Пулова, Татьяна Михайловна
Пулова, Татьяна Михайловна (чачсь 1987-це иень ожоковонь 23-це чистэ — Мордовия Республика, Дубёнкань буе, Дубёнка веле) — Саран ошонь 22-це тонавтома кудонь эрзянь келень, рузонь келень ды литературань тонавтыця.
Тонавтнемазо
Татьяна Пулова чачсь-кассь Дубёнка велесэ. 2005-це иестэ прядызе Дубёнкань школанть. Тонавтнемань шкасто пек вечкилинзе эрзянь келенть, рузонь келенть, литературанть ды историянть. Школань прядомадо мейле кармась тонавтнеме М. Е. Евсевьев лемсэ Мордовиянь тонавтыцянь государственной институтонь (ней — университет) филологиянь факультетсэ.
Тонавтнемась вечкевсь ды марявсь пек мельстуицякс. Тесэ седе домкасто теевсь содавиксэкс Мордовия Республикань культуранть марто ды бажась ламо содамс тиринь раськенть эрямодо, эрзянь койтнеде-кирдатнеде ды ламо лия мезде. Инстутонть прядызе пек парсте ды секскак кадовсь теске аспирантурасо тонавтнеме.
Важодемазо
Теке марто ве шкане кармась важодеме телевидениясо нолдамонь редакторокс. Ансяк ялатеке седеезэ бажась лиянень: максомс содамочитнень эйкакштненень. Седе тов Татьяна кармась важодеме школасо эрзянь келень тонавтыцякс. Истя ушодовсь тонавтыцянь кизэ. Сонензэ пек мельспаро важодемс эйкакшт марто, ваномс, кода сынст кепедеви мелест-арсемаст, кода сынь вечксызь эрзянь келенть ды ванстыть эйсэнзэ. Ванстови келесь ансяк сестэ, зярдо эйсэнзэ кортыть.
Зярыя иеть сон важоди Саран ошонь 22-це школасо эрзянь келень, рузонь келень ды литературань ды тонавтыцякс. Эйкакштнень марто сынь анокстыть олимпиадас ды ламо лия пелькстамос. Ламотне эйстэст сайнить изницянь ды призёронь таркат. Теде башка Татьяна Пулова сови Эрзянь раськень койтнень-кирдатнень, келень ванстомань ды кастомань-кепетемань фондонть курос. Фондось ютавты важодема, косо невтезь тиринь эрзянь раськенть коензэ-кирданзо, эрзянь келенть ды эрзянь раськенть питнейчизэ. Малав 10 иеть сон эрьва кизэ яки ОГЭ-нь ды ЕГЭ-нь анокстамо ды ютавтомо.
2024-це иестэ васенцеде аравтозь ОГЭ-нь ютавтомань таркань прявтокс.
Кудораськезэ
Ули тейтерезэ, лемезэ Ева. Сон тонавтни 6-це классо. Сехте пек вечксынзе эрзянь ды рузонь кельтнень. Ютко шкасто налкси театрасо ды яки музыкальной школав кайгасо седямо.