Великанова, Елена Александровна
Великанова, Елена Александровна — Мордовия Республикань заслуженной тонавтыця[1], Саран ошонь Луховкань лицеень ушодксонь классонь ды эрзянь келень тонавтыця[2]. Эрзя.
Эрямокизэ
Елена Великанова чачсь 1963-це иень ожоковонь 29-це чистэ Покш Игнатовань буень Ежовка эрзянь велесэ. Александр Иванович Леонтьев тетязо прядсь Кемлянь велень хозяйствань техникум. Пингензэ перть важодсь велень хозяйствань специалистэкс. Ульнесь буесэ парторгокс, механикекс, механизациянь коряс прявт инженерэкс. Сон чачсь ламо эйкакшонь триця кудораськесэ, косо ламо важодсть ды лездасть вейке-вейкенень. Валентина Осиповна авазояк покш кудораськень. Сон ушодксонь классонь тонавтыцяль, 40 иеде ламо ульнесь макссь важодемань тевентень.
Тонавтнемазо
Сонзэ кедьга ютыть сехте вишкинетне. Тетяст-аваст ветясызь кедте школав, тосо мельспаросо эйсэст васты вечкевикс тонавтыцяст. 4 иетнень перть сон карми тенст васенце тонавтыцякс, превс путыцякс, омбоце авакс. Весе эрямонзо перть сон важоди Луховкань средней школасо (ней — лицей) ушодкс класстнэсэ тонавтыцякс. А лововитькак, зяро эйкакшт нолдась, тонавтсь ды путсь виде килангс. Вишка шкасто саезь бажась улемс тонавтыцякс, кодамояк лия таркасо эзь нее прянзо. Важодемань книжкасонзо ансяк вейке сёрмадовкс – Луховкань школав саемадо.
1971-це иестэ Елена сыргась тонавтнеме васенце классов Покш Игнатовань буень Од Баевань школав. 1975-це иестэ Леонтьевтнень кудораськест сась эрямо Саран ошонть вакссо Луховка посёлкав. Тесэ Елена сырнень медаль марто прядызе средней школанть. Теке иестэнть мольсь тонавтнеме М. Е. Евсевьев лемсэ МГПИ-нь (ней – МГПУ) ушодксонь классонь факультетэв. Нама, кода школасояк, пединститутсо сон тонавтнесь парсте ды прядызе якстере диплом марто.
Важодемазо
1985-це иестэ Елена Великанова ушодсь важодеме Луховкань школасо ушодксонь классонь тонавтыцякс. Сон ледстни, кода малав 20 иеть минь аванзо марто важодсь вейсэ, сон тонавтсь шабра классонть. Авазо лездась тензэ эрьва мейсэ. Паряк, секс стакачитнеяк эзть маряво.
Е. А. Великанова тонавты эйдетнень ловомо, ловномо ды сёрмадомо. Сонзэ эйсэ мельспаросо кунсолыть весе эйкакштне. Тонавтыцясь максы весе седейлембензэ вишкинетнень туртов. Корты мартост чевтестэ, вайгелень апак кепсе. Маряви, сон муи кель-вал эрьванть марто. Бути мезесь а чарькодеви, тагояк толковасы-ёвтнесы. Икеле эрсесть покш класст, косо ульнесть 30-де ламо ламо тонавтницят. Кеветее иеть вети эрзянь кель 2-це-4-це класстнэсэ. Васня, кода мерсть тензэ ушодомс ветямо тиринь кель, талнозевсь. Кармась вешнеме эрявикс материалт, литература. Прясонзо аравтызе-ладизе, кода ютавтомс уроктнень мельстуицякс, ды тевезэ сыргась[3].
Тонавтыцясь эйкакшонзо марто свал яви мель эрьва кодамо пелькстамотнес ды конкурстнэс. Эрьва ие тонавтницянзо лиснить изницякс республикань ды весероссиянь пелькстамотнесэ, эрзянь келень олимпиадатнесэ. Теде башка, Е. А. Великанова тевс нолды ванномань важодеманть. Тонавтыцянть классо теевсь паро коекс пурнамс вастовомат содавикс ломантнень марто (сёрмадыцят, валморонь сёрмадыцят, Ине Отечествань войнань ветерант, МЧС-нь важодицят ды седе тов). Свал сайни эйкакшонзо невтемав, театрав, музеев, ютавтни эрьва кодат экскурсият, шкинемань пелькстамот. Ардтнить паломникень экскурсиява, эйкакштне пек вечкить Инечиде мейле недлястонть якамо церьковав чавомо баягасо. Елена Великановань тонавтницянзо зярдояк а аштить тевтеме. Весе сынь яксить спортонь, музыкань ды художественной секциятнес, кружоков. Сонзэ сеедьстэ савкшны некшнемс эйкакшонзо марто театрасо, музейсэ ды лия покш кенярксчисэ.
Ушодксонь классонь тонавтыцясь пек векчксы театрав якамонть эйкакшпингестэс аезь. Ды тонавтницятнень марто свал яки спектаклянь ваномо. Ней театрась – сонзэ эрямонь пельксзэ. Бажи а менстямс вейкеяк невтема. Содасынзе ламо наоксицятнень, сынь кармасть малавикс ломанекс, вастовомсто кортнить. Эрзянь ды мокшонь раськень драмтеатрась путызе «Адсто оргодема» М. П. Девятаевде спектаклянть. Сонзэ эряви ваномс школасо тонавтницятненень, од ломантненень.
Казнензэ
- Россиянь Федерациянь Президентэнь грантонь саиця (2006)
- Саран ошонь Администрациянь прявтонь грантонь саиця (2013)
- «Иень тонавтыця» ошонь пелькстамонь лауреат (2013)[4]
- Мордовия Республикань Прятонь грантонь саиця (2014)
- Важодемань ветеран.
Общественной тевензэ
Истят тонавтыцятне, кода Елена Великанова, кастыть алкуксонь ломанть, тиринь масторонь вечкицят, превейть, арсицят. Сонзэ тонавтницянзо а стувтнить эйсэнзэ, лембестэ ледстнить ды ёвтыть сюкпрянь валт. Ламо ашти седе, мезе тон путат эйкакшонть оймес. Тонавтыцянь тевтнеде башка, Елена Великанова кармась волонтёрокс. Весемесь ушодовсь 2018-це иестэ ютавтовиця Масторлангонь пильгеоскань коряс чемпионатсто. Важодсь стадионсо стюардокс. Ней сови Мордовиянь культурань волонтёртнэнь юткс[5]. Республикань покш кенярксчитнестэ свал важоди волонтёрокс: васты инжеть, лезды тенст, пшкадят – ды а ёмат. Сонзэ неемстэ свал кевкстнян, косто сон сайни вийть, кона шкане эрьва ков кенери. Валонзо коряс, весе те ютась тетянзо-аванзо пельде. Кадык мади пелеветь, стякшны свал ранаяк. Авазояк ульнесь эрьва ков кенерицякс, валске марто сыргозят – пряканзо уш анок пидезь столь лангсот, банкасо пекстазь салтозь куярт-помидорт. Кона шкане оймсиль, кияк эзь сода.
Кудораськезэ
Елена ды мирдензэ Сергей мирдензэ кавто эйкакшост. Сынь аштить кувалмаст мельспаросо ды каштанчисэ. Андрей цёраст прядызе Н. П. Огарёв лемсэ МГУ-нть, важоди «Мордовия Аренасо» прявт агрономокс. Дарья тейтерест тонавтнесь Санкт-Петербургонь Театральной искусствань академиясо, ней важоди теке ошсонть «Буфф» музыкально-драматической театрасо налксицякс. Великановтнень колмо нуцькаст: Анна, Валентина ды Захар. Сынь лемдезь бабаст-сырькаест-покштяст лемсэ. Одтнэнь ульнесь покш мелест максомс истят лемть, кияк эйсэст эзь кармавто. Ды те пек кецявты малавикстнэнь. Ютко шкастонзо Елена Великанова пек вечки аштеме нуцьканзо марто.