзо. Весемесь ашти чопода таркасо ды вишка варине марто парго ве пелькссэ ды суликине эли ашо конёв омбоце пелькссэ. Варяванть ютыця валдось максы каршо таркасонть велявтозь невтема. Истямо лувонть вельде теезельть васенце фотокамератне.
Фотонь искусствань ушодыцякс ловови Жозеф Ньепс. 1820-це иетнень ушодкссо сон арсесь механикань ёнксонть вельде фиксировазь невтематнень получамодо. 1826-це иестэ лиссь теемс «Вальмасто невтевкс» васенце фото.
Тень туртов сонензэ эрявсть 8 част. Фотось лиссь ваднезь, ансяк ялатеке вейсэнь невтевксэсь неявсь.
Фотоискусствань касомасо од эскельксэкс кармасть Луи Дагер французонь содыенть варчнеманзо. 1837-це иестэ сон тейсь металлонь пластина лангсо васенце фото ды кемекстызе невтеманть сал вельде. Фотонь эрямопингень кастомасо лия эрявикс кастыцякс ульнесь Уильям Генри Фокс Тальбот. Сон тейсь ламо фотонь копиянь важодевкс.
Фотоискусствань икелев молемасо од эскельксэнть теизь Англиясто, Франциясто ды Великобританиясто ванныцятне 1850-це иетнестэ. Сынь пажовксост макссть седе бойкасто получамс фотонь тееманть ды киртямс снимамонь шканть.
1881-це иестэ теезель-пурназель «Кодакось». Те компаниянть вельде фотоаппараттнэ кармасть улеме эрьва масторсо ламо эрицятнень[2].
Покшчинь тешкстамонь чи
Медьковонь 12-це чись ловови Иневанькс Вероникань — фотонь ванстыцянь ледстнема чикс. Ёвтамось корты, Вероника ульнесь Иисус Христосонь марто Голгофав сонзэ якамонь шкасто. Зярдо Иисус Христос кармась куземе пандо пряс, Вероника чийсь сонензэ, симдизе ведте ды максызе эсь пацянзо чамасто ливезенть ды веренть нардамга. Кудов велявтомсто Вероника неизе нардамонть лангсо Иисусонь чаманзо[3][4].
Лия арсеманть коряс, Фотонь теицянь чинть тешкстамозо алтазь Джордж Истман — «Кодак» компаниянь теицянть чачома чизэнзэ[5].
.jpg)
Покшчинь тешкстамонь койть
Фотонь теицянь чись аволь официальнойстэ тешкстави весе масторонть лангсо. Те чистэ фотонь содавикс артыцятне ушодыцятнень туртов ютавтнить питневтнеме тонавкст, парктнесэ ютавтневить квестт, художественной галереятнесэ — важодемань невтемат.
Американь Вейсэндязь Штатсо (США-со) Фотонь теицянь чинть ютавтомасо лезды Президентэсь. Весементь лангс максневи ярмаконь лезкс федеральной бюджетстэ.
Россиясо Фотонь теицянь чинть тешкстыть фотокорреспонденттнэ ды редакциянь куротне, конат сюлмазь фотонь тееманть марто. Те покшчинтень алтазь теке лемень кандниця фестивалесь, кона ютавтневи 2009-це иестэ саезь. Эйсэнзэ казить «Иень фотонь теиця» профессиональной премия[6].
Историянь фактт
- Индиянь Мумбаи ошсто Дилиш Парехень улить масторлангсо сех ламо фотоаппаратт, весементь сон ушодсь пурнамо 1977-це иестэ саезь. Пурнавкссонть 4425-де ламо ташто камерат.
- Россиясо тюсонь васенце фотось нолдазель «Рузонь Технической Вейсэндявксонь сёрмадовкст» («Записки Русского Технического Общества») журналсо ды невтизе Лев Толстоень.
- 1982-це иестэ «Смена-символ» советэнь фотоаппаратось тевс нолдазель альпинисттнэсэ Эверестэв куземстэ. Ванстови Московсо Политехникань музейсэ[7][8].
Теке марто вант
Тешкставкст
- ↑ Коротко о важном. День фотографа. Вести Тамбов. Дата обращения: 24 Аштемковонь 2024.
- ↑ День фотографа 2024. calend.online. Дата обращения: 24 Аштемковонь 2024.
- ↑ 12 июля – День фотографа. Вольская жизнь. Дата обращения: 24 Аштемковонь 2024.
- ↑ 12 июля – день фотографа. Законодательное собрание Иркутской области. Дата обращения: 24 Аштемковонь 2024.
- ↑ День фотографа в 2024 году: история и традиции праздника. Комсомольская правда. Дата обращения: 24 Аштемковонь 2024.
- ↑ Елена Чашкина. 12 июля - День фотографа: что это за праздник и как его отмечают. Билетик (12 Медьковонь 2020). Дата обращения: 24 Аштемковонь 2024.
- ↑ День фотографа: от битума и серебра с йодом до селфи каждый день. radiosputnik.ru (12 Медьковонь 2021).
- ↑ 12 июля – День фотографа! 12 интересных фактов. Культурный мир Башкортостана (12 Медьковонь 2019). Дата обращения: 24 Аштемковонь 2024.
Әҙәбиәт
- Попов А. П. А—Л // Российские фотографы 1839—1930. Словарь-справочник. — Музей органической культуры, 2013. — Т. 1. — 200 экз.
- Попов А. П. М—Я // Российские фотографы 1839—1930. Словарь-справочник. — Музей органической культуры, 2013. — Т. 2. — 200 экз.
- Попов А. П. Российские фотографы 1839—1930. Словарь-справочник. — Музей органической культуры, 2013. — Т. 3. — 200 экз.
- Круткин В. Л. Фотографический опыт и его субъекты. Визуальная антропология: новые взгляды на социальную реальность. — Саратов: Научная книга, 2007. — 527 с. — ISBN 5-9758-0247-4.