Рябов, Анатолий Павлович
| Рабовонь Анатолий | |
|---|---|
| Чачомсто лемезэ | Анатолий Павлович Рябов |
| Тетязо | Павел Тимофеевич Рябов |
| Авазо | Александра Михайловна Рябова (Юрченкова тейтерькс) |
К:РУВИКИ:Статьи без изображений (тип: не указан)
Анатолий Павлович Рябов (1894 иень чадыковонь 16 чи, Ламбаське велесэ, Ицялонь буесэ, Мордовия Республика — 1938 панжиковонь 22 чи Саранск ош) — эрзянь профессор, ламо келень содыця, Эрзянь васенце букварень пурныця-нолдыця. 1923 иестэ Московсо ары «Сыргозема» вейсэндявксонь прявтокс. Ледезь 1938-це иень панжиковонь 23-це чистэ. Рябов, Владимир Павловичень ды Рябова, Софья Павловнань марто.
Эрямонь ды важодемань пингезэ
Анатолий Рябов чачсь Ламбаське велень[1][2] сокицянь-видицянь кудораськесэ. Велень школанть прядомадо мейле тетянзо-аванзо кучизь тонавтнеме Починкань духовной училищав.
Тонавтнема
Тетянзо куломадо мейле кадсы семинариясо тонавтнеманть. 1912-це иень сёксня максы экзамент Нежинэнь тонавтыцянь институтонь филологиянь факультетс (Украина), косо эсь шкасто тонавтнесь Николай Гоголь сёрмадыцясь. Институтонть Анатолий Рябов прядызе 1916-це иестэ. Те шканть перть Рябов парсте кармась содамо латинэнь, англань, украинань, финнэнь, эстониянь ды китаень кельтнень[3]. 4 иеть А. П. Рябов важодсь тонавтыцякс семинариясо, мейле — Нижегородской губерниясо раськень тонавтомань куронь важодицякс. Тесэ сон бажи теемс школасо тонавтнеманть эрзянь ды мокшонь кельтнесэ. Эрзятненень ды мокшотненень раськень школань панжомань коряс меленть неизь РСФСР-нь Наркомпросонь важодицятне. Секскак 1924-це иестэ сонзэ тердить Московов важодеме методистэкс Раськетнень советэнть лувсо Мордовиянь бюров. Московсо свал ульнесь эрзянь ды мокшонь томбалень эрицятнень таркасо. Тесэ эрзятне ды мокшотне муильть кекшема тарка вачочиде, революциядо мейле кундсематнеде, весе свал кортасть эсь ютковаст тиринь кельсэ.
Московсо эрямозо
1923-це иестэ Московсо эрзятне ды мокшотне панжить «Сыргозема» вейсэндявкс[2]. Те покш тарка, косо явозель мель морокуротненень. Вейсэндявксонь прявтокс ульнесь А. П. Рябов. Те хоронть лемс весе Союзонь радиосо морамодо мейле масторонть эрьва пельде сыльть пек ламо сёрмат, конатнесэ ломантне ёвтнесть покш ёжомарямодост эсест кельсэ искусстванть марто вастовомадонть, эрзянь гайгиця моротнеде.
Морамотнесэ сеедьстэ ульнесть покш ломантькак. Саемга, В. Э. Мейерхольд искусствасо реформаторось, кона кенярдсь эрзянь моротнень мазычинтень. Сон пек вечкилинзе А. П. Рябовонь хоронь эрзянь моротнень.
1926-це иестэ Марьинэнь Рощасо панжови эрзянь ды мокшонь панжови эрзянь ды мокшонь куро. Сонзэ прявтокс путозель А. П. Рябов. Те курось теевсь эрзянь келень, литературань ды культурань куншкакурокс. Тесэнь инжекс свал ульнесть Артур Моро, Никул Эркай, Алексей Лукьянов, Яков Григошин, Фёдор Чесноков ды ламо лия сёрмадыцят. А. П. Рябов свал вансь од ломантнень касомаст мельга.
Саран ошсо. Эрзянь келень кепедема шка
Зярдо теевсь Мордовиянь автономиясь ды Саран ошсо панжовсь тонавтыцянь пединститут, А. П. Рябов сы Саранов. Сестэ сон кадсы эсь хоронзо Илларион Яушев эрзянь содавикс морыцянтень.
А. П. Рябовнень кода сыця шкань кельсодыентень ламо вийть макссть Д. В. Бубрих, Ф. Ф. Советкин содыйтнень ды М. Е. Евсевьев тонавтыцянть марто. 1924-1925-це иетнестэ Рябов тейсь покш тев эрзянь ды мокшонь тонавтыцятнень 1-це ды 2-це промкстнэнь анокстамосо ды ютавтомасо. Неть иетнестэ А. П. Рябов аноксты эрзянь школатнень туртов тонавтомапельть. 1926-1927-це иетнестэ сон ульнесь эрзянь келень экспедициясо Орданьбуень Лувне ды Кеченьбуе велетнесэ. 1926-це иестэ сон кармась тонавтнеме Востоконь раськетнень НИИ-нь аспирантурасо. Тосо сон теевсь эрзянь ды мокшонь келень покш содыцякс. А. П. Рябов аноксты эрзянь келень юр, ванькскавты эрзянь келенть рузонь валтнэнь эйстэ.
1930-це иестэ А. Рябовонь кедь алдо лисcь «Эрзянь-рузонь валкске». Вана мезе кадсь сон эйстэдензэ (сёрмадомань ды лоткамо тешксэнь вешематне кадозь истя):
Те валкскенть мон сёрмадыя 1925-це иестэ. Умоконь тевть... Ламо шка ютась седе мейле. «Яла икелев чуди Сура леесь». Эрзянь кельскак а айшчи ве таркасо. Валкскенть сёрмадыцязояк кайсь эрзянь келенть кувалт. Лиякс седе ламо сёрмадоволь сон ней. Лиякс нолдавлиньзе «кель пирясо кочказь кснавнэ» валонзо.
Ютазь шкась а мурды. Сави нолдамс мезе ули. Валкскенть ловныцязо иляссо стувто — сон сёрмадозь 1925-це иестэ.
Ламо валт пырнынь Куцян велестэ (Ордань-буень район Мокшэрзянь область). Валтнэнень максозь литературань келень хорма.
Январь ков 1930-це ие.
Ламо шка ютавтсь, ламо вий рутсь мартон валкскенть сёрмадомсто Дёмань Поля (П. Ф. Дементьева).
Анатолий Рябов[4].
1934-це иестэ А. П. Рябов эрзянь келень васенце профессоронть тердизь Мордовиянь тонавтыцянь институтс эрзянь ды мокшонь келень кафедранть прявтокс. А. П. Рябов профессоронть покш питнезэ сеньсэ, сон васенцеде сёрмадызе ды ловнызе неень шкань эрзянь келень курсонть, методиканть ды сонзэ историянзо.
Мордовиянь тонавтыцянь институтсо А. П. Рябовонть перька пурназельть Антонов, Смирнов, Васильев, Макаров содыйть ды Горбунов, Сигимова, Смолькина, Назаров студентт.
НКВД: «Эрзянь ды мокшонь раськетнень ятт»
Эрзянь ды мокшонь культурань кепетемасо «пек покш важодемась» НКВД-нтень неявсь берянь тевекс. 1937-це иень аштемковонь 5-це чистэ ульнесь максозь Анатолий Рябовонь кудосо вешнемань коряс 4-це номер ордер. Рябовонь пекстызь. Сон ёвтазель «эрзянь ды мокшонь раськень ятокс». Пекстазель Прасковья Фадеевна сонзэ низэяк, кона ульнесь тонавтыцякс. Ричард цёраст ёртозель ушов.
1937-це иень ацамковонь 17-це чистэ чумондомасонть мерезель, Рябовонь сиведизь финнэнь ды эстононь шпионт, Дмитрий Бубрих ды Марк. Нама, А. Рябов кодамояк «антисоветской» тевсэ арасель. Ялатеке 1938-це иень панжиковонь 23 чистэ[2] ледезель. Калмамо тарказо апак ёвта те шкас.
Кода «раськень ят» сонзэ омбоцеде "чавизь" 1952-це иень келень конференциясо, кона алтазель келень коряс «Сталинэнь» важодематненень. Теде башка ледезельть Мордовиянь ламо лия покш ломанть. 1956-це иень сундерьковонь 28-це чистэ СССР-нь Верховной Судонь Военной коллегиясь лоткавтызе А.П. Рябовонь тевензэ коряс Верховной Судонь коллегиянь приговоронть преступлениянь арасьчинзэ коряс.
А. П. Рябов профессоронть ульнесь нурькине эрямозо. Ялатеке те ломанесь весе виензэ максынзе эрзянь ломантнень туртов. Эрзянь ды мокшонь кельтнень коряс сон сёрмадсь малав 30[2] тонавтомапельть, конат неень шкас кандыть покш лезэ. Минь сюконятано эрзянь те покш ломанентень ды свал кирдтяно сонзэ мельсэ-превсэ.
Вант седе тов:
- ↑ Данильчев Александр Алексеевич «Эрзянско-русский словарик» и «Русско-эрзянский словарь» А. П. Рябова.(руз.), (эрз.)
- ↑ 1 2 3 4 Н.Баюшкин. «Кудо» Эстононь-мокшэрзянь вейсэндявксонть журналозо. 1998, nr. 1 Алтави Анатолий Павлович Рябов профессоронть 104-це иень чачома чинтень(эрз.)
- ↑ Н.И. Зараева. Первый мордовский профессор-лингвист (к 120-летию А.П. Рябова)(руз.), (эрз.)
- ↑ Эрзянь-рузонь валкске. Москов, Центриздат, 1930 А. П. Рябов