Кривошеев, Илья Петрович
| Илька Морыця | |
|---|---|
| Файла:Кривошеев (Васень сятк, 1929).jpg | |
| Чачомсто лемезэ | Илья Петрович Кривошеев |
| Чачома чизэ | 1898-це иень медьковонь 19-це чи |
| Чачома тарказо | |
| Кулома чизэ | 1967-це иень таштамковонь 11-це чи (69 иеть) |
| Важодемань ёрокчизэ | валморозей |
| Тетязо | Пётр Васильевич |
| Авазо | Ефимия Петровна |
 Илья Петрович Кривошеев | |
.jpg){kind=link}
Илья Петрович Кривошеев (эрз. Илька Морыця[1]) (1898 иень медьковонь 19 чи, Саратов ёнксонь Маяк хутор - 1967 иень таштамковонь 11 чи, Ицяло) - эрзянь[2][3] содавикс сёрмадыця ды валморонь сёрмадыця.
И.П. Кривошеев Мордовиянь заслуженной тонавтыцясь содавикс кода Илька Морыця пек вадря, гайгиця, морыця валморонзо кис.
Чачсь 1898 иень медьковонь 19-це чистэ Саратов ёнкссонь Лопатинской буень Маяк хуторсо[4][2]. Тетязо, Пётр Васильевич, кузнецель. Авазо, Ефимия Петровна[1], ульнесь эрзянь содавикс ёвксонь ёвтницякс. Сонзэ пельде кармаськак содамо сы шкань валморонь сёрмадыцясь раськень поэзиянть. Эрзянь келенть цёрынесь кармась вечкемензэ эйкакшпингестэ. Камешкирэнь училищанть прядомадо мейле тонавтсь школасо эйкакшт, мейле тонавтнесь седе тов. Прядызе Саратовонь университетэнть. Сась эрямо Саран ошов, важодсь тонавтыцянь техникумсо. Меельце иетнень перть Илья Петрович анокстась тонавтыцят Ицялонь тонавтыцянь училищасо. 1934-це иестэ саезь сон - СССР-нь Сёрмадыцянь вейсэндявксос совиця[5].
Илька Морыцянь лиссть кеменде ламо пусмонзо. Сёрмадсь пьесаткак. Эйкакштнень туртов пьесанзо сёрмадозь эрзянь ёвксонь коряс. «Пакшатненень» («Детям»), «Большевикень вал» («Большевистское слово»), «Лавсень моро» («Колыбельная песня») эрзянь кельсэ васенце валморонзо ульнесть нолдазь 1923-це иестэ «Якстере сокиця» («Красный пахарь») кулялопасо. 20-це иетнестэ сонзэ валморонзо нолдавить «Якстере теште» («Красная звезда») кулялопасо, кона лиснесь Московсо ды теде башка "Од эрямо" ("Новая жизнь") Новосибирскоень кулялопасо. 1929-це иестэ Московсо Центриздатсо лиссь "Васень сяткт" ("Первые искры") эрзянь валморыцятнень вейсэнь пурнавкс, ков совасть Илька Морыцянь зярыя валморот. Сынь алтавсть велень эрямонтень, пертпельксэнтень, эйкакштненень.
"Коммунань толт" ("Огни коммуны") Илька Морыцянь васенце пусмозо лиссь 1933-це иестэ «Молодая гвардия» издательствасо. Теке иестэ Сарансо лиси "Валскень зорява" ("На утренней заре") валморонь омбоце пусмозо. Неть сёрмадовкстнэсэ - од эрямонь самось ды сонзэ кепетемась. 30-це иень валморонь темасонзо аштить пертьпельксэнь ды эйкакшонь тематне. 1943-це иестэ лиссь «Народонь вайгель» («Голос народа») пусмозо, косо валморонь сёрмадыцясь кепети советэнь ломаненть оймень покшолманзо.
Ине Отечествань войнанть прядовомадо мейле лиссть истят пусмот: «Монь ким» («Мой путь», 1946), «Тундонь сад» («Весенний сад»,1952), «Монь Родинам» («Моя Родина», 1954), «Избранное» (рузонь кельсэ, 1955), «Стихть ды поэмат» ("Стихи и поэмы", 1958), «Славан эрямонть» («Славлю жизнь», 1963), «Кеман эрямос» («Верю в жизнь», 1967), «Морамонь ким» («Мой песенный путь», 1968).
Кулось Илька Морыця 1967-це иень таштамковонь 11 чистэ. Калмазь Ицялсо. Тосо валморонь сёрмадыцянтень стявтозь кеврунго.
Лисьмапрят:
- ↑ 1 2 Библиотека Мордовской литературы: Кривошеев Илья Петрович (Илька Морыця) (руз.)
- ↑ 1 2 МАЯК Лопатинского района Пензенской области (руз.)
- ↑ ЛИТЕРАТУРНОЕ ТВОРЧЕСТВО ЗУБОВОПОЛЯНЦЕВ (руз.)
- ↑ Большая советская энциклопедия: Кривошеев Илья Петрович (руз.)
- ↑ Городские рейтинги. Самые древние жилые дома Саранска (руз.)